2019-07-23

何君堯 VS 朱凱迪　搭完膊頭又中途離場乜解究

　　今日何君堯同議會陣線朱凱廸就去咗港台直播節目，話要討論討論下元朗事件。咁又係嘅，元朗單嘢搞到滿城風雨，個個返屋企都話驚驚，點都有排要討論。唔同黨派議員上節目激辯好常見，但鬧鬧下喺直播節目拍檯走人，都真係令人O晒咀。

搭搭膊頭做朋友?

　　話說，何君堯同朱凱廸(阿廸)坐埋一枱，諗落都覺精彩!Jenny一早mark 定時間睇直播。佢哋兩個點唇槍舌戰Jenny就唔多講啦，不過節目期間疑似二人化敵為友喎！兩個搭曬膊頭嘅？對唔住，大家諗多咗喇！

　　一切都係因為何律師想親身證明「拍膊頭」唔代表認同對方理念喎，所以咪一嘢攬住朱凱廸膊頭囉!阿廸當堂呆左！想走又走唔到，表情好似講緊:嗱嗱嗱！大佬，我哋唔多熟喎！

直播途中拍檯走人

　　二人無法成為密友，自然就唔會帶著愛，個節目有過半時間都係互鬧到疊晒聲，主持人想插兩句話都難呀!何律師不停咁講，要朱凱廸「唔好再講光復（行動）」，又捉實佢個膊頭，起勢咁搖，又係咁拍落佢膊頭度。阿廸完全無晒符，一句完整說話都講唔到，到最後仲要放棄人生咁，收聲苦笑搖頭。何律師自己一個不停大喊「老友，講啦，講啦」、「點解你唔講呀，離晒大譜」！就連主持人見到都忍唔住叫停何律師。