《Online有話兒》橋水「鱷王」達利歐：錢已經唔值錢，買債好stupid！

 　　美國十年期國債孳息率繼續波動，個個都諗緊環球央行放水到底會點樣影響物價，仲有聯儲局議息結果會喺香港時間１８號凌晨公布，到時聯儲局會唔會有令人大跌眼鏡嘅行動呢？而雖然依家十年期國債孳息率迫近1﹒6厘，以保守嘅投資嚟講收益率算唔錯，不過資產管理規模高達1500億美金嘅對沖基金橋水創辦人達利歐（Ray Dalio）話，投資美債唔係好選擇，甚至係愚蠢嘅行為呀。

 

收益率跑輸通脹，借錢買非債務性資產

 

橋水基金創辦人達利歐同巴菲特睇法一致，認為買債會跑輸大市。（資料圖片）

 

　　「鱷王」達利歐嘅觀點係，由經濟元素睇，投資債券同大多數金融資產已經不明智，任何美元計價嘅資產可能唔係好選擇。與其得到低過通脹率嘅收益，倒不如買等於或高過通脹率嘅產品。

 

「依家政府債務規模膨脹同好多唔同資產都存在「典型泡沫狀態」嘅情況，向市場同經濟注入太多現金，就似啲人用假銀紙嚟玩嘅賭場。」

 

　　佢認為，投資者可以借cash，但唔係作為資產持有，因為現金價值經歷通脹一定會蝕，未來只會繼續係垃圾；應該買回報率更高嘅非債務性投資資產，建議建立非債務同非美元資產嘅多元化投資組合咁話。

 

　　股神巴菲特喺畀巴郡（美：BRK）股東公開信入面講過，近40年嚟債息息率持續下降，甚至喺一啲發達國家，例如德國同日本嘅主權債，投資收益率係負，債券投資面臨黯淡嘅未來。就買債「跑輸大市」呢點嚟睇，達利歐同巴菲特睇法一致。

 

（shutterstock圖片）

 

可能出現驚人加稅幅度，投資睇好亞洲新興市場

 

　　達利歐話，政府洗大咗就會加稅，而且唔會想呢啲錢由債務性資產走咗去其它財富資產，例如金、比特幣等，或者其它地區，所以好可能會有資本管制行動禁止以上情況出現。加稅幅度可能比預期更驚人。

 

　　事實上，美國總統拜登有計劃加稅，而且規模有傳會係28年嚟最大。大部分受影響嘅會係年收超過40萬美金嘅家庭，稅率會由37%升39.6%，仲要額外畀12.4%社會保障稅；資產增值同利息收入超過100萬美金嘅人，要畀39.6%稅。企業利得稅率加到28%，稅率重到呢。啲錢可能會拎嚟做基建投資嘅融資。

 

　　搞基建果然係谷GDP增長嘅方法之一，只盼唔係大白象，如果唔係美國人真係要抌心口。至於點補番加稅條數，達利歐認為成熟發達儲備貨幣國家嘅資產會追唔上包括中國嘅亞洲新興市場表現喎，信不信由你啦。

 

撰文：吳藹林

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【雙12感謝祭】雙重優惠．賞完再賞► 了解詳情