《小傳日記》今日有兩件大事，其一係林鄭率領新班子齊齊整整見記者；而對於一眾缸友嚟講，Ａ仔入摩就梗係要昅到實喇！　　終於得咗喇！Ａ場第四次闖入摩指，今次終於唔使食檸檬，成功加入ＭＳＣＩ新興市場指數喇！不過初步被納入嘅重磅Ａ仔只得２２２隻，佔指數嘅權重比例都唔夠１巴仙，但好多大行都已經收貨，話象徵意義重大，相信全球缸友將會更關注Ａ仔場云云。　　不過缸友反而趁好消息出貨，加上Ａ場又無太大反應，搞到香江魚缸今朝（２１日）跟外圍碌低９０點後，一度急挫２６７點至２５５７５，跌穿埋廿天線（約２５７９１）。縱使好友出盡力還擊，可惜恆指只係拗腰倒升咗一陣，轉過頭又碌番落去，收市都要瞓低１４８點報２５６９４。　　Ａ場收升０﹒５巴仙收３１５６點，但國指無奈收挫７４點報１０３９３。　　連「入摩」都幫唔到魚缸沖喜，成交依舊唔旺場，只得７６５億銀左右。最重要係，十天線開始有向下跌穿廿天線嘅跡象，「死亡交叉」隨時出現，缸友小心呀！　＊林鄭新班子齊齊見記者，入摩終成功Ａ仔新頁寫＊　　　Ａ股第４次試闖ＭＳＣＩ摩指終於成功，下年６月開始，２２２隻大隻Ａ仔就會加入新興市場指數同ＭＳＣＩ　ＡＣＷＩ全球指數嘅大家庭。食晒ＡＨ兩家茶飯嘅金隅（０２００９）、中冶（０１６１８），就跳高逾１同逾２巴仙慶祝，分別報３﹒９４同２﹒６４銀。中遠海發（０２８６６）同中集集團（０２０３９）都有份，更加飛起３同６巴仙，收１﹒７２同１４﹒０６銀。　　Ａ場滬指暢旺行前１６點。一眾ＥＴＦ表現都唔錯，孖寶南方Ａ５０（０２８２２）、安碩Ａ５０中國（０２８２３）跑前１巴仙，埋單１２﹒６２同１２﹒０８銀。　＊券商ＥＴＦ炒上賀入摩，貨櫃皇帝女３１６高歌＊　　　高盛估計，Ａ股入摩之後，將會有１２０億美金資金流入Ａ場，會輕輕幫到生發發（００３８８）嘅盈利，繼續叫「買入」。生發發曾經衝前逾１巴仙，但最終卻倒跌唔夠半巴仙，報２００﹒２銀。　　憧憬Ａ場成交會增加，會多啲指標基金幫襯，券商佬中信証券（０６０３０）、國泰君安（０１７８８）率先斬穫約１巴仙，報１６﹒２２同２﹒５４銀。海通國際（００６６５）都唔執輸，收穫近１巴仙，報４﹒６５銀。西證國際證券（００８１２）最誇張，飆前近１４巴仙，收報０﹒２９銀。　＊中金來唱好舜宇創新高，麥記畀個讚中興亦風騷＊　　　傳中遠海運打算收購東方海外（００３１６）旗下貨櫃業務，作價最少４０億美金，東方海外隨即踢高近２巴仙，報５３﹒５５銀，仲試過高見５６﹒１５銀創超過５年高位；中遠海控（０１９１９）都唔執輸，衝前４巴仙，報３﹒５７銀。　　中金唱好舜宇光學（０２３８２），將目標價由７１蚊升到８５蚊，重申「買貨」評級，結果好開心咁跳起近半成，報６９﹒３銀，曾經高見７０蚊破頂。　　中興通訊（００７６３）係噚日港股通（深）成交最活躍嘅魚毛，今日仲畀麥格理升目標價去到２２蚊，重申跑贏大市評級，當然彈起半成，收報１８﹒５銀。　＊麗新系美麗邊個夠我揮，半新丁熱炒ＩＴＰ好威＊　　　麗新系今日全線水漲船高，當中豐德麗（００５７１）最叻，大成交抽高近１２巴仙，報０﹒９６銀；麗新國際（００１９１）亦飛起７巴仙，報３﹒３８銀；阿仔麗新發展（００４８８）就衝前近６巴仙，報０﹒２８５銀。　　半新丁ＩＴＰ（０８４４６）繼續坐火箭，連升兩日累漲一成半之後，今日再炒高２４巴仙，報１﹒２３銀，高見１﹒３３銀創新高。另一半新丁建成（０１６３０）都好生猛，有近一成進帳，埋單０﹒６７銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

樂本健【秋日開倉26 - 27/9】保健品低至$20！► 火速行動