《小傳日記》魚缸今日坐咗一轉過山車，一隻理想（０２０１５）一隻美團（０３６９０）
，成績差天共地，但最後「淡不能勝好」，魚缸由跌轉升接近１００點，而講咗咁多日成交終於
過千億，加埋低開高走，今日恒指支陽燭終於有啲指望，果然係要等埋美團呀！
　　今日美團大升超過一成二，單獨為恒指貢獻１２３點升幅，今日可以話無美團就無升市！回
顧今次美團份成績表，可以話係誠意滿滿，終於見到美團喺搞好盤數上有做嘢兼做到嘢，次季經
調整淨利大增近７８％去到１３６﹒０６億銀（人仔．下同）大勝預期，總營收多２１％去到
８２２﹒５１億銀，經營利潤率由６﹒９％差唔多翻倍去到１３﹒７％。樣樣都升不特止，最有
誠意就係宣布加推１０億美金新回購計劃，比起隔籬棚升得多就宣布唔派息兼唔回購有良心得多
。
　　其中一科被美團公開點名讚好嘅就係「拼好飯」，業績入面提到，拼好飯第二季內表現「尤
為強勁」，單日訂單量已經突破８００萬單。王興喺業績會上提到，拼好飯成為許多追求性價比
用戶嘅首，更加為中小餐飲品牌提供增長動力，能夠降低每張定單平均成本。
　　見到個「拼」字就知，「拼好飯」其實係為主打團購，而團購嘅就只係一餐晏仔。其實喺神
州食一餐晏都已經可以好平，但再經拼好飯之後，唔使５蚊就可以食到一份豬手飯，換轉香港，
５蚊連麵包都無得捱。今年上面嘅年青人市場流行「報復性存錢」，５蚊一餐有肉嘅飯絕對係慳
得嚟又過得體面，所以就吸引到年青市場。
　　有人話美團搞「拼好飯」係複製拼多多條成功之路，但唔好唔記得，美團最初都係搞團購起
家，與其話係抄拼多多，不如話係回歸初心搞返本業，用過去嘅知識嚟拯救如今嘅狀況。過去好
一段時間都見到美團受困喺同餓了麼嘅惡性競爭，而且都一直被詬病係平台股入面業務範疇最窄
嗰隻。而今次搵得返一個新嘅增長點，正正就係孖屐期盼以久嘅驚喜，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇