《小傳日記》等咗咁耐，聯儲局終於講明即將減息！聯儲局主席鮑威爾喺Ｊａｃｋｓｏｎ　
Ｈｏｌｅ終極放鴿，講明「係時候開始減息」，雖然話係早有預期，但好在孖屐都有啲反應，美
股三大指數就畀面升咗１％有多。而魚缸呢邊其實都有升咗大約１％，但成交得啱啱８００億銀
，仲低過上個星期五（２３號），升得咁乾都令人欷歔。
　　減息就買樓平，今日魚缸都係用呢個講法嚟炒地產股，齊齊升之餘，好似領展
（００８２３）、新地（０００１６）同太地（０１９７２）仲以升破位走勢收盤，果然一減息
地產股就有得行。而呢一個講法都套用喺樓市，亦都係咁，令到今年撻訂宗數都多咗唔少。據統
計，今年至今已經錄得超過３８０單撻訂，涉及差唔多６０億銀！一撻訂發展商就會沒收全數訂
金，準買家都會損失唔少，所以以往除非市道非常差，否則發展商都唔恉會另追差價，但近期長
實（０１１１３）旗下＃ＬＹＯＳ就向撻訂買家追差價，引發孖屐熱議。
　　追差價其實係被撻訂發展商嘅權利，以往市道好都毋須要做到咁，始終對公司形象都唔係好
。而今次事後都有唔少評論為「追差價」護航，重申呢一項係合約精神許可嘅權利。今次追差價
嘅係長實，長實一向行動都快過人，好似之前新盤大減價都係佢帶頭，唔知今次帶起呢個頭，又
會唔會引嚟行家跟風呢？不過，如今長實追過差價，都一定會令準買家「心有芥蒂」，再睇長實
樓都會深思熟慮，咁樣係好定唔好，就要發展商自己衡量，始終長實實力雄厚，佢做到又唔係人
哋都做到，人哋跟唔跟，當然都會有自己考量。
　　今次會引起討論，因為已經有好耐未試過有發展商追差價。以往好景，有幾可會聽到發展商
因為份「細錢」而影響形象呢？但而家要出手追撻訂差價，難免會令孖屐覺得唔通個市真係差到
咁？而且，美國而家先開始減息，係開始「減息周期」，即係未來係會愈減愈低，更何況儲局減
息步伐係快係慢，連鮑威爾自己都十五十六，所以投資者好可能會睇定啲先掃貨，所以樓市到息
口見底先會一飛衝天都有可能，未來一段時間最多都只會係穩步回升，長實有此一舉當然有其道
理，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。

【etnet 30周年】多重慶祝活動一浪接一浪，好禮連環賞！ ► 即睇詳情