《小傳日記》個個都攻港，唔通個個都識攻港咩？呢兩日有唔少行家都大肆報道，已經有好
幾間神州過江龍喺香港水土不服，開業幾個月連約都未完就匆匆離場。
　　其實香港結業潮早已出現，之前嗰輪主要係香港本地薑，而今次就係當時接盤之後嘅過江龍
，但本地食肆都捱過一輪先執，但過江龍更加係曇花一現，未坐暖就果斷走人。好多時過江龍頂
唔住都係因為畀唔起租，眾所周知香港嘅地舖業主一向硬淨，經濟再差都唔會點減價，因為一減
就會影響之後嘅叫價力，所以就算「獨守空舖」都唔會作賤自己。
　　例如近期執笠嘅其中一間「蘿蔔向南」，第一間舖就落戶油麻地小食檔戰場登打士街，月租
盛惠２５萬銀，上年１２月起租，原本租期三年去到２０２６年１２月，但業主上個禮拜已經重
新招租，以原價２５萬銀放租。
　　蘿蔔向南主打湘西風味鐵板炒飯同任夾涼拌泡菜，睇返餐牌主打嘅鐵板炒飯都要６０銀錢一
個，有ＹｏｕＴｕｂｅｒ都成功喺開業呢短短幾個月入面去過拍開箱片，睇到即場炒出嚟個炒飯
雖然話係湘西風味，但感覺更加似本地茶檔風味，同茶餐廳出品差唔多。至於泡茶方面係３７銀
細桶，４９銀大桶，然後喺自助吧前任夾滿桶，再由店員加醬料撈勻。先唔好講味道係點，個飯
嘅賣相都係略為普通一啲，６０蚊一份確實係有啲貴。
　　針對過江龍結業潮，政府同上次本地食肆結業潮嘅回應一樣，任何執笠都係商業決定。所以
無論係本地定係內地食肆，落到嚟都係一視同仁，撈唔掂就係執笠，差在快執定慢執。其實港人
北上搵食潮都係因為大件夾抵食，兼有好服務，但好似蘿蔔向南咁自助為主，又唔係平靚正，當
然係難吸引到香港人。
　　雖然呢兩日都係集中報道啲捱唔住貴租要執笠嘅過江龍，但實際上本地食肆並唔係一潭死水
，好似呢幾日大家樂（００３４１）、翠華（０１３１４）公布嘅全年表現都係非常省鏡，而且
都唔係全部過江龍都做唔住，好似九毛九（０９９２２）旗下太二酸菜魚、呷哺呷哺
（００５２０）旗下湊湊火鍋，甚至蜜雪冰城，喺香港都越開越多，仲有其他非上市品牌，都有
自己喺香港嘅生存策略，最重要就係了解香港人口味，更重要係知道本地餐飲嘅玩法，雖然大品
牌實力雄厚係著數啲，但知己知彼先係企穩關鍵，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇