《小傳日記》最近喺內地社交平台上睇到一啲網民短片同留言，為福耀玻璃（０３６０６）
創辦人曹德旺抱不平。話說本應喺２０２４年開始招生嘅福耀科技大學（最近校名嘅後面加上「
暫名」二字），但最近傳出，因為無得到教育部嘅審批，今年不能招生，消息讓人大感意外。已
聘用嘅師資，管理和工作人員，每年嘅支出都唔少，延後一年嘅損失可想而知，何況仲未知要延
後幾多年呢。
　　福耀科技大學，位於福建省福州市高新區南嶼區流洲島，係由福耀集團創辦人曹德旺發起，
河仁慈善基金會首期捐資１００億元人民幣創辦嘅民辦大學。校園佔地面積１２７３畝，規劃為
一所本科生同研究生兼備嘅大學，全日制在校學生１﹒２萬至１﹒３萬人，其中本科生６０００
至６５００人。
　　點解一切就緒嘅福耀科大臨門一腳先叫停？校方嘅回應係今年要先將學校嘅重點實驗室起好
。呢個理由有啲牽強，大學校長都換咗兩個，實驗室未起好？如果實驗室咁關鍵，點解唔一早起
？未起好，之前又點解先要招生？更何況同福耀科技大學幾乎同時籌建嘅寧波東方理工大學，
２０２２年就已經開始招生。有人話最大嘅問題係曹德旺本人只有小學教育程度，對辦大學缺乏
認識，低估咗一間大學所需要嘅龐大投資、人才支持和資源配備。因此，大學三年換咗三個校長
。結果第三位校長王樹國上任後，覺得學科方向要調整，就同之前簽好約嘅教授解約。
　　亦有傳言話事件涉及校名嘅問題，由於大學被冠以「福耀」兩個字，個人或企業色彩太濃厚
。因此，大學並無收到曹德旺以外嘅其他企業家捐贈。如果改名，或者可以吸引其他企業家捐贈
。若然因為個名令其他捐款者卻步，都應該只係資金嘅問題，但目前並無聽講話校方資金出現問
題。
　　亦有人話，一所大學嘅影響力，好大程度上來自於該校人文學科嘅學術成果，呢Ｄ學科包括
文學、哲學、歷史、心理學、法學等。如果一間綜合性、研究型嘅大學無人文精神，無人文學，
只得農學、醫學、工學等自然科學，呢所大學可能只能成為一個技術培訓基地，很難成為世界上
一流嘅大學。不過，而家嘅問題只係招生開學，同將來會唔會成為世界一流大學似乎扯唔上任何
關係。就算目前科系唔夠全面，日後可以逐步加上去，呢個似乎都唔係乜嘢大問題。
　　今次福耀科大招生突然被煞停，真正嘅原因無人知。姑勿論原因係乜嘢，筆者相信總有解決
方法，唔應該搞到最後一刻先至被紅牌趕出場。曹德旺除咗係實業家之外，仲係一個慈善家。雖
然曾經因為投資美國設廠，而受到不必要嘅非議，說佢「跑了」。佢亦講過「內地除咗人（工）
平，乜嘢都比美國貴」之類不中聽嘅話，不過，佢始終係一個真正愛國愛鄉嘅人。再講，出資百
億辦學，為國為家鄉培訓人才，點都係一件美事，理應得到嘉許同讚賞。地方政府若有作為，應
該一早給予支持同協助，而唔係一盆冷水照頭淋。希望福耀科技大學早日可以順利招生，為國為
家鄉培養人才出一分力，一圓曹德旺嘅心願！請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。

【你點睇】港鐵失倫敦伊利沙伯線專營權，你認為「國際化」遇挫的港鐵應否將重心轉移回本地？► 立即投票