《小傳日記》上星期五魚缸跌６０點，今日又高開３０４點，全日走勢都幾穩定。科技股表
現大致ｏｋ，最大焦點一定係阿里巴巴（０９９８８）喇。佢旗下嘅螞蟻集團宣布唔再受馬雲控
制，持股量就唔變，股價今日高開近４巴仙，中段曾經升近８巴仙，一度重上１１０銀。隨住馬
雲放權，早排螞蟻集團又有得增資１０５億人仔，「螞蟻上市」係咪會捲土重來呢？
　　今日車股失色些少，當中小鵬（０９８６８）今日低開４巴仙，中段曾經跌近６巴仙。話說
Ｔｅｓｌａ喺神州開始大規模減價，Ｍｏｄｅｌ　３起售價２２﹒９９萬人仔，Ｍｏｄｅｌ　Ｙ
起售價２５﹒９９萬人仔，創歷史最低價。
　　國產Ｔｅｓｌａ兩個月內三次降價，公司對外事務副總裁陶琳喺微博ｐｏ文，Ｔｅｓｌａ價
格調整「涵蓋無數工程創新」，實質上係「獨一無二嘅成本控制之極佳定律」，包括：唔限於整
車集成設計、產線設計、供應鏈管理、甚至以毫秒級優化機械臂協同路線，由「第一性原理出發
」，堅持以成本定價。
　　作為新能源車嘅龍頭，Ｔｅｓｌａ咁樣減價，其他車企又會唔會跟風呢？小鵬相關人士話，
公司嘅汽車有自己嘅銷售節奏，會根據自身情況決定產品售價同促銷活動，而唔係跟隨其他車企
。
　　Ｔｅｓｌａ最新一份財報表現已經唔合符預期，車款仲要減價，話晒你聽公司有幾頹。龍頭
都咁樣，其他新能源車企都受到拖累，小鵬上兩個交易日喺１００天線即刻有壓力，仲未突破由
１０月形成嘅橫行區間，５０天線都失守埋，走勢都幾弊呀！請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。

【你點睇】有健身中心宣布全線暫時結業，議員指巨額預繳式長約並不合理，你日後若「入會」會更留意邊方面？► 立即投票