過往專欄

花生味辦公室
09/02/2017

上司拒絕加人工 理由嬲到你估唔到!

#上班族 #加人工 #草裙舞 #上司 #OL

  拎完花紅雙糧搵工跳船是常識吧?亦有單身打工仔選擇過埋年,逗埋利是先走。(因為中環人就算同你唔熟,為咗要面,出手都唔會太低,10蚊紙果啲派咗都驚比人唱)順便跳一跳草裙舞,睇吓老闆肯唔肯加你人工。不過,騙徒行兇嘅手法層出不窮,總會搵到理由敷衍你,鬼叫佢個位根本無得輸。 

 

 

  話說有日同事A氣沖沖地從上司房出來,大家的心都驚一驚,以為公司地震炒人。同事溝通後才知道原來是跳舞失敗。

 

  「佢話入房傾兩句,咪諗住開聲睇吓加薪啲事,你拒絕咪拒絕,都比個好啲嘅理由呀!」

 

  「佢點講?」

 

  「佢話我而家個價已經比早幾年同經驗嘅高喎!你攞早幾年嚟比?早幾年買個包$3,而家都買唔番啦!擺明唔抵得人哋賺得多過佢「當年」同年紀啦!」

 

  「係囉,有通脹㗎嘛~咁佢推你嘅理由又是但咗啲嘅……」

 

  「佢仲要話大老闆肯加,叫佢隨時Propose,但係佢唔肯加!啲錢又唔係佢嘅,加咗我哋佢唔會減人工!閘住人哋為乜啫?」

 

 

  所以話最忌女性上司,通常女上司都較男上司小氣、小家、小心眼。賺得多錢過你想當年,又唔得,仲要同下屬講:大老闆肯加㗎,但我覺得你做得未夠好,再努力吓啦!其實咩居心呢?喺咪以為咁樣講,可以令下屬留喺到,推動下屬再做好啲?就算你要拒絕人,都搵個貼地少少的藉口吧,同經驗薪酬多過早幾年,好正常掛?不過,記住,挑機失敗有三樣嘢都絕不能做:

 

  第一,雖然「龍門」任上司擺,絕不可因生氣而失控!既然上司提到大老闆肯加,同事A應該和上司談條件,雙方協議目標,做到有得加;做唔到就再努力啦~但同事A被怒氣遮蔽雙眼,只顧痛罵上司而忘記講條件,咁衝動,唔加你都正常。

 

  第二,自私一點來說,同事A不應將「跳舞」一事公告同事。同事有可能根據你的經歷,準備招數挑戰上司,或者默默在上司面前搏表現,等佢Propose自己比大老闆加人工。萬一同事真的拗贏上司,到時加佢唔加你,就不要四圍唱公司不公平,只是你太多咀。

 

  最後,未睇清楚自己的斤兩。有人認為自己已工作了多年,到了應該加人工的年資。其實,公司從來沒有「應該加人工的年資」,只有「應該加人工的能力」。只要你有能力,就算你唔要求加人工,良心想留人的上司都會主動加你。相反,能力不足卻搲人工?不但令上司對你印象變差,更幫上司釐清思想,知道你有幾「做得嘢」!

  

16/01/2024

土壤論:Right People In The Right Place

#退休 #快樂退休 #職場 #上班族 #辦公室貼士 #土壤論 #退休錦囊

  「土壤論」,我查勻網上,也找不到,但這種定論,在中六時,已在腦中萌芽。

 

  乜意思?正是,一粒種子,放在某一種土壤上,只要正常施肥灌溉,就會茂盛地開花結果;不過,同一粒種子,放到不合適的土壤上,就算正常施肥淋水,卻可能一日內凋萎,又或,無法開花結果,就算有,也是瘦弱不堪,難抵風雨。

 

土壤,對任何植物及人才皆十分重要,關乎生與死!

 

  點解中六時開竅?因會考成績普通,故被一間高水準的名校請離,改報讀一間低水準的普通書院。就此,變「虎入羊群」,個人突然信心飛升,學業成績立時大進。

 

  那年,我開始明白,每個人都有不同天份不同能力,對環境的適應也有所不同,故此,一定要爭取自己落在適當的土壤。

 

  講個真實經歷,1987年某一個晚上,仍在公司處理文件時,收到「敵對」機構老闆電話,劈頭就話:「想約你晚飯,可以嗎?」

 

  當時,我即時反應:「好,請通知時間地點!」

 

  放低電話才知,弊,被上司知道咪死得?竟與對家阿頭單對單晚飯?間諜行為喎!

 

  立即找上司通報,佢笑哈哈大方講:「你咪去囉,呢類邀請,我不時都有啦,即係你有料到呀 !」

 

  準時赴會,對方單刀直入:「阿碌,我想挖你過嚟幫手,人工加一倍,職位在我之下!睇好你,不應只做目前的職位,浪費才華!」

 

  幸而,我早早有「土壤論」的掌握,禮貌回答:「今晚見面,正因仰慕你在業內的過人貢獻,有機會共飯,是項榮耀。不過,自己知自己事,我的能力、喜好及天份,百分百只適合公營機構;事實,也做得很開心,並得到上司賞識,故準備服務終身,絕不考慮轉機構。但無論如何,謝謝你你的賞識及好意。」

 

我自知只適合做不以牟利為目標的公營廣播,商營的「土壤」,絕對不利發揮潛能。

 

  結果?哈哈,這餐飯有點「不歡而散」,因當年這個小子真是「不識抬舉」。

 

  從此,與這位大老闆在任何場合碰見,佢必立時轉身,絕不打招呼。

 

  故事繼續下去,此君終於搵咗另一敝機構猛將加盟。不過⋯⋯未夠半個月已「一拍兩散」。這正是掉到不適當土壤中的惡果。

 

 有土壤也要有栽培者,我的,正是吳錫輝。

 

  今日講此主題,因小弟認識眾多香港名廚,上周有位阿A約見,擺明心緒不寧。

 

  A君乃香港某大飲食集團靈魂,捧場客眾多,老闆錫晒,剛剛又再蟬聯米芝蓮。

 

  突然,對頭大集團老闆約見,拿出空白支票:「我誠意邀請,年薪任開,你填啦。過嚟之後,將再開10間不同品牌店你管!」

 

  小弟一五一十將「土壤論」詳細解釋, 阿A若有所思。究竟決定如何,未知。

 

沈殿霞也是最佳「土壤論」人物,一如不少早年TVB藝人,一過檔亞洲電視,立即黯然失色。

 

  英語有云,想一個人成功,就put the right people in the right place;相反,想佢死,就put the right people in the wrong place!

#食譜 #素食 #數碼營銷 #電影 #移民 #減肥 #創科 #Netflix #外賣 #辦公室貼士 #疫情 #在家運動 #WFH #抗疫不悶 #限聚令 #辦公室求生術
more on etnet.com.hk