按盤價 
《古臣周記》新冠肺炎疫情重挫各地，全球幾乎陷入停工停產嘅經濟停頓狀態，觸發孖屐憂
慮企業債務會唔會出現爆煲。好似早排內房債息抽升，孖屐都擔心好似恆大（０３３３３）呢類
高負債嘅內房股財務情況。不過近排又有報道指，神州有富豪逆市狂掃恆大嘅債券，折算息率達
到１８厘！喺依家低息嘅環境之下，投資呢類高息嘅企業債又好唔好呢？
＊美國債息接近新低，企業債息吸引＊
企業債券係由一啲企業為籌集資金而發行嘅債券，相對國家或政府發行嘅債券，賴債風險相
對高，但風險與回報亦成正比。早排全球冧市，避險資金湧入債市，花旗國十年期國債依家都未
升返上１厘樓上水平，暫報０﹒７０４厘；三十年期嘅息率目前喺１﹒３厘嘅水平。除咗國債之
外，央行發行嘅票據都係另一種比較穩定嘅定息產品，特點係較短期，旨在收緊銀行貸款銀根，
而上星期央媽喺香江發行嘅半年期百億票據，中標利率為２﹒１９厘，但呢類債券主要由銀行機
構或基金等認購。
企業債嘅利率就相對吸引，一般投資者都可以買入。好似一款蘋果公司２０２７年６月到期
嘅債券，每半年派息一次，年息有３厘；投資評級喺穆迪嘅Ａａ１級，屬於高素質嘅債券，所以
風險較低，入場費最低只需要２０００美金。另外，內房佬嘅債券息率都幾高，不過佢地發行嘅
優先票據（係企業債嘅一種，對比次級票據有較高嘅債還優次）一般向機構發行。以恆大今年１
月發行嘅２０億美金於２０２２年到期嘅優先票據為例，年息達１１﹒５厘。
＊非投資級別企業風險高，債價波動＊
講到呢度可能大家都會問，依家全球經濟陷入衰退風險增加，買企業債穩唔穩陣架？據機構
Ｄｅａｌｏｇｉｃ嘅數據顯示，今年３月至今，企業發行「投資級別」嘅公司債總金額達到
２４４０億美金，創下舊年９月以來單月最高紀錄，而且平均息率都由２﹒２６厘抽升至
３﹒９厘。當中就連股神巴菲特旗下巴郡亦要喺３月兩度發債。咁樣抽水法，一啲評級較低嘅企
業債就更難有孖屐，所以過去近一個月，歐美都無發行呢類評級低高收益嘅債。一旦企業無能力
發債，就要面對債務爆煲危機。
投資級同非投資級債券嘅分別，在於佢地所獲嘅信用評級，以評級機構穆迪嘅標準來睇，由
Ａａａ至Ｂａａ３級別為投資級，而Ｂａ至Ｃ級就算係非投資級，有較高嘅違約風險。日前穆迪
就將６﹒６萬億美金嘅花旗國非金融企業債務評級展望由穩定降為負面，又將六間神州區域性錢
莊嘅評級展望由穩定下調為負面。花旗國聯儲局經濟師仲話，全國失業率或升至三成二，喺疫情
對經濟嘅影響仲未明朗之下，穩陣起見都係買啲超大型機構發行嘅投資級別債券好啲，雖然息率
只有３、４厘，但勝在回報同前景都穩定！
＊二手買賣，部分入場門檻廿萬美金＊
最後都講埋點樣買賣債券。除咗可經由企業公開發售時按指定認購價買入，缸友亦可以喺二
手孖屐買入。如果債券已經喺交易所上市，就同平時買賣股票一樣咁操作，如果無上市就可以透
過錢莊或者經紀行喺二手孖屐買，債價會按需求而有變動。除咗長揸收息之外，亦可以中途落車
賺差價。另外，唔少企業債嘅入場門檻都比較高，例如需要２０萬美金，所以缸友亦可考慮小注
投資一啲債券基金。
＊賣出中華煤氣止蝕，買入三一國際＊
上星期中華煤氣（００００３）業績同派息政策令阿臣相當失望，所以ｓｅｔ?股價彈到
１３銀就止蝕，今朝（１日）已經到價，所以阿臣就沽出手上嗰手煤氣。同時，趁孖屐氣氛略為
改善，阿臣都開始買股，上月有一期阿臣有同大家分析過基建佬，但當中更睇好啲重型機械佬，
亦相信阿爺嚟緊會繼續沽基建同房產孖屐，再加上重汽銷售旺季延遲至第二季，所以趁上次推薦
過嘅龍頭三一國際（００６３１）回調之際，今朝以開市價４﹒１１銀買入兩手作中短線部署。
表列截至４月１日（上午１１：１５時止）阿臣投資組合表現：
股份 股數 平均買入價（元） 現價（元） 總值（元）
－－－－－－－－－－－－－－－－－－－－－－－－－－－－－－－－－－－－－－－－
港股：
ＳＰＤＲ金ＥＴＦ １０股 １０９７﹒００ １１５６﹒００ １１５６０
平安好醫生 ５００股 ５２﹒９０ ７４﹒１５ ３７２５０
阿里巴巴 １００股 １７６﹒００ １８７﹒００ １８７００
微盟集團 ２０００股 ４﹒５５ ５﹒０７ １０１４０
三一國際 ２０００股 ４﹒１１ ４﹒１１ ８２２０
賣出
煤氣 １０００股 １６﹒００ １３﹒００ １３０００
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ８５８７０元
剩餘現金 ： ９７７５７元
組合淨值 ： １８３６２７元
組合本月收益表現： ＋ ０﹒９％（截至上月底止組合淨值：１８１９８７元）
組合累計收益表現： ＋７４﹒９％（本金１０５０００元計）（２０１６年８月開倉）
＊數據截至今日上午１１：１５ａｍ
全新節目《說說心理話》如何搞好家庭關係？關係破裂幾時要放手？修補關係切忌讓XX充昏頭腦！► 即睇
