《古臣周記－古臣》全球股市風起雲湧，點樣打理好ＭＰＦ？

　　《古臣周記》據香江積金局公布，２０１９年強積金（ＭＰＦ）嘅年度淨回報為１２﹒２巴
仙，其中股票基金同混合資產基金嘅表現最好，分別有成１６﹒７巴仙及１４﹒７巴仙嘅回報。
不過，由今年年初起新冠疫情就逐漸擴散到全球，仲搞到全球股市大跌，各地投資者一齊上映
「要錢唔要貨」，其他嘅資產都被一一拋售，一眾打工仔嘅ＭＰＦ可以話劫數難逃。喺依個時候
又應該點樣部署你嘅ＭＰＦ戶口？又應唔應該急急腳全部「換馬」輸少當贏？

＊首季強積金料蝕約１３巴仙＊

　　據晨星統計，截止３月１７日，首季ＭＰＦ平均回報跌１２﹒９巴仙，如果按上年ＭＰＦ總
資產值９６９４﹒５５億銀同一共４３６﹒５萬位成員計，平均每人蝕２８６５０銀。如果以單
月計，ＭＰＦ平均蝕９﹒４９巴仙，人均虧損約２１０７７銀。即係２０２０年首季就已經將上
年全年嘅回報全部蝕晒。喺晨星嘅報告入面提到，回報率大跌主要受到股票基金拖累，其中首季
股票基金平均下跌２０﹒８巴仙，最多人揀嘅香江股票基金跌１７巴仙，神州及大中華股票基金
就跌１５﹒９巴仙，花旗國股市基金瀉２２﹒５巴仙，而最慘烈嘅莫過於歐洲股票基金直插
３１﹒７巴仙。雖然喺依個時期可以話買乜都會跌，但港元債券基金反而成為逆市奇葩，平均仲
可以升到２﹒３巴仙。阿臣相信睇到依到，有唔少人都心思思想「換馬」去債券基金，不過大家
唔使急住，先考慮埋自己投資策略再作定論。

＊ＭＰＦ要長線持有不似炒股＊

　　現時ＭＰＦ可以分５大類，按風險由高至低排列為股票基金、混合資產基金、債券基金、保
證基金及強積金保守基金。不過因為風險同回報成反比，所以有唔少人都會選擇股票基金，因此
喺今次全球打跌市下都會傷得更重。今次疫情同以往嘅金融危機唔同，疫情對全球經濟活動嘅影
響更大，各國為咗防疫都採取鎖國政策，且到目前仍未見到疫情受控嘅跡象，相信要恢復正常要
需要一段時間。因此，就開始有缸友被嚇到，想即刻「換馬」，但係有專家指ＭＰＦ嘅平均成本
法喺長時間才能發揮效用，建議要保持長線投資策略，畢竟你嘅ＭＰＦ係揸到你６５歲退休。另
外，有一部分前瞻型嘅缸友已經喺早前美股屢破頂時「換馬」，宜家再考慮「換馬」，或已經錯
過時機，不如繼續放住等股市反彈。
　　除咗時機之外，都仲要睇個人承受風險嘅能力，專家普偏認為，愈年輕風險承受能力愈強。
因為對於年輕人嚟講就算今年賺少咗或者蝕咗，未來仲有好幾十年時間追返，但都建議要平衡風
險，最好嘅股債比例分六四或七三，如果依家有過多比例喺股票，可以趁股市回穩再轉。但對於
５０歲以上即將退休嘅人士，就建議採取保守攻略，可以將大部分放去保守基金或保證基金。

＊低息環境，債券投資吸引大＊

　　因為近期股市大跌，各國政府同央行都紛紛出招撐市，當中花旗國聯儲局本月已經兩次緊急
減息，將聯邦利率下調至接近０，近日更是宣布實行無限ＱＥ，只可惜花旗國股市並沒有因此舉
而止跌，股市波動嘅負面因素依然存在。但就因為依個狀況，好多國家嘅央行已經大幅下調利率
，現時全球正處於一個較為低息嘅環境，加上利率同債券價格係呈反向關係，利率愈低債券價格
逾升。因此債券基金可以喺從多ＭＰＦ嘅投資組合入面成為逆市奇葩，將資金放入債券避險都係
一個好選擇。可能就有人擔心就算係投資債券都會有機會出現債市爆煲嘅情況。阿臣就翻閱咗積
金局嘅資料，佢對於債券基金係要求購買投資級別或以上，風險比零售低嘅債券，所以極少機會
會遇到垃圾債券，可以放心投資。不過，現時嘅低息環境未知將會持續幾耐，所以阿臣都唔建議
１００巴仙投資落債券，同時要留意各國央行嘅貨幣政策，利率上升就要相對減少債券比重。

＊煤氣削送紅股前景保守，待時機離場＊

　　近日煤氣（００００３）公布全年業績，結果真係令阿臣有些少失望，竟然將持續咗好多年
十送一嘅傳統變成廿送一，績後就裂口低開失守１４銀關口，之後一度跌穿１２蚊。從業績睇，
上年純利係十年來最差，加上近期油價大跌對天然氣需求有衝擊，阿臣對其前景有保留。不過，
近期港股有技術反彈跡象，待其股價彈至１３銀附近止蝕離場，至於其他股份暫按兵不動。

　表列截至３月２５日（上午１１：１５時止）阿臣投資組合表現：
　
　股份　　　　　　股數　　　　　平均買入價（元）　　　現價（元）　　　總值（元）
　－－－－－－－－－－－－－－－－－－－－－－－－－－－－－－－－－－－－－－－－
　港股：　
　煤氣　　　　　　１０００股　　　１６﹒００　　　　１２﹒５０　　　　１２５００
　ＳＰＤＲ金ＥＴＦ　　１０股　１０９７﹒００　　１１８０﹒００　　　　１１８００
　平安好醫生　　　　５００股　　　５２﹒９０　　　　６４﹒６０　　　　３２３００
　阿里巴巴　　　　　１００股　　１７６﹒００　　　１７９﹒１０　　　　１７９１０
　微盟集團　　　　２０００股　　　　４﹒５５　　　　　４﹒９７　　　　　９９４０
　－－－－－－－－－－－－－－－－－－－－－－－－－－－－－－－－－－－－－－－－
　股票市值　　　　：　　　８４４５０元
　剩餘現金　　　　：　　　９３０９７元
　組合淨值　　　　：　　１７７５４７元
　組合本月收益表現：　　－　５﹒８％（截至上月底止組合淨值：１８８５６５元）
　組合累計收益表現：　　＋６９﹒１％（本金１０５０００元計）（２０１６年８月開倉）
　
　＊數據截至今日上午１１：１５ａｍ