《經濟不停學》LPR？MLF？神州金融術語大解構！

　　留意開神州經濟，成日都會睇到「LPR下降30點子」、「央行展開千億元MLF操作」，究竟佢地講緊乜？而LPR同MLF對市場有乜影響，今日同大家解釋下啦！

（Shutterstock圖片)

央媽做財仔，透過MLF放數畀銀行

（Shutterstock圖片)

　　前人行行長周小川成日都話，神州有好多「小工具」應對貨幣問題，其中一個就喺MLF（中期借貸便利），係央媽向市場放水嘅其中一種方式。央媽會向商業銀行、政策性銀行以質押形式放貸，貸款期至少三個月，可以續期。為咗吸引銀行借錢，一般MLF利率都會比較優惠。不過，央媽都會驚「債仔」還唔起錢，所以銀行要提供一啲優質嘅債券做抵押，例如國債、央行票據同高等級信用債等。

　　MLF我地可以稱為「長錢」，如果市場注入嘅資金多過收回嘅資金，可以解讀為央媽向市場「放水」，而由於呢種操作最少三個月，甚至半年、一年都有，所以對股票市場有正面作用。

逆回購要睇實淨投放定回籠，股市升跌睇佢頭！

（Shutterstock圖片)

　　講完「長錢」就梗係講「短錢」，央媽每日股市開市前都會公布當日有無「逆回購操作」。咩係逆回購？其實就係央媽向商業銀行買入短期債券，從而透過銀行體系為市場注入資金；正回購就相反，央媽向商業銀行賣出短期債，令資金回籠。

　　回購操作通常時效性好短，操作期限得7日、14日、28日，純粹方面央媽操控市場流動性。央媽每日投放幾多資金喺市場固然重要，但都要睇佢有幾多資金回籠更重要！假如今日投放300億元7日逆回購，但有1300逆回購到期，即係市場被抽走1000億元。所以逆回購究竟係淨投放定淨回籠，都有機會影響股市表現！

LPR借錢定買樓都要睇實，等同香港「最優惠利率」.

（Shutterstock圖片)

　　至於LPR（貸款市場報價利率），簡單嚟講其實等同香江嘅「最優惠利率」，銀行會根據LPR對信用借貸良好嘅客戶給予最優惠借貸。呢個利率嘅組成，係由神州18間銀行報價，唔要最高最低價，然後按平均計，取0.05%為整數而得出結果，喺每個月20號公布。而我哋聽到嘅LPR下降「10點子」，即代表LPR下降百分之0﹒1，跌得越多就代表借貸成本越平。　

　　不過，實際貸款利率係幾多？係根據「LRP+基點」嘅形式報出，。簡單嚟講，我哋可以將MLF利率當做銀行由央媽得到資金嘅成本，而LPR基點加幅就取決於各銀行本身嘅資金成本、市場供求等因素，關乎銀行的息差利潤。

知道咗咩叫ＭＬＦ同ＬＰＲ，咁又關我咩事先？

（Shutterstock圖片)

　　事實上，當MLF利率下調，銀行貸款利率就有好大機會跟著向下，企業融資、個人按揭成本亦會相應降低。理論上企業可以加大投資、請多啲人，個人可以多啲閒錢消費，一環扣一環咁推動成個神州經濟！

　　微觀啲睇，其實利率最影響嘅係內銀同內房，因為銀行主要收入來源係息差；利率上升就梗係銀行有錢賺，但利率越低就會令放貸成本降低，銀行就苦過弟弟；另一方面，市場放水理論上會令房地產需求多咗，同樣利好內房股，不過中央近幾年都好強調「房住不炒」，所以喺咪炒得上就見仁見智。

撰文：吳藹林

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G

全新節目《說說心理話》青少年不可以戀愛！？真實個案講述驚心動魄經歷► 即睇