學者股神分享贏家心法、理財攻守道

　　一個是經濟學家，一個是市場學教授，兩位學者專長範疇不同，卻不約而同愛買股票，投資時不忘融入經濟學或市場學角度揀股。策略不同，但均是贏家。

　

　　經常為本港經濟和樓市把脈的經濟學者關焯照，十年前放下中文大學教職，自立門戶搞智庫研究工作外，閒來愛炒外匯期指，股票則獨愛細股，屬謂全攻型投資者。專訪中，他細數曾高沽大賺、炒得最爽的兩隻細股，教路揀股要從上而下，先揀板塊，再揀龍頭股。來到2019年，關焯照無奈說：「冇乜嘢好買」，但給港股民一個忠言：「升市個個都係高手，跌市先考你係咪高手。」

　

　　香港恒生大學商學院副院長梁劍平，對穩陣藍籌股情有獨鍾。去年港股陷入熊市，無數散戶損手爛腳，他卻憑著重倉中華煤氣（00003）成功跑贏大市，近3年其股票組合年均賺兩成。投資前先求知，梁劍平例必翻開公司年報，閱讀財務報表，對公司業務了然於胸，其紮實的基本分析、嚴謹的研究態度值得學習。

　

　　2018年港股步入熊市，2019年剛開始，港股民可否從中偷師？又應如何部署？今期專訪兩位學者股神，分享由學者到股壇贏家的心法，教授港人理財攻守道。

　　

經濟學者關焯照 愛買細股 擅捕高位沽貨

　

　　作為經濟學者，又為本港公共事務和房屋策略出謀獻計的關焯照，在過去廿多年，不論是評論香港經濟抑或樓市前景均分析獨到，但其實他的身分又豈只經濟學者咁簡單，要不然，近年也不會自立門戶，成立智庫機構做投資研究工作。

　

關焯照有一套揀股攻略「先揀板塊，後揀龍頭股」。

　

關焯照

　

57歲

現為冠域商業及經濟研究中心主任

學歷：

‧加拿大康克迪亞大學經濟學士、碩士、博士

經歷：

‧曾於加拿大勞瑞爾大學及康克迪亞大學任教

‧1995年－2009年香港中文大學經濟系副教授兼任中大學生生活研究中心主任

‧2005年－香港政府公共事務論壇成員

‧2012年－長遠房屋策略督導委員會委員

‧2013年－成立冠域商業及經濟研究中心

　

　　上月中旬訪問當天，人稱「關Sir」的關焯照剛從外回到佐敦的辦公室，即打開電視「睇住個市」，看看恒指高開定低開。講起個人炒股經歷，關Sir說是30年前的「87股災」前夕，還老實地說買完後兩日就爆煲，但當時卻不懂止蝕。

　

港股特色 較多散戶

　

　　1987年，在加拿大的關Sir正修讀經濟又兼職教書，買股票經驗是零，一心諗住買銀行股會較穩陣，怎料自己睇漏了個「W」字。「嗰時心血來潮，住滿地可（Montreal）咪買Bank of Montreal囉，嗰時周街都有人講股票，因股票已炒得好高，在沒有做功課下，諗住買隻安全的（銀行股），但睇唔到有個W喺度，唔知係窩輪，爆煲兩日之前買，跟住就衰咗，仲唔識去止蝕，等一年後到期，好似剩番幾毫子俾番我。」

　

　　關Sir當年一年兼職教4科，首次投資已令他損失教2科的薪金，幸好年輕輸得起，蝕了就當交學費。由加拿大回流返港後，關Sir在中大任教，閒時投資外匯，當時有朋友叫他嘗試炒港股。在加拿大首次入市是「87股災」前夕，事有湊巧，在港首次入市則是1997年金融風暴前兩三個月，幸而今次「走得甩」，兼且有不錯回報。

　

　　「嗰時自己連國企紅籌都唔熟，嗰時係鬥快（揸沽）。當投資係1蚊，嗰兩三個月都有三四成回報，以一個唔係好熟市場，對只玩過外匯、輸過一次（股票）的人嚟講算唔錯。後來見教授的太太都坐喺證券行炒股，自己都Sense到爆爆地，咪減少（買入）囉，於是避咗一劫。」2000年和2007年的股票市場都被炒上後爆煲，關Sir慶幸兩次都能及時抽身。

　

　　「因我係炒外匯開始，感覺係強好多。外匯係對住全世界高手嚟玩，係好難賺錢的，所以在外匯賺到錢的人，入到股票市場真係踩低晒啲人。香港股票市場特色係散戶多，（大多數）都係渣的，零和遊戲吖嘛，即係好似打麻將咁，大部分係渣的，你埋去打係OK的。」關Sir指自己跟絕頂炒股高手當然無得比，但本身對數字和股票市場的敏感度，是他比人強的優勢。

　

剎那鬆懈 造成大蝕

　

　　至於賺得最多百分比的，要數10多年曾買入的文化傳信（00343）和中國水務（00855），前者一個月炒5次，賺了5倍；後者在0.5元買入於當時高位5元沽出，大賺9倍。「文傳呢一戰炒得好爽，撞正佢咁走法，波幅大，我先賺到咁多，如單由5毫變1蚊，我就賺唔到。」

　

　　另話說買入中國水務則有段故，因關Sir看到中國的污水問題，覺得在內地做水管有著數，於是入市揸貨。「從投資角度看，如果中國水務揸到依家，升咗十幾倍，由0.5元（最高）曾升上10蚊，計埋息，升廿幾倍，有冇一個股票13年內賺廿幾倍?我就係鍾意買呢啲有前途的公司，咁呢啲就要去發掘！」至於實際賺幾多？關Sir笑言不想透露，但總括股壇包括買賣期指逾廿載戰績，當然是賺錢，否則也不會離開大學教職而自立門戶。

　

　　不過，喜歡買細股的他，也試過買了一隻不應該買的股。幾年前，關Sir眼見前稱中國家居、現改名神舟航天樂園（00692）的股票短綫移動，於是在0.9元價位買入，原本升上1.1元，但沒有沽貨，後來跌至只剩幾兩毫子。「最差係出去食餐飯時冇落止蝕盤，跌到0.5元都冇斬倉，跌到毫幾子跟住停牌後彈反上0.2元。對我嚟講係一個唔應該犯的錯，連我都有一剎那的鬆懈，平時一早已交晒盤Cut咗，食完餐飯跌咗四成諗住等反彈，但原來冇得反彈，哈哈，你諗吓我蝕幾多，蝕咗六成！」當時還氣得他曾在報章說過：「以後也不會推介這股！」

　

鎖定板塊 直揀龍頭

　

　　自2000年一戰後，關Sir關始轉玩期指，個別股票只會買少少，但指：「近幾個月冇嘢好買」，目前手上只持有一隻網購股，記者隨即猜說某股後，關Sir即叮囑記者不要寫出「冧把」來，但對於為何看好這隻股，他卻滔滔不絕，原因是看到慢慢有盈利增加。他分析：「由蝕變賺的股票，佢的爆升能力好高。」但坦言：「你要等佢囉！」他不想說出股票冧把，但呼之欲出。

　

　　事實上，關Sir是首批推介藥股、睇好零售股反彈的經濟學者，他亦不諱言揀股是會視乎整個市的氣氛，但其揀股策略未必個個鍾意。「我係睇板塊和整個宏觀氣候，唔係揀一隻股嚟做嘢，當鎖定板塊，我就揀龍頭，費事諗咁多，走慢啲冇所謂，但都會升好多。」經濟學者出身的他，揀股自然融入經濟學，完全由上而下去看，絕對不會由下而上，逐隻股去睇。

　

　　但關Sir提醒股民，現時炒股難度比以前高好多，皆因香港股票市場已滲入許多雜質，亦有不少「蛇蟲鼠蟻」，由於太多人影響股市表現，根本很難反映到真正市況。「如果識玩指數的人，會玩得好開心，因好多波幅，會捉到路。」所以他喜歡玩期指。

　

　　「其實呢年做逆向就正，但逆向好難，散戶係鍾意買唔鍾意沽，我做期指的人沽揸都冇所謂，最緊要係持續，股票嚟講今年大家要小心，長揸我唔係好信，如匯豐（00005）唔可以長揸，都返唔到家鄉，長揸肯定死，（預料）今年會跌破60元，低見55元，收息只係自己呃自己。如收息應搵兩電或房託收息，但就要揀邊啲房託。」正如關Sir所說，他自己是一個鍾意刺激的人，喜歡玩期指和發掘中小型股，所以長揸股票並不是他那杯茶。

　

點評2019年 5大板塊股票優劣

　

　中電（00002）和港燈（02638）

　

　　點評：「由於屬壟斷性，又重新簽訂為期15年的《管制計劃協議》，即代表兩電唔會被人踢走。外國電力市場本身唔係咁好賺，但香港電力市場好好賺，係政府養肥佢地。兩電已升好多，雖不會大升，但勁衰的經濟呢啲股一定唔會變牆紙。」

　

　匯豐（00005）

　

　

　　點評：「匯豐唔可以長揸，長揸肯定死，2019年會跌破60元，見55元，貪收息只係自己呃自己。」

　

　網購股

　

　

　　點評：「發掘網購股因是一隻慢慢看到盈利增加的股，由蝕變賺的股票，它的爆升能力好高。但要等升！」

　

　快餐股

　

　

　　點評：「經濟增長慢，消費者消費要夠經濟，快餐股OK。」

　

　零售股

　

　

　　點評：「內地人花錢的人均消費低晒，零售股千祈唔好掂。」

 

etnet榮獲HKEX Awards 2023 「最佳表現證券數據供應商」大獎► 了解詳情