RSS訂閱 《笑傲缸湖》話說中美關係由幾年前傾到依家都係五時花六時變，今朝盈盈又比花旗國出嘅
消息嚇親，事關今朝突然爆出白宮貿易顧問納瓦羅話同神州嘅貿協已經玩完！盈盈心諗傾咗咁耐
，一句就話完？之不過今次侵侵就好快手回應，話個貿協仲「全面」有效咁話喎，成個頭盔凹到
實一實，完全唔似佢嘅作風！
其實睇到近期侵侵對神州嘅發言收哂火，已經無喺全盛時期咁進擊！睇嚟好大機會喺因為侵
侵到依家都仲喺周身蟻，唔得閒理貿協！事關有唔少花旗國民覺得佢解決肺炎疫情、種族歧視同
警察暴力問題不力，搞到佢失哂民心。睇返當地財經網站ＣＮＢ做嘅民調顯示，大選嘅六個搖擺
州，包括亞歷桑納州、佛羅里達州、密西根州等等，前總統參選人拜登嘅得票率全部跑贏侵仔，
都估到佢有幾愁。於是佢就搞咗個集會造勢拉票啦，報名人數相當可觀，侵侵助選團競選經理Ｂ
ｒａｄ Ｐａｒｓｃａｌｅ同埋侵侵都好開心咁公開講過個集會門票超過１００萬張申請，地方
官員仲諗住有１０萬人因為無飛入唔到場，喺附近聚集。點知一開Ｓｈｏｗ只有６２００人到場
，入座率連三分之一都唔夠！有報道話，網上有人號召後生仔預訂門票後唔出席，令到集會出現
大量吉位，打擊下侵侵人氣喎。
競選團隊自然例牌否認啦，話已不斷剔走虛假手機號碼，以正確計算參加人數，仲話係因為
傳媒製造假新聞，令支持者擔心疫情同反對種族歧視示威而唔出席集會。不過面對第一場Ｓｈｏ
ｗ咁差嘅成績，你以為侵侵會就咁算？已經有風吹緊話佢要清算競選陣營！更喺印證咗從古至今
嘅真理，就喺得罪老細喺唔會有運行。就喺早幾個星期侵侵已經幫競選團密密執位，不但急ｃａ
ｌｌ上次競選負責溝通工作嘅Ｊａｓｏｎ Ｍｉｌｌｅｒ幫手，仲請咗做過高級政治顧問同２０
１６助選人員嘅Ｂｉｌｌ Ｓｔｅｐｉｅｎ做競選副經理，同喺２０１６年做侵侵陣營搖擺州負
責人嘅Ｓｔｅｐｈａｎｉｅ Ａｌｅｘａｎｄｅｒ做幕僚長。咁執法都睇得出侵侵對贏出今次大
選嘅決心！始終佢近期都要處理唔同議題，要贏番花旗國民嘅心喺有啲難度架啦！正所謂伴「侵
」如伴虎，至於競選經理阿Ｂｒａｄ嘅命運啦喎，盈盈諗佢都係自求多福算啦！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
