RSS訂閱 《笑傲缸湖》農曆新年到，盈盈荷包又空空，都唔知點解明明唔大使，每逄大時大節硬係荷
包缺水，係咪人工太低呢？應該﹒﹒﹒﹒﹒﹒唔關事。不過，樂施會畀咗個更好嘅答案，就係貧
富懸殊啦。
話說全球政界同商界領袖今個星期三（２２日）起就會齊集瑞士出席年度達沃斯經濟論壇，
探討下環境風險、貧富差距咁啦，國際樂施會（Ｏｘｆａｍ）就好有心機，喺論壇開幕前夕發表
報告，話過去１０年全世界億萬富豪嘅人數增加咗一倍，囊括全球６０巴仙財富，單係喺上年
２１５３個億萬富翁所擁有嘅財富，比全球最窮４６億嘅人加埋更多！好老實講，盈盈真係想像
唔到果２０００幾個億萬富豪平時係點生活，就算屋企啲廁紙鑲金呀，使１０世都使唔完啦！
就喺樂施會報告刊出之際，全球首富排名有變，ＬＶＭＨ嘅ＣＥＯ貝爾納﹒阿爾諾，超過
Ａｍａｚｏｎ（亞馬遜）嘅ＣＥＯ貝索斯，成為全球第一有錢人，兩人身家分別有１１６５億美
金同１１５６億美金。
不過，全球最窮嘅４６億人嘅生活就好容易想像到，不外乎無餐飽飯食，又無書讀啦。而今
次國際樂施會帶咗個新觀點嚟睇貧富懸殊，就係性別差距啦，原本世界上最有錢果２２個男人，
佢哋擁有嘅財富超過晒所有非洲女性。而全球嘅女人每日要做１２５億個鐘嘅ｎｏ ｐａｙ
ｗｏｒｋ，啫係湊下小朋友、照顧下老人家果啲，估計成年佢哋可以幫世界帶嚟１０﹒８萬億美
金，啫係足足８４﹒２萬億港紙嘅經濟貢獻。但係佢哋普遍只有好少機會得到教育同埋喺社會發
展上有發言權，所以咪困咗喺經濟體嘅底層囉。而全球有成４２巴仙嘅婦女因為要照護家人唔可
以做嘢，男性只得６巴仙，情況真係實在懸殊得恐怖呀。
事實就擺在眼前，國際樂施會都唔係齋ｔａｌｋ㗎，佢提咗幾個建議，例如政府要投資喺跨
政府嘅國家護理系統，改善基礎設施、打擊稅制漏洞，唔畀啲有錢佬逃稅咁。盈盈希望各國政府
會聽入耳啦，因為呢個世界淨係畀一小撮人玩晒，就唔好玩㗎啦。少啲貧窮人口，呢個世界就發
展得更加精彩、多元。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
