RSS訂閱 《笑傲缸湖》話說今日盈盈拉埋同事一齊ｌｕｎｃｈ，隔離明仔俾份公司通告我睇，然後話
：「機會嚟啦飛雲！盈盈你快去參加啦！」
我仲以為明仔叫我參選港姐。原來，中軟國際（００３５４）今日出份通告，表明向「香江
籍」嘅學生，開放深圳地區１００多個「煙腸位」（實習生），包括３６個人工智慧崗位，３８
個區塊鏈崗位同３３個海灣合作組織崗位，仲話會有人工、交通、住宿補貼同埋有配備實習導師
。
盈盈我一早脫離做「煙腸」嘅年齡，不過香江而家都七國咁亂，仲有幾多人會真係返去深圳
發展？盈盈就好有保留啦。其實盈盈之前都見過啲中資企業係香江搵「煙腸」，但聽聞都係搵返
啲香江讀書但講「煲冬瓜」嘅人士，其實咪又係搵返自己人？但無可否認，做雲業務同埋區塊鏈
，喺神州確實有好多「餐士」，加上國策帶動，如果想認真掘金係唔錯嘅選擇。
講起「煙腸」，個個都以為佢地做埋啲濕碎嘢、印下文件就算，而且人工低，咪當請個兼職
。但早幾年係花旗國，ＩＴ行業反而高價搶「煙腸」，因為呢一行好缺工程師寫程式，包括社交
媒體同金融業都想搶人，當中開價最高就係臉書，係２０１７年用８０００美金月薪請人，約六
萬二港紙，呢個價幾乎係花旗國年薪中位數嘅兩倍。
啦，要做臉書嘅煙腸，要有乜條件呢？首先要係持有電腦科學或相關學位，其次要有
Ｃ＋＋同Ｊａｖａ經驗，有部分職位仲要識Ｐｙｔｈｏｎ、Ｐｅｒｌ、ＳＱＬ之類嘅。其實未來
都係電腦嘅時代，無論係返大灣區定去花旗國做高薪「煙腸」，都要學電腦程式，盈盈睇嚟都要
放棄再練長短雙劍，改行寫「長短倉程式」好過啦！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
