RSS訂閱 大家知唔知迪士尼ＣＥＯ艾格（Ｂｏｂ Ｉｇｅｒ）曾經都係蘋果公司嘅董事呢？不過唔知又唔緊要，因為今個月１０號，艾格就已經辭咗蘋果董事一職，原因係迪士尼同蘋果之後，喺串流媒體業務會係好大嘅競爭對手。
其實，迪士尼同蘋果有一段故仔好值得講下。咁就要由艾格喺２００５年做咗迪士尼嘅ＣＥＯ之後講起，因為佢一直深信迪士尼如果同蘋果合作一定可以好成功。不過，由於之前，蘋果教主喬布斯（Ｓｔｅｖｅ Ｊｏｂｓ）同迪士尼之前個ＣＥＯ有牙齒印，所以兩公司合作一直傾唔掂，但喺艾格之後就好有耐心咁同喬教主解釋，關於日後人類睇電視嘅模式會轉變等等，激發咗當時整緊Ｖｉｄｅｏ ｉＰｏｄ嘅喬布斯，自此好欣賞艾格！所以喺２００６年迪士尼以７４億美金成功收購咗本來屬於蘋果嘅Ｐｉｘａｒ，之後喬布斯仲做埋迪士尼嘅董事添！
佢哋兩個自此就有咗好深嘅關係，唔單上喺商業上，更喺友情上！不過，好遺憾喺喬布斯喺２０１１年拋低咗老友乘鶴西去。對於艾格嚟講無疑喺個好大嘅打擊，而喺佢最新嘅自傳裡面都提到，如果喬教主無喺２０１１年去世，佢就會同討論蘋果同迪士尼合併嘅問題。而呢個問題依家都無得再成真！雖然上年就有消息話，蘋果計劃將２５００億美金嘅海外現金回流返花旗國，有人就估蘋果想收購Ｎｅｔｆｌｉｘ同迪士尼，因為蘋果喺２０１７年搞原創劇集製作，過程都唔太順利。而且蘋果對於串流媒體領域都無太多經驗，所以外界都覺得收購迪士尼同Ｎｅｔｆｌｉｘ喺最快嘅成功之道！
不過，依家蘋果想收購迪士尼已經太遲，因為迪士尼市值已經２４６０億美金，蘋果市值都超過１萬億美金，咁巨頭嘅合併唔使講會被反壟斷部門反對，所以可以相信，艾格喺有生之年都唔會見到佢哋合併喇！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
