RSS訂閱 幾時都話，有錢人嘅世界好難明，難明並唔係話佢地洗錢幾咁瘋狂，而係點解佢地洗極都仲有咁多錢，開外掛都無咁誇張。
話說全球第二有錢嘅蓋茨，佢旗下一直都ＲＵＮ緊一個慈善基金會，幫助落後地區嘅小朋友等等。喺１９９４至２０１８年期間，蓋茨已經頭頭尾尾科咗高達３５０億美金（約２７３０億港紙）嘅水入呢個基金會。不過，蓋茨身家好似無少過咁，今年佢份身家又升多１６０億美金（約１２４０億港紙），總財產達１０６０億美金（約８２６８億港元）。
盈盈記得，好耐之前有計過，蓋茨每秒賺近３００美金，一日就賺２５９２萬美金，你睇，講完呢幾句佢又賺啦！不過，又咁講，佢份身家好多時候都係計埋佢持有嘅股票，其實都係帳面身家，成日都會變大變小，計呢種數都係貪得意拎吓Ｇｉｍｍｉｃｋ咁解。
蓋茨自己之前都講，其實佢本身都話唔會點樣太過進取，當中６０％都係股票為主，其餘大部分都係現金，意味有６００億美金係放向基金或者股票入面，但咁都話唔太進取？因為據美國一啲公司嘅統計，美國普遍呢類家族基金最多都係放三成二嘅錢落股票，其他買下樓啊、債券之類，從而分散風險。
一般情況下，有錢佬梗係買下政府債啦，穩定有息收幾和味！但蓋茨就話撐自己人，睇好美國企業，所以先入市股票市場，佢又舉例，１０年期美國國債長期低於２巴仙收益率，所以基本上大部分投資產品都係差唔多，咁不如買股票。但有基金經理警告，蓋茨咁樣買股票，唔代表你都可以咁買，畢竟投資存在風險，而且佢個資本同你資本差咁遠，都係參考吓好啦！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
