《笑傲缸湖》七夕香江靜蠅蠅，寶島鐵鳥多優惠

　　唔講唔知，原來今日（２０日）係七夕「東方情人節」。本地商家係２月１４日西方情人節就鋪天蓋地宣傳，又有套餐又推酒店住宿折扣，鼓吹消費話要送花買禮物，七姐誕反而唔多理，但寶島就完全唔同。
　　大好商機，寶島鐵鳥當然摻一腳，虎航就推出促銷活動，桃園或者高雄到馬交兩條航線回程免費，消費者只需要畀機場稅同訂位服務費，就可以係１０月到出年１月中享受優惠，食正馬交第四季舉辦格蘭披治大賽車、音樂節同美食節條水。
　　華航都唔執輸，同寶島兩性關係名人張兆志合作，搞個「空中愛情診療室」，幫情人解決旅遊疑難雜症咁話。參加抽獎仲有機會贏得網上購票減價優惠，同去峇里島嘅來回機票。
　　睇返香江就靜嚶嚶，似乎冇乜節日氣氛，可能大家都比較西化啦。但計盈盈話，愛情係講心唔講金嘅，兩情相悅就日日都係情人節。祝各位天下有情人，終成眷屬！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。