RSS訂閱 前幾日神州網上就流傳一份河北省懷來縣政府有關廢除限購政策嘅消息，之後獲懷來縣住建局人士證實，當地住房限購政策已經廢止。憧憬神州其他政府會跟風取消限購令，今日神州磚頭佬齊齊彈起，博客認為呢次可能係磚頭佬追落後潮嘅開始，打算作中短線部署嘅缸友不妨留意下綠城中國（０３９００）。
除咗上面流傳嘅舊聞，近日標準普爾就表示，喺疫情影響下，今年首五個月神州房地產銷售額按年下跌８巴仙，不過睇返５月嘅銷售數據，前十二大內房平均銷售額按年增長超一成，反映行業復蘇現正步入正軌。下半年原本就係房地產銷售旺季，不過要留意疫情是否再爆發第二波。
此外，綠城中國自身都有利好消息。日前，綠城中國就公布，分拆代建公司綠城管理控股（０９９７９）於港交所上市，計劃發行４﹒７８億股股份，當中在港公開發售佔１０％，招股時間由周一（２９日）至周五（３日），預計下周五（１０日）掛牌上市。料綠城今次分拆上市短期對母企股價有刺激作用，而且分拆業務上市既可以籌得更多資金，保證集團資金流健康發展。
從公仔圖睇，內地磚頭佬至新冠疫情大流行之後，股價一直處於較低嘅水平。單睇綠城中國，佢喺三月頭曾創１１﹒３１１銀嘅高位，不過因疫情一下跌落６﹒１２１銀嘅半年低位，股價回調近４６巴仙，直到宜家佢先回升到８銀水平，離三月頭嘅高位仲有唔少水位。加上佢目前１４天ＲＳＩ係６１﹒６，仍屬於較平穩嘅水平，市盈率僅１４倍，估計仲有上升動力。不過，佢今日一隻大陽燭上升，觸及保力加通道頂線，建議作中短線部署嘅缸友待回調到７銀邊再吸納，目標睇９銀。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
