《魚缸博客》多間機構護航力撐基本面同估值，舜宇短線仲有水位！

　　不論投資定投機，盈盈都覺得應該要揀強勢股。觀乎半日魚缸表現，最強勢嘅藍戰士莫過於舜宇光學（０２３８２）。唔好睇佢半日已然飆咗６巴仙，好似好多咁，但上面仲有嘅空間可能更加多！
　　事緣舜宇星期三搞咗個ｏｎｌｉｎｅ投資者會議，管理層喺會議上預計，今年全球智能手機銷量跌逾一成二至１２億部，主要受累疫情、全球經濟放緩，同埋貿易摩擦等因素；又估計５Ｇ手機銷售將較預期少近６巴仙。不過，集團強調將聚焦建立成本優勢，並會盡量爭取擴大手機鏡頭市佔率，呢方面盈盈絕對有信心，從佢每個月出嘅出貨量數據已經可見一斑～
　　唔單止盈盈對佢有信心，一眾大行或券商都係。其中，花旗認為，舜宇將會受惠各大智能手機品牌回復需求，而且手機多鏡頭嘅趨勢仍會持續，調高２０２１／２２財年嘅收入預測６－７巴仙。「他屐」由升三成九至１６０銀，評級亦都升至「買入」。
　　麥格理同樣睇得相對樂觀，調升「他屐」近兩成三至１５２銀，評級繼續畀「跑贏大市」，主要因為有信心公司喺供應鏈嘅定位可以應對疫情，訂單削減情況同埋花旗國針對華為嘅禁令對佢影響輕微！
　　交銀國際就認為，成像／傳感嘅長期升級趨勢唔會改變，現價對應今明兩年嘅市盈率喺同業入面仍然屬於吸引水平；將「他屐」調升逾一成一至１４５銀，評級繼續畀「買入」。
　　另外，大和都調高咗對舜宇嘅「孖屐」，上調近７巴仙至１４２銀；評級都係「買入」。
　　舜宇半日高收逾６巴仙，並晉升至第五大活躍股份，成交增至逾１１億。至於舜宇今朝嘅資金流同買盤動力又點呢？截至半日收市，舜宇連續第八日錄得資金淨主動買入，暫錄１﹒７億，已較過去五天平均多約６巴仙；大戶主動買沽比率為６４：３６，反映好友大戶買盤積極。
　　技術走勢上，舜宇半日突破前高位１２３﹒８９銀（除淨後股價），以前升浪嘅１倍反彈阻力計算，初步目標可上試約１３５﹒８銀。中線嘅話，就可以睇遠少少，望返１月中旬嘅高位，約１４８﹒３９銀啦！不過，兩個目標嘅前提係，佢今日收市價分別企穩１２３﹒８９銀同埋１２５﹒７７銀（黃金比率０﹒６１８倍反彈阻力）～由於舜宇股價波動一向較大，止蝕位建議ｓｅｔ遠少少，１００天線大約１１５銀～

　　表列各機構對舜宇最新評級及目標價變動：

　　大行／券商　　　評級變動　　　目標價變動　　　　　　　　　　潛在升幅　
　　－－－－－－－－－－－－－－－－－－－－－－－－－－－－－－－－－－－－－　
　　花旗　　　　　　中性→買入　　１１５﹒００→１６０﹒００　　２５﹒６８％　
　　麥格理　　　　　維持跑贏大市　１２３﹒８０→１５２﹒００　　１９﹒４０％　
　　交銀國際　　　　維持買入　　　１３０﹒００→１４５﹒００　　１３﹒９０％
　　大和　　　　　　維持買入　　　１３３﹒００→１４２﹒００　　１１﹒５４％
　　瑞信　　　　　　維持跑贏大市　１４９﹒００→１４３﹒００　　１２﹒３３％
　　－－－－－－－－－－－－－－－－－－－－－－－－－－－－－－－－－－－－－　

　　《編者按》本欄搜羅即市傳聞，惟消息未經證實，《經濟通》亦不保證內容之準確性。