《小傳日記》醫藥股今日冧晒檔，相信同中成藥集採要降價嘅原因有關。話說喺湖北召開嘅
全國中成藥採購聯盟集中帶量採購信息公開大會，有８６間企業、９５個報價代表品參與現場競
爭。其中，６３間企業、６８個報價代表品中選，中選率７１﹒６％，中選品種平均降幅
４９﹒３６％。
據外電報道指，今次集採中選價格嘅降幅中位數係４７﹒６７％，比前８批全國化學仿製藥
集採價格降幅介乎嘅４８％到５９％為低，其中第八批全國化藥集採平均降幅係５６％。
今次降價預計每年可以慳返藥品費用超過４５億人仔，有望紓緩病人藥費負擔。中選嘅６３
間企業當中，有多間知名上市藥企，包括白雲山（００８７４）、神威藥業（０２８７７）、上
海醫藥（０２６０７）同石藥集團（０１０９３）。呢幾間藥企所中選藥品的價格，較基準價格
低３５﹒０３％到６９％。
中成藥集採要降價，可能影響到藥企嘅收入，令到一眾醫藥股齊齊跌。除咗頭先講到嘅六間
中選藥企，中生製藥（０１１７７）跌超過７巴仙，一度跌到３﹒２７銀嘅年內低位。今年醫藥
股走勢唔算突出，中生製藥更加自今年４月開始反覆下跌，今日連３﹒５銀嘅重要支持位都失埋
，加埋中成藥集採降價嘅因素，就算出現技術性反彈，都可能只係彈一彈。中生製藥前景有咁多
不明朗變數，呢排都係避一避喇！請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【etnet 30周年】多重慶祝活動一浪接一浪，好禮連環賞！ ► 即睇詳情
