憂慮爆發第二波疫情，上星期環球出現小股災，花旗國一日急瀉逾１８００點，但隨著聯儲局加大救市力度購買企業債，孖屐暫時喘定。各地央行大力放水有助紓緩企業短期嘅資金流問題，但對於部分企業而言，今次疫情為行業帶來結構性轉變，甚至可能成為壓垮駱駝嘅最後一根稻草。所以，即使估值便宜，古臣對呢類企業仍然唔心動。
＊疫情下逾萬間影視企業倒閉＊
今日古臣就想同缸友們探討下影視行業嘅復甦之路。自從神州喺１月２３日起勒令全國所有戲院停業以來，神州戲院只係喺３月份短暫開業一個星期就又被叫停，即使開工嗰幾日大部分戲院收入都喺１００銀內。內媒報道，因為近日北京疫情反覆，北京新冠肺炎疫情防控工作領導小組又指示，電影院、卡拉ＯＫ等密閉式文娛場所暫不開放。
疫情重創整個行業，造成資金短缺、生產周期延長，疫情防控困難等等問題。有數據顯示，截至６月影院已經停擺１３８日，單一個影院收入就損失２８００萬人仔，仲未計影院嘅租金、員工薪資同存放成本。神州影視大型企業博納影業今年年頭正籌拍新片，但由於疫情緣故，接近２０００人嘅劇組滯留當地，損失係億億聲計。
神州企業信息查詢平台「企查查」數據顯示，今年有超過１﹒３萬間影視相關公司被註銷或吊銷，遠遠超過舊年全年。即使疫情過後情況亦都唔樂觀，《電影院生存狀況調研報告》調查發現，半數影院認為至少要３至６個月先可以回復疫情前水平，有三成七人比較悲觀，預料需要半年以上時間。全球最大戲院商ＡＭＣ之前曾表示，即使戲院能夠重開，亦未必有足夠電影放映，而且疫後初期戲院入坐率都難以回復到正常水平。
＊行業步入冰河期，疫後情況不容樂觀＊
喺疫情期間，唔少電影要延期上映或改喺網上播放，衝擊整個影視行業。好似環球影業嘅電影《魔髮精靈：唱遊大世界》喺網上平台播放，三個禮拜吸金近１億美金，搞到ＡＭＣ要發公開信，話未來拒絕播放所有環球影業嘅電影。神州賀歲片《囧媽》喺網上免費播映亦惹來全國院線集體上書電影局，話咁樣係做壞規矩，蓄意破壞神州電影業。其實近年隨著影音串流平台如Ｎｅｔｆｌｉｘ、Ｄｉｓｎｅｙ＋嘅崛起，消費者開始減少到戲院睇戲。雖然Ｎｅｔｆｌｉｘ未能喺神州提供服務，但網民仍能輕易買到帳號翻牆睇戲，所以呢方面嘅憂慮都唔係無。
另外，神州影視業近年加強監管亦影響影視企業收入，除咗前日開始嚴打逃稅，去年當局對影視題材審查尺度日益收緊，令到部分已經拍好嘅電影要突然撤檔，舊年有多套大片例如講述抗日戰爭嘅《八佰》及神州名導張藝謀嘅《一秒鐘》等１６套電影因「技術原因」無緣銀幕，事件對影視企業同戲院都造成打擊。正正因為咁，唔少公司都轉型拍電視劇。
＊香江上市影視股業績見紅＊
喺香江上市嘅貓眼娛樂（０１８９６）同阿里影業（０１０６０）都因為疫情影響錄得虧蝕。其中，阿里影業截至３月底全年淨虧損大幅擴大至１１﹒５１億銀，公司話自從舊年以來，行業普遍面臨宏觀經濟放緩、業績下行嘅困境﹐今年年初疫情爆發，行業上游如劇集、綜藝、廣告等影視拍攝活動都要停止，下游院線近半嘅年度業績喺疫情下消失。
夏天來臨，影視行業嘅傳統旺季之一暑假檔理應係行業翻身嘅好時機，但面對疫情反覆、片源或因早前停工出現不足、消費者觀看模式轉變及行業前景不明朗下，相信影視股疫後復甦之路仍然非常漫長。
＊失落京東，本周古臣持倉按兵不動＊
上星期古臣抽五手京東（０９６１８）新股，但可惜五手中一手嘅中籤率只是約３巴仙，所以古臣都抽唔到，唯有等佢上市睇下股價走勢再買！至於倉內其他股份就繼續按兵不動。
表列截至６月１７日阿臣投資組合表現：
股份 股數 平均買入價（元） 現價（元） 總值（元）
－－－－－－－－－－－－－－－－－－－－－－－－－－－－－－－－－－－－－－－
港股：
ＳＰＤＲ金ＥＴＦ １０股 １０９７﹒００ １２５６﹒００ １２５６０
平安好醫生 ２００股 ５２﹒９０ １１２﹒７０ ２２５４０
阿里巴巴 １００股 １７６﹒００ ２１５﹒４０ ２１５４０
微盟集團 ２０００股 ４﹒５５ １０﹒０２ ２００４０
三一國際 ２０００股 ４﹒１１ ３﹒６８ ７３６０
港交所 １００股 ２６４﹒５０ ２９４﹒４０ ２９４４０
－－－－－－－－－－－－－－－－－－－－－－－－－－－－－－－－－－－－－－－
股票市值 ： １１３４８０元
剩餘現金 ： １０１０８６元
組合淨值 ： ２１４５６６元
組合本月收益表現： ＋ ５﹒８％（截至上月底止組合淨值：２０２８２０元）
組合累計收益表現： ＋１０４﹒３％（本金１０５０００元計）（２０１６年８月開倉）
＊數據截至今日上午１１：１５ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
