話說喺今個月初國家主席習近平發出對海南自貿區嘅指示，習主席金口一開各部門梗係要做嘢，結果當日就國務院就出咗份《海南自由貿易港建設總體方案》。相關概念股應聲炒起，依個政策炒唔炒得過？邊一類股比較值得吸納呢？
＊「６＋１＋４」建設方案＊
近日國新辦就《海南自由貿易港建設總體方案》嘅相關情況開記者會，總體而言，依個總方案可以總括為「６＋１＋４」。「６」是指貿易自由便利、投資自由便利、跨境資金流動自由便利、人員進出自由便利、運輸來往自由便利及數據安全有序流動；「１」就係構建現代產業體系，強調突出海南優勢同特色，例如旅遊業、現代服務業等；「４」就係加強稅收、社會治理、法治、風險防控四個方面嘅制度建設。當中最令人矚目係零關稅、低稅率嘅原則，如果按阿爺呢個規劃，海南分分鐘會成為神州嘅「購物島」。相關負責人仲話，依個總體方案嘅推行可以分打基礎同全面推進兩個階段，首階段係突出貿易投資自由化便利化，適時仲會啟動全島封關運；第二階段係實現總體方案四個方面嘅制度建設，優化完善開放政策和相關製度安排。
＊自貿概念於Ａ股拉動力強＊
份總體方案講得咁詳細，阿臣覺得依個海南自貿港真係要搞一段長時間。追溯返之前海南嘅相關政策，原來海南自貿港概念Ａ股喺２０１８年就開始現炒風，而相關股嘅表現仲唔錯。喺２０１８年１０月１６日阿爺就出咗一份《中國（海南）自由貿易試驗區總方案》，當時有間做Ａ股數據嘅機構就總結咗３１家上市公司，並組成一個海南自貿港指數，試驗區總方案推出後一個月內依個指數就上升超１０巴仙；半年後，指數則上升超４５巴仙。
對於呢份新出爐嘅總體方案，神州券商中信証券就喺報告到講，海南投資機遇應緊抓「大消費＋大健康＋大農業＋生產性服務業」，因為免稅消費或會迎來擴大升級，有利於休閒旅遊發展；依託博鰲樂城先行示範區，大健康產業亦將快速發展；另外，海南特色嘅熱帶農業同海洋資源開發前景同樣可觀；其次同現代服務業相關嘅智能物聯、區塊鏈、金融科技板塊都需要注意。
目前海南自貿港概念Ａ股龍頭就分別係，主要做商品房和農業嘅羅牛山（深：０００７３５），主營海南酒店住宿、餐飲嘅大東海Ａ（深：０００６１３）及海南旅遊消費概念龍頭海峽股份（深：００２３２０）。
＊吼實富力地產、恒大健康＊
喺港股方面，阿臣按板塊歸納咗一下並分成四類。第一類係房地產，包括雅居樂（０３３８３）及恒大（０３３３３）；第二類係旅遊、度假區，包括復星旅文（０１９９２）、海昌海洋公園（０２２５５）及美蘭空港（００３５７）；第三類係海南ＣＢＤ概念股富力地產（０２７７７）；最後一類則係大健康概念恒大健康（００７０８）。
當中，阿臣比較睇淡房地產，皆因海南對於房地產嘅政策係好嚴厲。日前海南省委書記就表示，海南嘅房地產唔係外面想要多少就建多少，唔會成為房地產嘅加工廠。喺海南買樓嘅要求係有條件的，你要喺海南工作滿一年以上先可以買，而且佢仲實行全區域嘅限購政策，可以話有錢都唔一定買到。
不過，總體方案提及嘅大健康同金融服務板塊都可以留意一下。其中，恒大健康首家博鰲恒大國際醫院也正式在海南開業，而富力喺２０１８年從海航集團接手嘅大英山ＣＢＤ項目仲係經海南政府批覆認定的。相信依類股喺目前經濟環境下嘅有一定抗跌力。
＊復星旅遊文化或最為得益＊
相比較之下，認為旅遊、度假區係海南自貿港政策之下或能先分一杯羹。喺總體方案入面就強調構建現代產業體系，突出海南旅遊業同現代服務業嘅特色，相信自貿港之後嘅政策將會促進旅遊業，加強旅遊同消費產品嘅多樣化，吸引更多旅客。其中，擁有最受旅客歡迎嘅三亞亞特蘭蒂斯酒店嘅復星旅遊文化（０１９９２）或最受益。據復星旅文年報顯示，該酒店２０１９年到訪人次５２０萬，同比增長６２巴仙，入住率為６８巴仙，帶動營業額大幅增長７４巴仙，為公司貢獻１３﹒１２億元營收。儘管今年受到疫情影響，佢喺５月１日至３日期間，客房入住率均在九成左右，領跑三亞其他高端酒店。此外，佢喺今年４月都同三亞市達成戰略合作，相信未來其喺三亞旅遊發展項目將愈來愈多，完全係吃正政策方向。
＊疫情下旅業仍受壓勿高追＊
據海南省旅遊和文化廣電體育廳４月旅遊統計，接待遊客總人數３０４﹒４３萬人，對比３月嘅２２２﹒０３萬人，環比已上升３７巴仙，但仍同比大跌４４巴仙。可見儘管神州對內放寬防疫措施，神州人出遊嘅意願仍然較低。加上之前政策出台復星旅文股價已經炒起一輪，相信目前股價已經反映咗部分利好消息，阿臣喺到就唔選擇高追了。
另外，之前阿臣就話睇好京東（０９６１８）回歸，佢今個禮拜開始招股，阿臣都申請左５手，共５９５９０銀（包括手續費）。阿臣其他持倉本周唔郁住。
表列截至６月１０日阿臣投資組合表現：
股份 股數 平均買入價（元） 現價（元） 總值（元）
－－－－－－－－－－－－－－－－－－－－－－－－－－－－－－－－－－－－－－－－
港股：
ＳＰＤＲ金ＥＴＦ １０股 １０９７﹒００ １２５１﹒００ １２５１０
平安好醫生 ２００股 ５２﹒９０ １０２﹒８０ ２０５６０
阿里巴巴 １００股 １７６﹒００ ２１５﹒４０ ２１５４０
微盟集團 ２０００股 ４﹒５５ ８﹒８１ １７６２０
三一國際 ２０００股 ４﹒１１ ３﹒８１ ７６２０
港交所 １００股 ２６４﹒５０ ２９５﹒４０ ２９５４０
－－－－－－－－－－－－－－－－－－－－－－－－－－－－－－－－－－－－－－－－
股票市值 ： １０９３９０元
凍結資金 ： ５９５９０元
剩餘現金 ： ４１４９６元
組合淨值 ： ２１０４７６元
組合本月收益表現： ＋ ３﹒８％（截至上月底止組合淨值：２０２８２０元）
組合累計收益表現： ＋１００﹒５％（本金１０５０００元計）（２０１６年８月開倉）
＊數據截至今日上午１１：１５ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
