喺上星期嘅全國兩會會議，缸友嘅焦點似乎都去咗港版國安法，但會議期間亦有委員提出有關改革神州資本孖屐嘅建議，唔知缸友有無留意呢？近日上交所就對此作出回應，指會研究引入單次「Ｔ＋０」交易制度，消息令一眾神州券商佬都非常雀躍。究竟政策落實嘅機會大唔大？又能唔能夠長期利好呢個板塊？
＊神州曾經實行，因防範風險轉「Ｔ＋１」＊
「Ｔ＋０」交易制度，意思係即日買入嘅股票，即日可以沽出。而神州依家實行「Ｔ＋１」模式，即買入股票後唔可以係同一日沽出，最快只能係交易後一日沽售。所以呢排神州就討論緊放寬到可以單日內買入後沽出，或者賣出後再買入，不過兩個方向嘅操作次數都只限一次。
有別於香江同國外例如花旗國及米字國，神州資本孖屐喺１９９０年先重開，歷史比較短。初期孖屐曾短暫實施「Ｔ＋０」交易制度，但１９９５年基於風險防範嘅理由，滬深孖屐又改返做「Ｔ＋１」嘅制度，並一直延用到依家。喺２０１６年神州央媽發表嘅《中國金融穩定報告》中指出，內地資本孖屐以中小投資者主導，發展及制度都未完善，貿然恢復「Ｔ＋０」交易恐怕助長高頻交易，加劇金融投機氛圍。
報告入面解釋，高頻交易者可以透過頻繁報單同撤單，向孖屐釋放虛假嘅交易信號，而且程序化交易嘅自動觸發機制可能會強化呢類交易行為，加劇孖屐波動。而且一般來講，宏觀經濟同公司基本面變化唔大，所以當二級孖屐交易頻率過快，會令金融交易同實體經濟變化脫離。
＊「Ｔ＋０」交易有助實現更好風險對沖＊
因此，當神州喺２０１９年推行科創板時亦繼續沿用「Ｔ＋１」嘅交易制度。不過神州全國政協委員、中央財經大學金融學院教授賀強日前就表示，科創板試點註冊制風險較大，而且科技創新公司嘅不確定性同風險都大，認為應該推出「Ｔ＋０」制度方便即日止蝕。的確，目前Ａ場沽空嘅渠道非常有限，而且機制都唔未完善，要實現更好嘅風險對沖非常重要。
此外，有分析指，實施「Ｔ＋０」可增加股票嘅流動性，完善價格機制，因為喺目前「Ｔ＋１」嘅制度下，當日成交嘅股票就唔可以再流通，未必可以滿足孖屐對一啲流通市值較細或熱炒個股嘅需求。除左提升交易額同帶動孖屐氣氛，「Ｔ＋０」亦有助Ａ場同國際資本孖屐接軌。不過正如央媽份報告所講，引入「Ｔ＋０」最大嘅憂慮就係助長投機行為及增加操縱孖屐嘅風險。
＊新制度短期落實機會不大＊
但無論如何，增加交易嘅頻率對於券商而言帶來嘅好處都好明顯。有神州券商指出，美日韓孖屐每日嘅迴轉交易額佔比全日交易額一至兩成，估計Ａ場實施Ｔ＋０之後可以額外增加每年收入嘅２至３巴仙。
不過，要喺短時間之內實施就有啲難度，有報道引述接近上交所嘅人士表示，「Ｔ＋０」仲喺研究嘅階段，並非立刻實施。亦有分析指，Ａ場投資者結構未夠成熟係窒礙Ａ場落實Ｔ＋０嘅主因之一，因為個人投資者主導嘅孖屐缺乏中長期嘅研究同判斷，易受政策消息刺激，預料放寬步伐唔會快。
阿臣認為，雖然呢個政策有利於神州券商佬，不過由於以上制度會加劇孖屐嘅波動性，喺目前經濟前景不明朗及中美博奕隨時牽動孖屐情緒嘅背景下，相信神州仍有穩定孖屐需要，故未必會喺短期之內推出相關措施。再者，神州券商佬正面臨互聯網券商興起加劇孖屐競爭，以及神州加強監管等挑戰，阿臣認為前景仍然唔明朗，所以都希望有更多關於落實「Ｔ＋０」消息出台後再作中長線部署。
＊上周買入一手生發發，作中線部署＊
上周阿臣喺呢度講過，睇好中概股嘅回流利好生發發（００３８８）嘅前景，所以趁股價回落至十天線附近就部署首注，所以上周四（２８日）當股價穿十天線就以２６４﹒５銀買入第一注即一手生發發。
阿臣個倉開設近四年，暫時回報唔錯有１００巴仙，希望末來再有好成績。阿臣今個星期暫時維持唔郁。
表列截至６月３日阿臣投資組合表現：
股份 股數 平均買入價（元） 現價（元） 總值（元）
－－－－－－－－－－－－－－－－－－－－－－－－－－－－－－－－－－－－－－－－
港股：
ＳＰＤＲ金ＥＴＦ １０股 １０９７﹒００ １２５９﹒００ １２５９０
平安好醫生 ２００股 ５２﹒９０ １０９﹒２０ ２１８４０
阿里巴巴 １００股 １７６﹒００ ２０８﹒００ ２０８００
微盟集團 ２０００股 ４﹒５５ ８﹒７１ １７４２０
三一國際 ２０００股 ４﹒１１ ３﹒８５ ７７００
港交所 １００股 ２６４﹒５０ ２９１﹒６０ ２９１６０
－－－－－－－－－－－－－－－－－－－－－－－－－－－－－－－－－－－－－－－－
股票市值 ： １０９５１０元
剩餘現金 ： １０１０８６元
組合淨值 ： ２１０５９６元
組合本月收益表現： ＋ ３﹒８％（截至上月底止組合淨值：２０２８２０元）
組合累計收益表現： ＋１００﹒６％（本金１０５０００元計）（２０１６年８月開倉）
＊數據截至今日上午１１：１５ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
