繼阿里巴巴（０９９８８）成功喺香江第二上市之後，市傳已經有唔少中概股心思思想回歸上市。可惜遇上新冠肺炎全球大流行，搞到全球魚缸動盪不斷，唔少公司都暫停咗上市計劃。近排，神州同香江疫情已經受控，花旗國部分州份已經開始重啟經濟，市況轉穩，京東開始按壓不住，市傳率先要嗻６月上市。京東為首嘅中概擬陸續返香江第二上市，對阿里巴巴係危還是機？京東又係唔係咁值得抽？
＊傳京東本月２５日開始招股＊
自從阿里巴巴喺香江上市後，已經有好多預測話京東、網易、百度等中概股準備或已秘密遞交上市文件。另外，近期以瑞幸咖啡為例嘅中概股鬧出財務醜聞，其他喺花旗國上市嘅中概股或多或少形象受損，更令到沽空機構更加盯住唔放。加上神州同花旗國關係反覆，更係令中概股左右為難。就咁睇嚟，由上年開始允許符合條件嘅神州企業喺香江第二上市，的確係依班中概股吸金嘅好選擇。
近日，市傳香江將迎來第二隻第二上市嘅中概股，佢就係神州第二大電商公司，亦係阿里巴巴嘅競爭對手－－京東。據報京東計劃今個月２５號開始新股認購，最快喺６月正式掛牌上市。本次京東將出售５％股份，集資額約３４億美金，折合約２６５億港紙，將會榮登今年香江最大ＩＰＯ。保薦人為美銀、中信里昂及瑞銀。
＊京東側重３Ｃ商品及電子產品＊
首先從行業上，京東同阿里巴巴都係行業龍頭，按上年電子零售銷售總額計，阿里佔５８巴仙，而緊居其後就係京東同拼多多，分別各佔１７巴仙及７巴仙。不過，兩者喺銷售商品嘅側重點唔同，阿里巴巴主要係服裝、快速消費品（ＦＭＣＧ）；京東則係３Ｃ商品及電子產品，近年都有發展ＦＭＣＧ。
電商除咗商品，送貨服務都係其中重要嘅組成部分，喺依方面京東就比阿里巴巴做得更好。阿里巴巴雖然有附屬嘅物流公司，但佢大部分物流都係同其他大型物流企業合作，例如，中通快遞、圓通速遞，還是比較依賴第三方。而京東佢已經建立自家全國物流網絡，所有物流都由自己承包。喺今年年頭突然爆發嘅新冠疫情中，京東就比阿里巴巴有優勢，佢有發展自己嘅供應鏈同埋先進嘅無人機、無人車物流，所以京東農曆新年後就可以恢復全面運作，可以話係當時為數不多可以持續為消費者服務嘅電商。因此大行高盛就預期京東首季收入增長１４巴仙，而券商綜合料阿里巴巴跌２６巴仙。從短期睇，阿臣認為京東上市會比阿里巴巴股價帶來壓力，其一，兩者都係行業龍頭，加上券商普偏料京東首季業績優；其二，目前疫情仍未消去，投資重點仍在較為穩定的資產，且兩者業務相似，料會分流部分資金。
但從長遠發展，阿里巴巴嘅業務分配更優於京東。阿里巴巴除咗電商業務天貓、淘寶，還有網上醫療業務阿里健康（００２４１），外賣業務餓了麼及遠程辦公業務釘釘等等，雖然這些業務目前佔比少，仲有部分係未錄得收入，不過依類業務都可以話係未來大勢所趨，可憧憬會為阿里巴巴盈利再添筆。而京東主要仲係電商及物流，雖近年來都有發展ＡＩ業務，但對比阿里巴巴業務比較單一，不過佢勝在有充裕嘅現金及強勁嘅現金循環周期。因此，從長線睇，京東並唔會係阿里巴巴嘅壓力，因為兩者未來發展方面不同，不過同屬新經濟龍頭嘅兩者前景仍不可量，或能相輔相成。
＊京東值唔值得抽？＊
根據業績，２０１９年京東營收５７６９億人仔增長２４﹒９巴仙，全年實現淨利潤１２２億人幣，實現扭虧為盈。而喺２０１９年第四季，京東活躍用戶數量環比增長８﹒３巴仙至３﹒６２億人，同時超過阿里巴巴同期嘅１８００萬用戶增長。此外，東京自家強大嘅物流業務亦係獲稱全球首個擁有中小件、大件、冷鏈、Ｂ２Ｂ、跨境和眾包這六大物流網絡嘅企業，佢仲有智能倉庫管理、無人機等，主打自營訂單可以喺２４小時內送達。對此，大行瑞信就表示睇好內地電商三巨頭，當中首選京東。該行指，京東二次上市加分拆京東物流上市會推動股價上漲，而京東電商新增直播、生鮮等新模式後盈利可見性高於同業。瑞信預計，目前電商直播、Ｃ２Ｍ及生鮮電商總市場規模達３﹒６萬億人仔，而至２０２３年，直播電商市場規模將擴大至１﹒８萬億人仔。雖然，近月沽空機構連番爆出中概股財務醜聞，但對於京東依隻喺花旗國打滾咗近６年嘅行業龍頭，佢還是有信用保證的。所以論目前業務同未來前景，阿臣覺得京東都係值得一抽。
古臣持倉本周繼續按兵不動，阿里巴巴繼續持有。
表列截至５月１３日阿臣投資組合表現：
股份 股數 平均買入價（元） 現價（元） 總值（元）
－－－－－－－－－－－－－－－－－－－－－－－－－－－－－－－－－－－－－－－－
港股：
ＳＰＤＲ金ＥＴＦ １０股 １０９７﹒００ １２４０﹒００ １２４００
平安好醫生 ２００股 ５２﹒９０ １１７﹒１０ ２３４２０
阿里巴巴 １００股 １７６﹒００ １９５﹒９０ １９５９０
微盟集團 ２０００股 ４﹒５５ ５﹒７５ １１５００
三一國際 ２０００股 ４﹒１１ ４﹒１７ ８３４０
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ７５２５０元
剩餘現金 ： １２７６２０元
組合淨值 ： ２０２８７０元
組合本月收益表現： ＋ ０﹒７％（截至上月底止組合淨值：２０１２７０元）
組合累計收益表現： ＋９３﹒２％（本金１０５０００元計）（２０１６年８月開倉）
＊數據截至今日上午１１：１５ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
