最新評論  |  
國金點評  |  
中國點評  |  
港股點評  |  
期貨/商品  |  
窩輪/牛熊證  |  
ETF  |  
外匯  |  
基金  |  
強積金  |  
地產  |  
圈中人語  |  
最愛專欄

加入最愛專欄

作者為資深投資者。

22/04/2020 11:42

《古臣周記-古臣》生物科技股榮登新股王,炒B類股要留意甚麼?

  因為新冠疫情大流行令「孖屐」特別關注藥物,近日生物科技股可以話係大熱,不過除咗已經上市嘅股份外,即將上市嘅新股一點都唔遜色。即將本周五(24日)掛牌嘅康方生物(09926),喺呢個受疫情重挫嘅新股「孖屐」中,傳出凍資額逾1665億銀榮登今年嘅「新股王」。睇嚟疫情都阻止唔到「孖屐」對生物科技股嘅熱衷,咁大家係炒呢類生物科技新股嘅時候應該點樣選擇?又要留意咩?邊隻生物科技股又值得長揸?

*疫市擋不了缸友熱情*

  仲未有盈利嘅生物科技股康方生物,聯席保薦人為大摩及摩通,據報截止招股時間已經初步錄得639倍超額認購,凍資額逾1665億銀,較原本排名首位今年1月上市嘅九毛九(09922)凍資額多出248億銀。
  講開佢就不得不講埋凍資額排名第三,今年首家上市嘅生物科技股諾誠健華醫藥(09969),同樣都係未錄得盈利,佢係公開發售超購近298倍,總凍資額676億銀,聯席保薦人為大摩及高盛。諾誠健華業務致力於發現、開發並商業化潛在同類最佳或首創的用於治療癌症及自身免疫性疾病的分子靶向藥物,擁有9款潛力候選藥物。但係可惜呢隻股「掛」不逢時,剛好撞正香江魚缸步入技術性熊市,出現大額抽飛,不過上市首日仍然都企穩仲可以升近一成。

*要麼大喜,要麼大悲*

  講起點樣決定抽唔抽一隻新股,相信好多人都離唔開睇間公司嘅背景,例如佢係做邊行、營收如何;此外最多人睇嘅就係孖展超購倍數,通常超倍愈多表示依隻新股愈受歡迎;最後就會睇埋新股嘅莊家。不過,生物科技股同普通新股唔同,佢地通常都係仲未有盈利,有部分仲會係蝕錢。生發發(00388)總裁李小加網誌都有話,生物科技股結果要麼大喜要麼大悲,因為研發新藥周期長且耗資大,其產品事關公眾健康,受到政府嚴格監管,仲有機會研發咗好耐但都係失敗。所以睇公司業務同營收對生物科技股係唔work。係依個時候就可以轉睇間生物科技公司專攻邊類病嘅藥物,研發跟幾多隻藥並處於研發第幾階段,通常藥物研發分三階段,過晒三個階段先有機會申請上市。攞今次新晉「新股王」康方生物講,佢主攻領域係腫瘤、免疫在全球未解決醫療需求,涉及20多個藥物開發項目,其中10個抗體處於臨床階段,六個雙特異性抗體及四個抗體獲得FDA嘅IND批准,所以係生物科技股入面佢都算係優等生。

*信達生物值得吸納*

  雖然生物科技股嘅新股都好受缸友嘅歡迎,但係有唔少都係曇花一現,上市後就集體「潛水」。據阿臣統計,目前已經上市嘅「B」類股(Biotech)有14隻,其中「潛水」嘅就有9隻。考慮一隻生物科技股值唔值得長揸,阿臣簡單咁總結兩點,首要睇產品,次要睇資金。就以目前14隻生物科技股表現較出色嘅信達生物(01801)為例,產品方面,佢目前有6個品種入選國家「重大新藥創製」專項,17個品種進入臨床研究,5個品種進入臨床III期或關鍵性臨床研究,3個單抗產品已申請上市。但正式上市嘅藥物就只有達伯舒一種,不過佢可以話係一個撐全家,喺2019年11月達伯舒成為唯一一個進入新版國家醫保目錄的PD-1抑制劑,去年度銷售額為10億人仔。大行瑞銀同美銀美林都睇好達伯舒會為公司帶來更多銷售額。資金方面,除咗已經上市嘅產品可以為公司帶來穩定收入,信達生物喺上年10月同今年2月分別完成咗24億銀同23億銀融資,所以資金流係較充足,唔使驚無錢研發。因此,該股係2018年10月底上市後,至今已累積有近1﹒5倍嘅增長,係一隻值得投資嘅「B」類股。

*康希諾生物炒味濃*

  除咗信達生物,康希諾生物(06185)都係近排受熱捧嘅股份,最主要係因為喺目前新冠肺炎大流行嘅時期,該公司表示正研新型肺炎疫苗,並且近日發通告指預防新冠病毒疫苗擬近期在華展開II期臨床試驗。但係阿臣就覺得「孖屐」開心得太快,因新冠肺炎大流行,依家全球各國都積極研發同一種疫苗,牛津大學近日就話今年9月或將有100萬支疫苗面世。另外,康希諾生物先開展II期臨床試驗,最終是否成功仍有好大挑戰。

*平醫到價減磅,賺14130銀*

  上個禮拜阿臣就話見到平安好醫生(01833)近日急升,3月低位反彈咗超過六成,打算到100銀就先減磅,食咗胡先。阿臣就係星期一(20日)喺100銀沽咗3手,賺14130銀。

 表列14隻生物科技股表現:

 股份(編號)          現價*     上市價      上市至今變幅
 ----------------------------------------
 諾誠健華(09969)   12﹒90元   8﹒95元    + 44﹒13%
 康寧傑瑞(09966)   17﹒00元  10﹒20元    + 66﹒67%
 啓明醫療(02500)   54﹒45元  33﹒00元    + 65﹒00%
 中國抗體(03681)    3﹒07元   7﹒60元    - 59﹒61%
 東曜藥業(01875)    4﹒01元   6﹒55元    - 38﹒78%

 亞盛醫藥(06855)   26﹒60元  34﹒20元    - 22﹒22%
 復宏漢霖(02696)   39﹒70元  49﹒60元    - 19﹒96%
 邁博藥業(02181)    1﹒04元   1﹒50元    - 30﹒67%
 康希諾 (06185)  136﹒10元  22﹒00元    +518﹒64%
 基石藥業(02616)    8﹒45元  12﹒00元    - 29﹒58%

 君實生物(01877)   34﹒00元  19﹒38元    + 75﹒44%
 信達生物(01801)   34﹒95元  13﹒98元    +150﹒00%
 華領醫藥(02552)    3﹒00元   8﹒28元    - 63﹒77%
 歌禮製藥(01672)    2﹒82元  14﹒00元    - 79﹒86%
 ----------------------------------------
 *數據截止上日(21日)收市

 表列截至4月22日(上午11:15時止)阿臣投資組合表現:
 
 股份      股數     平均買入價(元)  現價/作價(元) 總值(元)
 ----------------------------------------
 港股: 
 SPDR金ETF  10股 1097﹒00   1229﹒00   12290
 平安好醫生    200股   52﹒90    113﹒80   22760
 阿里巴巴     100股  176﹒00    203﹒80   20380
 微盟集團    2000股    4﹒55      5﹒48   10960
 三一國際    2000股    4﹒11      4﹒06    8120
  
 減持:
 平安好醫生    300股   52﹒90    100﹒00   30000
 ----------------------------------------
 股票市值    :   74510元
 剩餘現金    :  127620元
 組合淨值    :  202130元
 組合本月收益表現:  +11﹒1%(截至上月底止組合淨值:181987元)
 組合累計收益表現:  +92﹒6%(本金105000元計)(2016年8月開倉)
 
 *數據截至今日上午11:15am

全新節目《說說心理話》原生家庭對成長有咩影響?改善溝通有計可施?► 即睇

專家陣容
顯示更多
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力