最新評論  |  
國金點評  |  
中國點評  |  
港股點評  |  
期貨/商品  |  
窩輪/牛熊證  |  
ETF  |  
外匯  |  
基金  |  
強積金  |  
地產  |  
圈中人語  |  
最愛專欄

加入最愛專欄

作者為資深投資者。

04/09/2019 11:31

《古臣周記-古臣》金價仲有新突破?要視乎花旗國減息步伐!

  呢排黃金價格喺咁升,無幾耐之前已經突破1550美金嘅關口,更一度高見1565美金水平,刺激黃金相關股都持續造好。阿臣喺7月頭嘅時候寫過金價,當時金價去到1405美金嘅水平,最高見過1438美金,創超過六年嘅新高。由七月頭高位計算,至今再升100美金有多。但係升咗咁多,短期仲有無水位呢?等阿臣同大家分析下依家嘅局勢先。
 
*外圍經濟不明朗,美金強勁阻金價升*
 
  黃金作用係對抗通脹同比資金避險,但目前最困擾全球經濟嘅莫過於兩大經濟體發起嘅貿易戰。而喺啱啱過去嘅周末,花旗國同神州新一輪嘅關稅都開始生效,而原定今個月舉行嘅兩國元首會面都仲係只聞樓梯響,更唔好話有任何共識。而且兩國各國近月嘅爭端已經滲透至貿易、金融、科技等各方面,短期難見有任何起色,加上侵侵打住「改善貿易不平等」嘅旗號為自己出年嘅連任鋪路,未來將會繼續對神州採取強硬態度。
  基於以上背景,大行瑞銀上月底就發表報告,將今年金價嘅預測再度提高,由原來預期半年同一年嘅預測價格為1500美金,上調至三個月內為1450美金至1600美金,半年同一年嘅預期更加升至1600美金同1650美金。
  另一方面,如果聯儲局減息,都會刺激美匯下跌,從而刺激金價。睇番上次7月聯儲局減息時嘅議息紀錄,同主席鮑威爾之後喺銀行公會嘅講話,都仍然強調喺需要嘅時候先會減息,可見暫未有明確展開減息周期嘅訊號。近日美匯指數已經抽升98至99水平,亦利淡金價後市。不過,上月兩年期同十年期債息倒掛嘅現象再度出現,令孖屐憂慮花旗國經濟最快喺半年後就陷入衰退。而今年9月減息嘅機率仲係相當高,短期金價嘅發展要密切留意聯儲局今個月中嘅議息會後聲明。

*比較4隻黃金股,山東黃金較為可取*
 
  如果缸友仍睇好金價後市,阿臣都喺度介紹返本地嘅黃金相關股。本地黃金股主要分兩種,一種係黃金ETF,其中最為人熟悉嘅就係全球第一隻黃金ETF,SPDR金ETF(02840),優點喺追蹤黃金價格,所以走勢比較貼近金價﹐但比起其他黃金股亦相對保守。另外,阿臣就比較咗三隻較熱炒嘅金股,招金(01818)、山東黃金(01787)同紫金(02899)。
  睇返佢地三間公司啱啱放榜嘅半年業績,紫金金礦期內生產嘅黃金產量最多,有超過138噸,收入佔集團總營業額五成六,但毛利就唔及佢嘅第二大銅礦多,後者毛利佔三成六。因此,如果黃金價格上升,佢嘅升幅未必跟得貼,而且表現都會受其他金屬業務影響。
  招金同山東黃金都係主要生產黃金,兩者期內黃金產量分別約15噸同20噸,但山東黃金上半年嘅盈利同收入都雙升,盈利仲有一成增幅,而招金嘅盈利同收入都分別按年跌兩成一同2巴仙。基於呢個原因,阿臣會比較建議買入山東黃金,但由於近日佢保歷加通道有收窄嘅跡象,加上MACD呈賣出訊號,短期仍有機會下調,建議缸友趁回落至17﹒5至18﹒8銀再分段吸納,咁樣好似更抵買。
  不過,眼見依家金價都已經喺1550美金開始回落,而且未來走勢仍受唔同因素,例如美匯、美債影響,所以阿臣都係睇定少少,等過埋9月中聯儲局議息,再睇下會唔會買入一啲黃金股。

  表列截至9月4日(11:15am止)阿臣投資組合表現:

  股份      股數     平均買入價      現價       總值
  ----------------------------------------
  港股:
  金界     2000股   9﹒65元     11﹒62元  23240元
  煤氣     1000股  16﹒00元     15﹒16元  15160元
  ----------------------------------------
  股票市值    :  38400元
  剩餘現金    : 120178元
  組合淨值    : 158578元
  組合本月收益表現:   +0﹒8%(截至上月底止組合淨值:157318元)
  組合累計收益表現:  +51﹒0%(本金105000元計)(2016年8月開倉)
 
  *數據截至今日11:15am

全新節目《說說心理話》原生家庭對成長有咩影響?改善溝通有計可施?► 即睇

專家陣容
顯示更多
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力