最新評論  |  
國金點評  |  
中國點評  |  
港股點評  |  
期貨/商品  |  
窩輪/牛熊證  |  
ETF  |  
外匯  |  
基金  |  
強積金  |  
地產  |  
圈中人語  |  
最愛專欄

加入最愛專欄

作者為資深投資者。

10/07/2019 11:31

《古臣周記-古臣》新股「煙不離酒」,百威亞太抽唔抽得過?

  貼市嘅缸友應該感受到最近魚缸嘅焦點,幾乎每日十大成交量入邊都有幾隻係半新股,而且部分成績都幾省鏡,幾乎合埋雙眼求其買一隻,set好止賺位都有一千幾百銀執,攪到阿臣都心郁郁想買返幾手。其中最令阿臣心郁嘅自然係中煙香港(06055),由上市價4﹒88銀,幾日間最高炒到28﹒5銀,急飆4﹒8倍,如果IPO後手持一手就勁賺成23620銀,打破上年毛記(01716)最多賺21121銀嘅神話。作為香江唯一一隻煙草佬,講話題的確夠晒「煞食」,不過睇返中煙嘅招股書,其實盤數就唔太好睇,上年盈利仲有倒退嘅跡象,少賺兩成半到2﹒6億;營業額70億銀跌一成。如果買咗嘅缸友係諗住坐貨到公布中期業績,咁就要「諗過度過」。
 
*中煙香港大幅炒高,「飲酒」難期望?*
 
  除咗「食煙」,「飲酒」都係缸友另一個會談論嘅話題,講緊嘅係下個星期五(19日)掛牌、聽日(11日)中午截止認購嘅百威亞太(01876)。呢隻大魚係由全球最大啤酒生產商百威英博(AB InBev)分拆出嚟嘅亞太區業務,將會係香江歷來第五大新股。不過,缸友可能會對今次百威亞太上市集資用嚟還債而有微言,不過君不見當年AIA(01299)上市都係為阿媽還債,但今日成績如何有目共睹啦!睇埋盤數佢,百威亞太上年盈利同收入都有增長,分別為約三成及近九巴仙,比青啤(00168)同潤啤(00291)都要好;再睇埋毛利率同純利率更加有55﹒2巴仙同16﹒7巴仙,比青啤37﹒7巴仙同5﹒3巴仙、潤啤35﹒1巴仙同3﹒1巴仙為高。加上品牌方面走高端路線,估值當然會較高,市盈率實際上只係比青啤30﹒7倍略高,大約有33﹒5倍,而潤啤就有37﹒1倍。
  以大市值上市,加上港元拆息最近急升,借孖屐嘅意欲都少啲,古臣諗缸友唔好期望佢掛牌後會好似中煙咁升到癲咗,不過只要「孖屐」氣氛唔太差,應該都可以有幾巴仙落袋,想短線嘅缸友就set定目標,靈活走位啦!
  至於想長揸嘅缸友,可能就要等一等啦。長遠去睇,阿臣認為除非再有收購否則銷量都唔會大增,三年前阿媽嗰邊已經收購全球第二大啤酒廠商SABMiller PLC(薩博米勒)而攪到債台高築,而現時阿媽已經佔全球啤酒市場三分一,再收購會買咩,阿臣都未諗到。再講,花旗國魚缸最近再創高峰,上個星期當地公布嘅就業數據已經令減息憧憬下降,阿臣認為侵侵(特朗普)對鮑叔(鮑威爾)嘅態度可能會係美股下個回調嘅借口。花旗國魚缸若果要跌,香江都應該無走雞囉,所以等跌缸友先諗長線投資啦。另外,缸友都應該記得阿里市傳會喺下半年嚟香江上市,阿臣睇好阿里表現多啲,而且長線去睇入恒指嘅機會幾大,如果無咩閒錢或者睇長線嘅缸友,不如留返啲彈藥重鎚呢隻好過啦!
 
*魚缸欠缺催化劑,短期維持上落格局*
 
  花旗國減息憧憬降溫,上個星期五出嘅非農數據大勝「孖屐」預期,之前大貪覺得可以減息半厘嘅願望要落空啦!但係「孖屐」都仍然認為今個月可能會減四分一厘,不過如果呢個期望都落空咁,魚缸嚟緊可能仲有一下要跌啊。魚缸今個星期開局已經連失十天、百天、廿天同五十天線,當中十天線開始掉頭,本來希望升破百天線形成黃金交叉,睇嚟要暫告一段落。恒指14天RSI現時仍然屬於合理水平,或者之後中美談判有好消息就可以彈一彈,現水平阿臣覺得魚缸都係以上落市居多,咁嘅情況下阿臣可能試試買下星期出世嘅界內證,所以先按兵不動啊!
 
  表列截至7月10日(11:00am止)投資組合表現:
 
  股份      股數     平均買入價      現價       總值
  ----------------------------------------
  港股:
  金界     4000股   9﹒65元     9﹒92元   39680元
  ----------------------------------------
  股票市值    : 39680元
  剩餘現金    :112581元
  組合淨值    :152261元
  組合本月收益表現:+ 0﹒92%(截至上月底止組合淨值:150870元)
  組合累計收益表現:+45﹒01%(本金105000元計)(2016年8月開倉)
 
  *數據截至今日11:00am

全新etnet健康網購,送你【健骨維他命D3(1000IU)】乙樽(價值$108)► 立即行動!

專家陣容
顯示更多
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力