２０１９年上半年仲有幾日就完結，展望下半年，缸友除咗要再留神中美貿易戰嘅發展之外，當然都要留意埋阿里巴巴有傳第三季來港第二上市嘅消息啦！之前「孖屐」就預期佢今次集資達２００億美金（約１５６０億港紙），計計數將會成為自２０１２年ＡＩＡ（０１２９９）之後集資額最大嘅新股，規模之大更可以令生發發（００３８８）成交增加一成到一成半，所以缸友們又點可以唔留意呢！所以喺抽佢ＩＰＯ之前，不如等阿臣今個星期先同大家睇睇阿里盤數同業務發展先。
＊阿里業績增長跑贏ＱＱ＊
上個月阿里就派咗佢份全年成績，表現比ＱＱ（００７００）更為省鏡。ＱＱ啱啱錄得十年嚟最低收入增長，阿里截至本年３月底止全年業績，期內收入按年大升５１巴仙至３７６８﹒４４億人仔，盈利增長３６﹒９巴仙至８７６億人仔。細睇阿里各分部業務，單睇第四財季，核心電商業務收入仲按年增長５４巴仙至７８８﹒９４億人仔，維持高增長；而作為之前ＱＱ其中一個都力攻嘅雲業務表現又點呢？阿里第四季度雲收入就增長７６巴仙到７７﹒２６億人仔，當中維持高增長嘅原因，主要係由每位客戶平均支出增加所推動，唔講唔知原來佢嘅客戶已經有超過一半係喺Ａ場上市嘅公司。
睇埋其他「孖屐」嘅研究啊，根據花旗國市場研究機構Ｓｙｎｅｒｇｙ Ｒｅｓｅａｒｃｈ Ｇｒｏｕｐ嘅研究，上年第四季阿里喺整個亞太區嘅市佔率排第二有１５﹒９巴仙，只係緊隨喺亞馬遜（２４﹒１巴仙）之後。而阿里去到神州大地更加以４０﹒５巴仙穩坐一哥地位，比ＱＱ佔有率１６﹒５巴仙多近半！所以睇到呢到，以後「孖屐」再炒雲業務嘅時候，大家就識揀邊隻啦！
睇埋阿里ＰＥ，以隔晚收市價計現時大概３３倍，畀ＱＱ嘅３６﹒８倍仲低，而且預計阿里仲有神州一大堆二、三線城市同東南亞「孖屐」，佢嘅前景可能更值得享有高ＰＥ，單純喺業務上，比起ＱＱ畀神州監控嘅機會都少啲啦！
之前阿里就講到會計劃將股份「１拆８」，有分折就話呢步係為佢未來來港上市鋪路，因為若果之後定價同花旗國嗰邊市價相若，即使以每手５０股計，入場費隨時高達６萬銀以上，而現時若果通過拆細咁入場費，以每手５０股計可能只需要７０００銀到，有利散戶入場！不過除咗關心定價幾多，阿臣同時關心阿里可唔可以同花旗國嗰邊「互聯互通」，咁到時侯就可以２４小時炒阿里，仲有機會賺埋價差！？
＊主要股東及馬雲再減持＊
不過，阿里巴巴前景咁光明，都唔係無隱憂。好似喺最新一份報告就睇到，相關主要股東包括馬雲自己，過去一年都一直減持阿里嘅股權，其中主要股東之Ａｌｔａｂａ喺上個月２０號就公布會出售阿里股份，原因係因為基金計劃清盤，而需要減持阿里股權嚟還債。最大股東軟銀（ＳｏｆｔＢａｎｋ），持股比例亦由２８﹒８巴仙降至２５﹒９巴仙。其中馬雲過去一年持股比例就由６﹒４巴仙降至６﹒２巴仙，副主席蔡崇信持股比例由２﹒３巴仙降至２﹒２巴仙。但目前馬雲仍然係阿里最大個人股東。但見到上邊各個股東紛紛減持唔通股價已經見頂？
睇返早年阿里選下阿里網絡（前股票編號０１６８８）在港上市，當時呢間公司主要從事Ｂ２Ｂ電子商務業務，同今日阿里業務有一定差距，主要以電商業務為主，針對Ｂ２Ｂ嘅客戶，而且未包括雲計算同支付業務等嘅範略，不過睇埋當年首掛嘅成續就令人好有遐想。２００７年阿里網絡以１３﹒５銀上市，一手交易單位係５００股，當年首掛第一日曾經炒至逾４０銀，最終亦以３９﹒５銀收市，不過隨後股價就唔多好睇，一直喺招股價樓下，最終到２０１２年，以當年招股價１３﹒５銀私有化，計計數如果持貨五年撇除２０１０年派２２仙特別股息，可謂「南柯一夢」！
不過，又咁講，今時今日阿里業務已經大有不同，而且成個香江政府都為咗阿里整個「同股不同權」制度出嚟，阿臣諗首掛都應該有好成績，有閒錢嘅缸友就不妨買兩手，ｓｅｔ定止賺價，應該都可以賺餐茶！
＊沽新地賺二千，渣打睇位沽貨＊
魚缸喺習特會見面前夕再起爭端，其中招行（０３９６８）同交行（０３３２８）牽涉當中，花旗國指佢哋，涉嫌違反北韓制裁。另一邊廂神州仲爆出一間聲稱同招行有合作關係嘅私募基金，突然人間蒸發。聯埋之前包商銀行、東亞（０００２３）發盈警單嘢，「孖屐」噚日都驚債務違約會陸續有嚟，所以一眾內銀佬自然當災，魚缸走勢都唔好睇囉。
為免夜長夢多，阿臣先喺１３４﹒５銀沽咗新地（０００１６）先，雖然同上星期講嘅１３５銀差半毫，不過起碼有錢落袋。而其餘兩隻魚毛金界（０３９１８）同渣打（０２８８８）其中一隻策略有變，阿臣見渣打多次喺７０銀無發突破，考慮到呢到位就先行離場。
表列截至６月２６日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
金界 ４０００股 ９﹒６５元 ８﹒９６元 ３５８４０元
渣打 ２５０股 ６７﹒５０元 ６９﹒６０元 １７４００元
－－－－－－－－－－－－－－－－－－－－－－－－－－－－－－－－－－－－－－－－
一周買入╱賣出股份
－－－－－－－－－－－－－－－－－－－－－－－－－－－－－－－－－－－－－－－－
股份 每股作價 數量 計及手續費後金額 盈╱虧
（不計手續費）
－－－－－－－－－－－－－－－－－－－－－－－－－－－－－－－－－－－－－－－－
沽出：
新地 １３４﹒５０元 ５００股 ６７１５９元 ２０００
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ５３２４０元
剩餘現金 ： ９４９９３元
組合淨值 ：１４８２３３元
組合本月收益表現：＋ １﹒５１％（截至上月底止組合淨值：１４６０２８元）
組合累計收益表現：＋４１﹒１７％（本金１０５０００元計）（２０１６年８月開倉）
＊數據截至今日１１：００ａｍ
etnet榮獲HKEX Awards 2023 「最佳表現證券數據供應商」大獎► 了解詳情
