最新評論  |  
國金點評  |  
中國點評  |  
港股點評  |  
期貨/商品  |  
窩輪/牛熊證  |  
ETF  |  
外匯  |  
基金  |  
強積金  |  
地產  |  
圈中人語  |  
最愛專欄

加入最愛專欄

作者為資深投資者。

05/06/2019 11:32

《古臣周記-古臣》巴斯高調唱淡港紙惹抨擊,或先重溫索羅斯一役

  早前花旗國對沖基金大鱷巴斯(Kyle Bass)高調唱淡港紙,引起「孖屐」關注,佢寫咗一篇文質疑香江現時唔夠彈藥去支撐聯繫匯率制度,不過當中嘅論點就畀人抨擊話佢嘅立論唔夠扎實,仲畀金管局高調回應話佢可能對聯匯制度有誤解喎!其中,巴斯最被人抨擊嘅係無提到金管局坐擁龐大嘅外匯基金,亦正正就係令聯繫匯率穩定嘅關鍵,而截今年三月底止,金管局嘅外匯基金就有4﹒2萬億港紙,相當於香江貨幣基礎嘅2﹒5倍,要攻都應該唔係咁易掛?事實上,睇返巴斯嘅往績,自從貼中2008年金融海嘯之後表現就未見標青,2007年佢創立嘅對沖基金就因為押注沽空花旗國次按市場而錄得2﹒17倍升幅,但往後8年,就只錄得每年平均1﹒56巴仙嘅回報。
  其實講起沽空港紙,缸友們更加有印象嘅可能係廿幾年前,「三劍俠」(時任財政司司長曾蔭權、金管局總裁任志剛和財經事務局局長許仕仁)對抗當時真.大鱷索羅斯(George Soros)一役。講返索羅斯嘅成績,除咗金融風暴沽空港紙之外,早喺1992年亦已經沽空英鎊,最終英倫銀行被逼讓英鎊貶值同退出歐洲匯率體系,當時佢就透過沽空英鎊一鋪勁賺11億美金,亦令當年佢嘅基金增長達67﹒5巴仙。所以可想言之,當時香江要面對呢隻大鱷嘅時候會幾咁恐慌。
 
*索羅斯曾橫掃東南亞貨幣市場,港府夾高息兼入市*
  
  時間回到九十年代初,東南亞經濟起飛,成為投資者投資勝地,區內各國股樓俱升,不過由於經濟依賴外地投資者、產業集中勞動密集型同低端產業,再加上增發外債遠超外匯儲備令泡沫一觸即發。當外圍經濟出現問題,東南亞國家就首當其衝。索羅斯就係睇中呢點,令當時泰國、馬來西亞、印尼等國家嘅貨幣紛紛淪陷。
  同樣係認為香江會維持唔到聯繫匯率制度,索羅斯終於喺1997年尾嚟到香江。佢先喺遠期港匯及股市部署,用雙邊操作,沽港元做套息交易,再沽期指,對沖港紙利率急漲嘅風險(索羅斯已計算香江會抽高利息應對)。當時港元外匯儲備有逾980億美金,位列全球第三,係當時流通貨幣量嘅八倍,令「三劍俠」其後可以有彈藥出招,力補聯繫匯率制度。
  首先金管局以兩招應對,第一招先夾高隔夜拆息,銀行同業拆息最高見近300厘歷史高峰,令炒家狙擊港元成本上升,退卻匯市炒家,繼而當局發現股市同期指先係炒家「提款機」。而且夾高息會對股市樓市有極大打擊,三劍俠於是喺匯市承接港元,再用承接所得嘅港元入市,令港股當年反彈,成功擊退270個以索羅斯為首嘅對沖基金。其後到1999年再將當年承接嘅港股,成立盈富基金(02800)出售。
  不過,呢一役之後雖然成功捍衛港元,但夾高息引致通縮,樓市急跌,古臣搵過1998年嘅數據,當年恒指由16000點開始起跌,最低仲試過一度跌穿6600點,重挫香江經濟。
  睇返原來當年政府入市各界睇法都幾負面,當中包括前前聯儲局主席「格老」(格蘭斯班),不過其實兩年後佢已經態度有變,到十年前「任總」退任金管局主席嘅時候,仲大派高帽讚當年港府入市係一個正確嘅做法,又點名話「任總」係最有效率嘅央行行長之一,而時隔多年索羅斯都話港府處理得漂亮。
  講返巴斯現時唱淡港紙,大家嘅焦點放喺香江可唔可以維持到聯繫匯率,但由索羅斯一役去睇,香江雖然喺廿年前成功捍衛港元,但同時付出高昂代價,唔知各位財金官員,有無全方位應對嘅準備,包括股市、財資市場等等,唔係單一焦點放喺聯繫匯率。

*魚缸廿天線有阻力,留意本月G20峰會發展*
  
  講返阿臣個倉。魚缸一如所料今日炒聯儲局減息而有所反彈,試過重返二萬七關口,不過暫時企唔多穩,阿臣睇似乎反彈力度比想像中弱。今個月政界都會有好多大事發生,包括G20峰會同侵侵會宣布連任,阿臣睇之後魚缸走勢如何,就要睇下兩個星期政界會有咩發展。現時政策照舊,儲下彈藥先,留金界(03918)同渣打(02888)坐到中期業績公布。
 
  表列截至6月5日(11:00am止)投資組合表現:
 
  股份      股數     平均買入價      現價       總值
  ----------------------------------------
  港股:
  金界     4000股   9﹒65元     8﹒87元   35480元
  渣打      250股  67﹒50元    67﹒75元   16938元
  ----------------------------------------
  股票市值    : 52418元
  剩餘現金    : 93173元
  組合淨值    :145591元
  組合本月收益表現:- 0﹒30%(截至上月底止組合淨值:146028元)
  組合累計收益表現:+38﹒66%(本金105000元計)(2016年8月開倉)
 
  *數據截至今日11:00am

全新etnet健康網購,送你【健骨維他命D3(1000IU)】乙樽(價值$108)► 立即行動!

專家陣容
顯示更多
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力