最新評論  |  
國金點評  |  
中國點評  |  
港股點評  |  
期貨/商品  |  
窩輪/牛熊證  |  
ETF  |  
外匯  |  
基金  |  
強積金  |  
地產  |  
圈中人語  |  
最愛專欄

加入最愛專欄

作者為資深投資者。

22/05/2019 11:31

《古臣周記-古臣》比特幣重上8000美金關口,嚟緊仲有得升?

  華為事件持續發酵,繼上星期五(17日)花旗國列貿易黑名單之後,谷歌亦嚟多腳話要中止同華為業務合作,即係話華為以後嘅手機可能會立即失去更新Android操作系統嘅權限,而華為推出嘅新手機亦將無法使用Play Store。消息令到相關嘅手機設備股同5G股連日下瀉。雖然現時最新消息係相關禁令會有90日緩衝期,不過封殺一事似乎仍然會陸續有嚟。而唔睇個股,睇魚缸走勢都同樣走樣!不足一個月已經唔見二千點仲穿埋二萬八呢個重要支持位,未來可能仲有排跌?不過,睇返恒指RSI現時都去到超賣區嘅位置,可能都有得彈些少掛?
 
*比特幣上望10000美金?*
  
  股市跌,港紙人仔亦跌,就連金價都唔係幾企得穩。不過,缸友可能唔知近排有一樣投資工具就一直保持強勢,講緊嘅係上年跌到一仆一碌跌瀉八成三嘅比特幣(bitcoin),佢唔聲唔聲,由今年至今已經升逾一倍,升幅跑贏晒所有資產價格,星期一(20日)嘅時候佢就曾經上過8000美金大關,高見8019美金,升幅咁勁當然令「孖屐」近日再重新關注佢嘅投資價值。
  今輪比特幣急漲,有指係同資金避險情緒有關,其中有分析就話人仔最近嘅走勢疲弱,加上即將「穿七」令資金加速外流,都係一個原因令比特幣成為一種另類受追捧嘅工具。睇好比特幣嘅前大摩分析師Tom Lee四月嗰陣就講到比特幣升上200天平均線之後,可能仲可以上埋一萬美金嘅位置,去到下年仲有可能再創歷史新高。佢認為,委內瑞拉同土耳其等國家嘅貨幣價值持續下跌,令當地人對傳統貨幣失去信心,轉投使用比特幣。亦有分析話,比特幣走勢同聯儲局加息與否有關,今年局方態度「轉鴿」嘅時候亦係一個令到比特幣上漲嘅原因。
  不過,有人唱好當然都有唱淡,好似摩通咁,佢就話比特幣可能要回軟到4000美金嘅位置,理由係比特幣內在價值同開採成本有關,價值最終要回歸開採成本。而佢就計到現時比特幣嘅邊際成本係4300美金,以現價接近8000美金去睇,兩者嘅差距係一年多以嚟最大,並接近2017年跌市前嘅水平。所以佢認為比特幣將要收窄返兩者差距而下跌。

*栢能「挖礦」概念只宜小注*

  阿臣本身就無投資比特幣,不過就睇咗啲有關佢嘅資料,發覺佢大升大跌都唔係第一次。歷史數據睇到喺比特幣接近十年歷史入邊跌幅多過三成嘅有12次,而跌幅超過七成亦有六次,當中包括上年嘅一次。但如果計及九年升幅就達40萬倍,所以難怪大家對佢咁著迷!但老土都要學電視廣告咁話,比特幣潛在風險唔細,想買佢嘅缸友如果要入貨,真係要量力而為,set好止蝕價最重要!
  講多句,現時魚缸相關嘅概念股有做顯卡嘅栢能(01263),佢同NVIDIA及AMD兩間全球主要圖像處理器供應商都有合作關係,受惠於比特幣熱潮,2017年佢嘅盈利曾經增長超過一倍!當中由於「比特幣挖礦」需要功能性較強嘅顯示卡,且相當消耗顯示卡,所以有利栢能業務擴張。但睇睇上年佢份成績可以話認真麻麻,盈利減少18﹒5巴仙有2﹒71億。不過隨住比特幣今年初至今急漲,栢能嚟緊中期嘅成績應該都唔差掛?睇公仔圖走勢就相當麻麻,想買入嘅缸友可能小注買好啲,暫時睇佢回落返到一月低位1﹒55銀先入手。
  
*買入日清及加注逆向ETF*
  
  講返阿臣個倉,金界(03918)之前連9銀到10銀嘅橫行區都穿埋,現時計計數,帳面唔見2520銀,但阿臣仍然諗住坐到中期即大概兩個月後先再作打算。
  至於另一隻逆向ETF就帳面有賺。上個星期五魚缸穿二萬八關之後,阿臣喺5﹒4銀嘅位置再買入3000股,如果之後恒指有反彈可能再入多手,而渣打(02888)走勢就繼續牛皮。之前阿臣講過會買入日清(01475),就趁佢星期一急回到十天線(約4﹒639銀)嘅時候買入,現時睇睇呢幾個星期可唔可以重上上年高位5﹒227銀嘅位置。
 
  表列截至5月22日(11:00am止)投資組合表現:
  
  股份      股數     平均買入價      現價       總值
  ----------------------------------------
  港股:
  金界     4000股   9﹒65元     9﹒02元    36080元
  FI南方恒指 4000股   5﹒31元     5﹒45元    21800元
  渣打      250股  67﹒50元    68﹒60元    17150元
  日清     5000股   4﹒64元     4﹒93元    24650元
  ----------------------------------------
  一周買入╱賣出股份
  ----------------------------------------
  股份      每股作價    數量    計及手續費後金額     盈╱虧
                                   (不計手續費)
  ----------------------------------------
  買入:
  FI南方恒指  5﹒40元  3000股    16219元     --
  日清      4﹒64元  5000股    23243元     --
  ----------------------------------------

  股票市值    : 99680元
  剩餘現金    : 46158元
  組合淨值    :145838元
  組合本月收益表現:- 0﹒18%(截至上月底止組合淨值:146104元)
  組合累計收益表現:+38﹒89%(本金105000元計)(2016年8月開倉)
 
  *數據截至今日11:00am

全新節目《說說心理話》原生家庭對成長有咩影響?改善溝通有計可施?► 即睇

專家陣容
顯示更多
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力