最新評論  |  
國金點評  |  
中國點評  |  
港股點評  |  
期貨/商品  |  
窩輪/牛熊證  |  
ETF  |  
外匯  |  
基金  |  
強積金  |  
地產  |  
圈中人語  |  
最愛專欄

加入最愛專欄

作者為資深投資者。

15/05/2019 13:31

《古臣周記-古臣》新衍生工具知多啲,一文睇晒「生發發」新搞作

  中美貿易戰突然惡化可以話殺缸友一個措手不及,上星期侵侵一反枱,魚缸上星期一(6日)就先嚟一個「千跌之日」,隔一個星期神州呢邊又話有反制,要喺下個月落實調高花旗國商品關稅,令魚缸攪攪下已經落返28000關差啲無埋牛熊線(約27993)。阿臣今日唔講貿易戰,因為估唔到侵侵佢下一步會點,不過認為缸友最好都睇埋今日QQ(00700)份季績表示成點,因為隨時可以為前幾日連日急瀉帶嚟一個短期反彈,缸友可以想下趁唔趁勢沽貨走人?
 
*生發發季績勝預期,但維持低增長,宜待回調睇位買*
   
  同樣係業績,上個星期生發發(00388)就公布咗首季成績,表現勝市場預期,不過阿臣覺得只係不過不失,話晒上年不論收入同純利都創新高下,喺市底差之下,今年首季維持低增長(淨利增1﹒8巴仙)都算正常,但如果再睇深入啲今次呢份成績好大程度,因為投資收入按年大增1﹒26倍先令到季績勝預期,但如果撇除投資收益同雜項收益,首季收入收入按年跌9﹒4巴仙有34﹒06億。睇埋公仔圖,生發發之前築緊「雙頂」,而且已經穿埋頸線(約263銀)嘅位置,走勢上可能就要再跌,短線嚟睇情況唔太樂觀,可能要到240銀左右嘅位置先有支持,想買入嘅缸友可以到呢個位置先。不過,業績已經過去,講返前景,生發發其實最近都幾多搞作,上個星期先同其QQ在內嘅財團投得虛擬銀行牌照,同時亦宣布會推出幾款新產品同推行新機制。
 
*新上市機制添認購彈性最快年底前有方向*
   
  上年新股有幾熱炒相信缸友都仲記得,最深印象係小米(01810)同美團(03690)呢兩隻同股不同權股份?又或者係升勢頻頻破頂嘅鐵塔(00788)?不過,阿臣今次唔係講呢幾隻魚毛表現如何,而係想講缸友認購呢幾隻大型新股嘅時候,有無遇過同時撞正幾隻新股同時上市,而你又手頭緊,心郁郁唔知認購邊隻新股好嘅時候呢?
  最近生發發就公布咗一個新上市機制,表示未來可能由現時T+5改為T+1,即係由原來新股定價後五日上市,縮減到一日掛牌,而且喺新股認購上亦會有改革,由現時先畀錢後收股嘅形式轉為收到幾多新股先再畀錢,即可無現金認購,變相令以後我哋一眾散戶喺以後市旺兼多IPO上市嘅時候可以有更多嘅流動性,但相關變更可能最快年底前先會有方向。
   
*生發發最快7月推新衍生工具* 
  
  另外,生發發亦會推出兩種衍生工具「界內證」同「單日槓桿證」,前者其實喺上年已經陸續有風聲漏出,今次就話可能會喺7月至9月嘅時候面世。所謂界內證其實喺歐美市場已經一早推出,簡單講,畀內證會限定一個上下限證,兩者差距通常約有一成。
  做個假設,以一隻同QQ掛勾嘅界外證,上下限係400同360銀,只要喺界內證到期日股價喺上述範圍內就有錢收。
  另一種單日槓桿證玩法就相對簡單,主要用於交易日內嘅短線操作,佢設有唔同槓桿倍數,如果相關產品同指數掛勾,若果相關指數升1巴仙,而單日槓桿證做緊5倍槓桿嘅時候,佢嘅價格就可以升5巴仙。
 
*買入渣打冀回購概念,可複製大象急升三成威力*
  
  講返阿臣個倉,金界(03918)今個月2號係除淨日,派咗每股0﹒0291美金股息(相當於0﹒0291港紙),即阿臣會收到902銀股息。不過,金界最近走勢似乎因為人民幣走低而表現麻麻,彈過上10銀之後就無力再上,現時似乎想喺9銀到10銀嘅距離整固橫行,阿臣現時有兩個取態,一係等到再彈上10銀走人,再唔係就坐到中期即大概兩個月先再作打算。
  至於另一隻逆向ETF就由低位急彈,帳面有賺。阿臣諗緊等埋QQ今日出業績先諗加注或走人。阿臣現時手頭仲有好多銀彈,所以噚日(14日)買入幾手渣打(02888),希望佢可以仿傚大象(00005)回購期間急升近三成嘅威力!另外,阿臣亦睇好食品股嘅走勢,暫時留意到中糧肉食(01610)同日清(01475)走勢凌厲,今個星期或睇位買入。
 
  表列截至5月11日(11:00am止)投資組合表現:
  
  股份      股數     平均買入價      現價       總值
  ----------------------------------------
  港股:
  金界     4000股   9﹒65元     9﹒04元    36160元
  FI南方恒指 1000股   5﹒05元     5﹒36元     5360元
  渣打      250股  67﹒50元    68﹒70元    17175元
  ----------------------------------------
  一周買入╱賣出股份
  ----------------------------------------
  股份      每股作價    數量    計及手續費後金額     盈╱虧
                                   (不計手續費)
  ----------------------------------------
  買入:
  渣打     67﹒50元  250股    16926元        --
  ----------------------------------------

  股票市值    : 58695元
  剩餘現金    : 85620元
  組合淨值    :144315元
  組合本月收益表現:- 1﹒22%(截至上月底止組合淨值:146104元)
  組合累計收益表現:+37﹒44%(本金105000元計)(2016年8月開倉)
 
  *數據截至今日11:00am

全新etnet健康網購,送你【健骨維他命D3(1000IU)】乙樽(價值$108)► 立即行動!

專家陣容
顯示更多
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力