上星期五（５日）花旗國嗰邊公布３月份非農就業職位數據，增加１９﹒６萬個比上「孖屐」預期嘅１８萬個為好，暫時緩解咗對經濟前景嘅憂慮，加上侵侵都話四個星期內會公布貿易戰協議嘅詳情，令到魚缸星期一（８日）都跟住外圍高走，重上三萬點，兼連日再創近十個月新高。但諗諗下，魚缸由年初升到今日，都差唔多升逾２０巴仙，加上根據過往經驗，魚缸上完整數關口都會回一回氣，終於今日就借外圍走低而借勢回調兼再穿三萬關口，所以阿臣諗嚟緊不如現時先作部署，幫個倉買返小小貨。
＊金界建Ｎａｇａ３資本開支大，惟超跌可博反彈＊
個股方面，阿臣幾睇好金界（０３９１８）嘅表現，呢隻魚毛上年表現靚仔，本年第一季嘅成績亦保持增長。不過，呢隻魚毛唔係無暗湧，特別係因為旗下柬埔寨發展Ｎａｇａ３項目嘅資本開支令「孖屐」卻步，事關相關資出高達３８億至４０億美金，而早前金界都講過，Ｎａｇａ３會以非博彩元素為主，當中佔大約九成二，淨低８巴仙先係博彩元素。而今次集資雖然有一半會由控股股東提供，但另一半２０億美金就有未有公布細節。阿臣諗「孖屐」可能會擔心緊金界會用供股或配股集資，而且即使唔用股本融資，以２０億美金來講，已經多過上年全年收入１４﹒７億美金，亦幾乎等同手頭現金２５億美金嘅八成，以上年派息率達六成嘅高息股賭股來講，可能會因為發展Ｎａｇａ３減少派息，呢啲都係缸友擔心緊嘅事。
有利淡因素外，但都有利好消息。金界主要服務神州客為主，現時人仔又持續強勢，賭客有望增加。而據柬埔寨機場公司發布嘅資料顯示，今年頭兩個月已經有二百萬人次到訪當地，同比增加７巴仙，其中以金邊國際機場增加最多增幅達１４巴仙。另外，金界之前都話喺俄羅斯海參威嘅賭場預計會喺下年投入營運，以上次開放Ｎａｇａ２嘅威力令純利急增五成三，你又點可以話無前景呢！
星期一（１日）呢隻魚毛急跌之後，阿臣趁佢跌一跌入貨博反彈，睇返上年呢隻股喺跌市下，都表現硬淨。阿臣諗即使第二季有咩波動，應該有一定防守性，百天線（約９﹒４９元）有一定支持。但如果之後公布嗰２０億美集資詳情，令到股價急跌阿臣當然都會先走人。
＊細注買入ＦＩ南方恒指，港股回調跌浪料展開＊
除此之外，根據上幾次魚缸上整數關口嘅經驗，都會有回調嘅機會，阿臣諗住食一食呢波回調嘅浪，買入一啲逆向ＥＴＦ做部署，其中就睇中成交量比較大嘅ＦＩ南方恒指（０７３００），佢嘅入場門檻比較低，一注都係５００銀左右，配合靈活走位，即使阿臣一陣睇錯市都無咁傷，睇啱更加可以加注，進可攻退可守。
上次阿臣因為睇錯隻潤電（００８３６）而損失慘重，從失敗中歸納返上次嘅經驗，睇漏咗潤電喺上年以１蚊人仔轉讓旗下煤炭資產及煤礦畀阿媽華潤集團，而令到上年盤數唔好睇。不過，最攞命都係潤電無預警下減派息，被指唔守３年穩定派息嘅承諾，令到依加股價仲喺近三年低位附近無咩起色。對唔守承諾嘅魚毛，阿臣當然唔會返轉頭，不過從中都警惕阿臣今後都要更加留意每隻魚毛嘅每單交易啊！
表列截至４月１０日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
金界 ２０００股 ９﹒５０元 ９﹒８２元 １９６４０元
ＦＩ南方恒指 １０００股 ５﹒０５元 ５﹒０６元 ５０６０元
－－－－－－－－－－－－－－－－－－－－－－－－－－－－－－－－－－－－－－－－
一周買入╱賣出股份
－－－－－－－－－－－－－－－－－－－－－－－－－－－－－－－－－－－－－－－－
股份 每股作價 數量 計及手續費後金額 盈╱虧
（不計手續費）
－－－－－－－－－－－－－－－－－－－－－－－－－－－－－－－－－－－－－－－－
買入：
金界 ９﹒５０元 ２０００股 １９０３８元 －－－
ＦＩ南方恒指 ５﹒０５元 １０００股 ５０６８元 －－－
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ２４７００元
剩餘現金 ：１２１２８３元
組合淨值 ：１４５９８３元
組合本月收益表現： ０﹒４１％（截至上月底止組合淨值：１４５３８９元）
組合累計收益表現： ＋３９﹒０３％（本金１０５０００元計）（２０１６年８月開倉）
＊數據截至今日１１：００ａｍ
全新etnet健康網購，送你【健骨維他命D3(1000IU)】乙樽(價值$108)► 立即行動！
