最新評論  |  
國金點評  |  
中國點評  |  
港股點評  |  
期貨/商品  |  
窩輪/牛熊證  |  
ETF  |  
外匯  |  
基金  |  
強積金  |  
地產  |  
圈中人語  |  
最愛專欄

加入最愛專欄

作者為資深投資者。

18/09/2019 11:31

《古臣周記-古臣》花旗國今晚勢再減息,未來步歐洲負利率後塵?

  今個月花旗國聯儲局一連兩日嘅議息會議已經喺噚日(17日)開始咗,喺香江時間聽日(19日)凌晨,議息結果同會後聲明就會出爐。講返對上一次議息,亦即係7月尾嘅時候,聯儲局公布減息四分之一厘,係超過十年以來第一次減息。雖然主席鮑叔(鮑威爾)就話只係貨幣政策「中期調整」,並唔代表會進入減息周期,但隨著花旗國同神州嘅貿易戰預料會持續一段長時間,為全球經濟帶來更多唔明朗嘅因素,外界都憧憬呢次議息會議會繼續減息,甚至重啟減息周息,為孖屐釋放熱錢,提振經濟。
  睇返上次減息嘅會後聲明,入面嘅字眼就同六月會議嘅聲明有少少改變,由「維持經濟增長」,轉移到側重預防孖屐風險,並提早兩個月喺8月停止縮表(「縮減資產負債表計劃」),以應對全球經濟前景唔明朗帶嚟嘅影響。之不過,鮑叔喺上月全球央行年會上就無再繼續釋出減息嘅意向,更暗示,聯儲局無義務將國家貿易政策嘅不確定因素,納入聯儲局決策框架考慮。
  
*花旗國將進入減息周期?*
    
  未來花旗國會否同其他央行一樣步入減息周期,就要靜觀呢次聯儲局嘅減息決定。但自從七月底減咗一次息之後,有唔少大行都預期花旗國會繼續減息,而且利率仲會去返「零」嘅水平,甚至好似歐洲央行咁將利率降至「負」嘅水平。其中大摩同美林美銀喺八月嘅時候都曾預期,因應花旗國經濟有機會出現衰退,加上貿易戰嘅局勢一旦升級,利率會逐步降至0至0﹒25厘。大摩更指出,今年9月同10月預期會再分別減四分一厘,明年會減4次息。
  另外,花旗國總統侵侵(特朗普)一直都催促聯儲局減息,因為歐洲正以減息嚟對抗近月走強嘅美元,損害花旗國出口。依家東瀛國同歐洲都相繼實行「負利率」,而且如果按照實際經濟嘅通脹率嚟調整,其實好多國家已經進入負利率時代。究竟花旗國會唔會步後塵,推出負利率?實行起上嚟成效又會係點呢?
 
*負利率對谷經濟有無效?*

  當實行負利率時,央行會對超額嘅準備金收取番「儲存費」(利息),間接逼使銀行將錢借出。不過,對於負利率提振經濟嘅作用就有唔同意見。理論上,降低利率有助促進企業借貸,維持經濟擴張。以東瀛國為例,東瀛國銀行喺2016年實行負利率之後三年內,食品價格由原來按年下跌0﹒3%,轉升0﹒9%。但日銀預測,估計到2020年都仲未可以達到2%嘅通脹目標。實行負利率除左唔一定帶來持續嘅經濟擴張,仲會帶來反效果。
  有分析指,實施負利率之後,因為融資成本下降,企業靠加價維持盈利嘅壓力會少左,再加上經濟不景,可能出現過度競爭,導致物價下跌。整體而言更會拉低物價、潛在增長率同埋生產效率。此外,如果央行喺負利率嘅基礎上繼續減落去,銀行嘅利息收入大削之餘,市民存款嘅意欲都會下降,整個銀行體系就失去左作為金融中介嘅角色,不利鼓勵投資。所以,係咪實行負利率都要經過好多考慮,唔可以一味以為減息就可以幫到個經濟。
  呢幾日孖屐都會對聯儲局議息持觀望態度,所以阿臣都選擇按兵不動。如果局方繼續放鴿,則削弱美元走勢,利好金價,到時就可以放心部署定啲黃金股啦。

  表列截至9月18日(11:25am止)阿臣投資組合表現:

  股份      股數     平均買入價      現價       總值
  ----------------------------------------
  港股:
  金界     2000股   9﹒65元     12﹒08元  24160元
  煤氣     1000股  16﹒00元     15﹒62元  15620元
  ----------------------------------------
  股票市值    :  39780元
  剩餘現金    : 120178元
  組合淨值    : 159958元
  組合本月收益表現:   +1﹒7%(截至上月底止組合淨值:157318元)
  組合累計收益表現:  +52﹒3%(本金105000元計)(2016年8月開倉)
 
  *數據截至今日11:25am

全城注視!銀行定存比較神器,助你搵到最佳息率!► 立即了解

專家陣容
顯示更多
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 落單即送保健品!