《小傳日記》豬年多事艱難，魚缸稍彈收爐！

　　武漢肺炎繼續肆虐神州，根據最新消息確診病例增至８３０宗，搞到個「孖屐」繼續「震騰騰」。大隻佬指數雖然今朝高開２６點報２７９３５點，但無耐「孖屐」立即走低，最多跌１３５點報２７７７４點。但「孖屐」噚日（２３日）似係瀉得太勁，搞到有Ｄ「死貓彈」，雖然幅度唔勁，但起碼令大隻佬指數止跌回升。當中指數係有大行吹捧的神州移動（００９４１）、生發發（００３８８）、同濠賭股做火車頭帶領下反彈，令大隻佬指數曾經最多升返６８點見２７９７７點。今日係豬年最後交易日，「孖屐」只有半日市，最終全日指數報２７９４９，升４０點，好彩守得住條牛熊分界線（約２７７０８點）。主板成交４７３﹒２２億銀。國企指數報１０９７６點，升２３點。
　　整個豬年，大隻佬指數喺２４８９９至３０２８０之間上落，全年收跌４０點。國指豬年喺９７３１至１１８８１點波動，跌６０點。

＊大行睇好好電訊財神到，孖屐向上伸藥股走勢分＊

　　睇睇半日市大隻藍戰士，ＱＱ（００７００）升２亳子報３８５﹒８銀；ＡＩＡ（０１２９９）同樣升２亳子報８３銀；大象（００００５）軟２亳子報５８﹒７５銀；生發發走高近１巴仙，報２７１﹒４銀；建行（００９３９）無升跌，報６﹒４３銀。
　　野村最近話神州移動該公司噚日股票期權激勵計劃，反映管理層對公司的長遠發展有信心，搞到神州電訊股表現興奮。神州移動抽高近３巴仙，報６９﹒７銀，係表現最勁藍戰士；神州聯通（００７６２）走上近１巴仙，報６﹒８銀；神州電信（００７２８）升一格報３﹒１６銀；神州鐵塔（００７８８）軟一格報１﹒７５銀。
　　武漢肺炎疫情雖然愈來愈嚴重，但今日「孖屐」就稍為回暖，而藥股嘅走勢就兩邊走。東陽光藥（０１５５８）插低約半成，報４６﹒７元；中生製藥（０１１７７）走低近１巴仙，報１１﹒４８銀；石藥（０１０９３）插低逾１巴仙，報１８﹒７銀；石四藥（０２００５）彈起逾６巴仙收７﹒８２銀；翰森製藥（０３６９２）鏟高４巴仙，報２８﹒１銀；康希諾生物（０６１８５）炒高近４巴仙，報６７﹒５銀。

＊肺炎續蔓延內需遭牽連，神州封城計飛機好安慰＊

　　武漢型冠狀病毒肺炎疫情繼續蔓延，但有Ｄ消費佬反而走好。體操王子（０２３３１）跳高逾２巴仙，報２５﹒８銀。維達國際（０３３３１）好威水，今日最高見１９﹒６２銀，繼續創四年半高高，收彈逾７巴仙，報１８﹒９銀。九毛九（０９９２２）彈起逾３巴仙，報９﹒２９銀。部分消費佬就唔太生性，旺旺（００１５１）挫近１巴仙，報６﹒８９銀；青啤（００１６８）跌７毫半，報４７﹒２５銀。安踏（０２０２０）滑低一格收７３﹒０５銀。
　　為咗防止病毒擴散，神州政府破天荒「封城」，仲公布即日起機票免收退票費，畀返啲信心孖屐，神州鐵鳥個價輕輕走上。東航（００６７０）微升兩格，報３﹒７９銀；首都機場（００６９４）升五格，報６﹒４１銀；國航（００７５３）同南航（０１０５５）齊齊上一格，分別報６﹒７２銀同４﹒６６銀，國泰（００２９３）同旗下嘅港龍今日起都停飛武漢，微升半個巴仙報１０﹒２銀。

＊生產有得賺中芯博反彈，濠賭跌過龍買盤春風送＊

　　晶片佬造好，中芯（００９８１）之前畀高盛調升目標價，由１６﹒３銀上調至１８﹒４銀，評級就維持「買入」。話佢下半年開始為韋爾半導體生產４８００萬像素ＣＭＯＳ影像感光傳感器，而手機相片質量提高，中芯盈利就會增加，隻股今日Ｖ型反彈，開市初段跌近３巴仙之後回升，收彈逾４巴仙，報１６﹒１４銀；華虹半導體（０１３４７）走高近兩巴仙報２１﹒２５銀；ＡＳＭ太平洋（００５２２）彈高逾１個巴仙，報１１５﹒５銀。
　　馬交噚日朝早確診第二單武漢新型冠狀病毒病例，特首賀一誠就話，預計最壞嘅情況係過年之後，因為人流由全國各地返番馬交，如情況再嚴峻不排除閂賭場呀。賭仔今朝都仲跌緊，過咗陣就有資金撈低，新濠（００２００）走高兩格，報１８﹒５４銀；永利馬交（０１１２８）跌一毫六，報１８銀；美高梅（０２２８２）滑逾半個巴仙報１２﹒３銀；銀娛（０００２７）起飛四毫半子，報５６﹒０５銀；金沙（０１９２８）跳逾１巴仙，報４１﹒３銀；澳博（００８８０）升不到半個巴仙，報９﹒１８元。
　　小傳祝願大家鼠年賺多Ｄ，身體健康，事事順意。請請！

　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。