《小傳日記》成交萎縮冇方向，好友淡友感惆悵！

　　「孖屐」靜候今個禮拜後半段嘅重磅消息，搞到缸友掃貨意欲低，隔晚（９日）花旗國魚缸都結束三連升回吐，而香江魚缸則全日好淡爭持。今朝恒指低開１１６點，報２６３７８點。其後神州統計局公布１１月居民消費價格指數（ＣＰＩ），按年升４﹒５巴仙，高過預期嘅４﹒３巴仙；生產者物價指數（ＰＰＩ）按年碌低１﹒４巴仙，低過「孖屐」預期嘅１﹒５巴仙，但缸友都係冇咩反應，魚缸再插１３９點，全日低見２６３５６點。
　　隨後，內房佬同內險佬力撐大市，一度止跌回升３３點，報２６５２７點，為全日最高水位。但臨近埋單唔少缸友開始食胡離場，早排熱炒嘅內需佬都一齊跌落嚟，加上本地磚頭佬腳軟，魚缸升勢都係維持唔到，最終埋單唔見５８點或唔夠半巴仙，報２６４３６點。主板成交只有６１７億銀，較上日少咗５巴仙。國貨收報１０３９５點，跌１２點或唔夠半巴仙。
　　Ａ場方面全日低開高走。上證綜指報２９１７點，升２點。深成指報９９１５點，升３９點。兩市成交加埋有４６６５億人仔，較上日少１巴仙。
　　重磅藍戰士方面，大象（００００５）公布高層變動名單，全日少咗１毫，報５７﹒６銀；生發發（００３８８）跌逾半巴仙，報２４５﹒４銀；ＱＱ（００７００）升６毫，報３３６﹒８銀；神州移動（００９４１）冇升跌，報６０銀；ＡＩＡ（０１２９９）跌唔夠半巴仙，報７７﹒４銀；建行（００９３９）升１仙，報６﹒３１銀。
　　另外，申洲（０２３１３）連升三日後，今日回吐逾三巴仙，仲失守多條移動平均線，收報１０４﹒６銀，係全日跌得最慘嘅藍戰士！

＊出口量有勢半導體矜貴，花旗雖然讚車佬卻感嘆＊

　　有神州券商做咗個數據，話半導體呢期回暖，１０月集成電路出口按年升近一成。半導體都抽高賀賀佢！華虹半導體（０１３４７）漲近６巴仙，報１８﹒５２４銀；中芯（００９８１）彈近３巴仙，報１１﹒１４銀；ＡＳＭ太平洋（００５２２）升近１巴仙，報１０７﹒７銀；上海復旦（０１３８５）唔知做乜，反跌逾１巴仙，報５﹒５７銀；太睿國際（０１０１０）踢高逾６巴仙，報１﹒１３銀。
　　早一排神州車佬苦過弟弟，因為神州換車無補帖，行業步入寒冬咁款，但大行花旗就話啦，吉利（００１７５）１１月銷量勝預期，覺得佢明年可能有勁車出，維持行業首選。但車佬今日表現榮辱互見，吉利升唔夠半巴仙，報１４﹒８８銀；廣汽（０２２３８）有追捧都升逾１巴仙，報８﹒９２銀；華晨（０１１１４）微升唔夠半巴仙，報８﹒３２銀；比亞迪（０１２１１）跌唔夠半巴仙，報３７﹒２銀；長汽（０２３３３）慘慘豬，因為１１月銷量按年跌一成三，所以股價跪低逾２巴仙，報５﹒６６銀。

＊賣樓成績強內房又上揚，保單收入高內險真風騷＊

　　重記得幾個月前，個個都擔心神州賣樓數據差，但事實證明上面班磚頭佬一樣咁勁！其中３２間房企已經公布首１１月銷售業績，銷售額達５﹒６萬億人仔，已經跑贏咗舊年全年，今日內房佬都飛高高！中海外（００６８８）就踢高逾２巴仙，報２８﹒４５銀，係全日表現最好藍戰士；潤地（０１１０９）最後無升跌，報３５﹒９銀；碧桂園（０２００７）升近半巴仙，報１１﹒３６元；但四條三恒大（０３３３３）就潛水逾兩巴仙，報１９﹒２８銀。
　　話說，太平（００９６６）旗下太平再保險個ＣＥＯ今日講兩句，話舊年廣東同香江保費收入相當接近，相信香江同神州保險業融合之後，發展空間巨大。今日內險佬全線飛高，太平抽升近兩巴仙，報１８﹒６４銀；新華保險（０１３３６）都飛起近３巴仙，報３１﹒５銀，係全日表現最靚仔嘅國貨佬；財險（０２３２８）升近２巴仙，報９﹒３４銀；太保（０２６０１）漲近２巴仙，報２８﹒５銀；國壽（０２６２８）彈近半巴仙，報２０﹒２銀。

＊基金出貨走體品跌到嘔，大市向下走食品又要抖＊

　　自從安踏（０２０２０）上星期五（６日）公布咗全年預計賺多４５個巴仙之後，唔少缸友竟然借好消息出貨，安踏仲要跌到「攤攤腰」！睇嚟基金佬要出貨，擋都擋唔住呀！安踏插水４巴仙，報７０﹒７５銀，係表現最差嘅國貨佬！李寧（０２３３１）蒸發逾６巴仙，報２３﹒８銀；特步（０１３６８）漏氣跌２巴仙，報３﹒８５銀；神州動向（０３８１８）跪低１巴仙，報０﹒８２銀；３６１度（０１３６１）反而踼高近１巴仙，報１﹒３５銀。　
　　食品佬早排開完Ｐａｒｔｙ，但總有散水嘅一日，睇嚟今日就係啦！達利食品（０３７９９）唔見２巴仙，報５﹒６８銀；維他奶（００３４５）走低１巴仙，報２８﹒０５銀；旺旺（００１５１）跣低２巴仙，報６﹒９１銀；周黑鴨（０１４５８）撻低１巴仙，報５﹒１２銀；反而統一（００２２０）有料到，彈起近半巴仙，報８銀；康師傅（００３２２）都跳起超過半巴仙，報１２﹒７銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。