《小傳日記》ＱＱ季績好失望，魚缸再挫心惶惶！

　　有傳花旗國同神州嘅貿易談判喺農產品採購嘅議題上有分歧，但隔晚（１４日）花旗國孖屐仍繼續創新高。香江呢邊朝早（１５日）嘅交通仲未恢復正常，各區仍有堵路，加上大隻藍戰士ＱＱ（００７００）噚日放榜業績差過預期，拖累魚缸低開１２７點報２６４４４點。孖屐早段曾出現反彈，最高見２６６０５點升３４點。不過，神州十點鐘公布多項重磅數據，包括工業增加值、社會零售同固投都差過預期，魚缸開始回落。午後，傳出香江特首即將宣布喺周末實施宵禁令，雖然事後有澄清是誤傳，但孖屐跌幅擴大，最低見２６２０３點跌３６７點。最終，魚缸收報２６３２３跌２４７點，跌幅近１巴仙。主板成交７４４﹒５４億銀減少近６巴仙。　
　　國貨報１０４２７，跌９１點或近１巴仙。
　　Ａ場上升，上證綜指報２９０９，升４點；深成指數報９７４６，升５８點，兩市成交３８７８億人仔。
　　大隻藍戰士方面，ＱＱ第三季盈利按年跌一成三，加上阿里巴巴（０９９８８）就嚟落戶香江，急挫逾２巴仙，報３１９﹒８銀，仲係全日表現最差嘅藍戰士。傳阿里今次集資額再度縮水至最多１３４億美金，生發發（００３８８）軟２亳子，報２４２銀。本地多區包括中環繼續有示威者快閃活動，大象（００００５）跌近１巴仙，報５７﹒９銀。ＡＩＡ（０１２９９）走低近２巴仙，報７６﹒４銀。建行（００９３９）滑近半巴仙，報６﹒１８銀。神州移動（００９４１）跌近１巴仙，報６１﹒２銀。

＊花旗大唱好瑞聲踢高高，政局未平息地產佬忐忑＊

　　手機設備佬今日普遍踢高，瑞聲（０２０１８）更加係全日表現最好藍戰士，因為花旗之前話「孖屐」好似低估咗蘋果公司對瑞聲明年上半年嘅推動，所以升「他屐」一半到６６銀，最終收漲近４巴仙，報５０﹒３銀。佢兄弟舜宇光學（０２３８２）都跟住起哄近１巴仙，報１２４﹒４銀。富智康（０２０３８）上季持續經營上出現盈利２００２﹒９萬美金，而去年同期仲蝕緊錢，所以全日都踢高近４巴仙，報１﹒１３銀。另外，比亞迪電子（００２８５）亦撐實升近１巴仙，報１４﹒２４銀。丘鈦科技（０１４７８）升逾１巴仙，報１０﹒９２銀。
　　香江本周連日示範活動未有減少，缸友繼續追住掟，一眾地產佬都好忐忑，全線縮水。恒隆地產（００１０１）撻低逾１巴仙，報１６﹒０６銀。新地（０００１６）跣低逾１巴仙，報１０８銀。信置（０００８３）劈逾１巴仙，報１１﹒３２銀。恒地（０００１２）剎車近１巴仙，報３６﹒９５銀。收租佬亦怕怕，太古Ａ（０００１９）大劈逾２巴仙，報６８﹒０５銀創逾年半新低。領展（００８２３）畀麥格理、匯證、大和、高盛降「他屐」，今日撻低近２巴仙，報７９﹒７５銀。九倉置業（０１９９７）剎車逾１巴仙，報４１﹒７５銀。

＊孖屐繼續弱資金棄醫藥，魚缸好濕滯食品佬咪制＊

　　香江最近示威及堵路活動愈來愈多，魚缸愈跌愈有，搞到啲資金都要拋棄醫藥佬啦。早排風頭好勁嘅康哲藥業（００８６７）碌低３巴仙，報１１﹒６銀；中生製藥（０１１７７）輕輕跌唔夠１巴仙，報１１﹒３銀；三生製藥（０１５３０）走低１巴仙，報１２﹒６４銀；綠葉製藥（０２１８６）跳低１巴仙，報６﹒２銀；石藥（０１０９３）唱反調，走高１巴仙，報２１﹒１銀。
　　個魚缸搞到咁，食品佬當然都散水啦。日清食品（０１４７５）再挫近４巴仙，報５﹒６９元，七連跌累挫逾２０巴仙；旺旺（００１５１）跌接近１巴仙，報６﹒４１銀；維他奶（００３４５）軟唔夠半個巴仙，報３２﹒３銀；康師傅（００３２２）噚日雖然有大行調高「他屐」，但都跣低一格報１２﹒０２銀；統一（００２２０）六連跌之後就終於識停，逆市微升逾半個巴仙，報７﹒５７銀。

＊神州推國策水泥向下壓，資金尋避險物管升勢現＊

　　話說最近國務院又有新策推出，包括降低部分基礎設施項目嘅最低資本金比例，即係想降低搞基建嘅入場費；其次，呢類項目可以發行相關金融工具集資。水泥佬立即開心到彈起，早段都曾經升過，但午後股價反而失守，海螺水泥（００９１４）微跌逾半巴仙，報４７﹒２５銀；華潤水泥（０１３１３）尾市反彈逾半巴仙，報８﹒７７銀；山水水泥（００６９１）挫逾２巴仙，報２﹒４７銀；亞洲水泥（００７４３）潛逾１巴仙，報９﹒５６銀；中建材（０３３２３）跪低近１巴仙，報６﹒９８銀。
　　「孖屐」今日又跌到落貼近二萬六關，資金都搵避險產品，物管股一直都係缸友最愛，部分仲有唔錯升幅，其中永升生活（０１９９５）升６巴仙，報４﹒９３銀；奧園健康（０３６６２）都踢高近１巴仙，報６﹒３５銀；中海物業（０２６６９）微漲近半巴仙，報４﹒９銀；綠城服務（０２８６９）漲逾１巴仙，報８﹒７４銀；雅生活服務（０３３１９）升逾半巴仙，報２５﹒５銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。