《小傳日記》孖屐有鑊氣，高收做結尾；磚頭佬瞓醒，藥佬升得勁！

　　花旗國「孖屐」走勢分歧，但道指仍然可以保持高收，但今早（１６日）香江魚缸就表現牛皮，應該因為無咩特別消息，加上債息倒掛同埋中美貿易戰，大家都繼續觀望下先。恒指今朝低開１０點後都一度最多蒸發１８１點，低見２５３１４點。
　　不過，之後又突然拗腰由跌轉升，午後升幅仲進一步擴大添，睇嚟缸友買力都幾強下，之前積弱嘅磚頭佬連日反彈，撐起今日魚缸表現，加上藥品股同奶業股都谷底回升，恒指最終收報２５７３４點，升２３８點或近１巴仙，成交額９１５億銀跌約半巴仙。國貨跟升６０點，或約半巴仙，報９９６４點。
　　Ａ場今日走勢向好，上證收報２８２３點，升８點；深指收報９０６０點，漲５１點或半巴仙。兩市合共成交４３０２億銀人仔。
　　大隻藍戰士今日都發牛逗，大象（００００５）微潛半巴仙，報５６﹒５銀。生發發（００３８８）隨市急漲近３巴仙，報２４５銀。ＱＱ（００７００）跌逾１巴仙，報３２６﹒４銀，不過已係今日最差藍戰士；中移動（００９４１）跌一格報６６﹒０５銀；ＡＩＡ（０１２９９）表現造好，升近２巴仙報７６銀。

＊磚頭有鑊氣嘉里股價飛，阿爺好關注內房走勢輸＊

　　磚頭佬今日鑊氣漸強，個個都都落力炒一番，因為施政報告又到，大家憧憬佢會唔會係農地落手，而且大行花旗話，如果政局轉穩，樓價就會開始上升。嘉里建設（００６８３）急漲逾４巴仙，報２８﹒７５銀；恒地（０００１２）飛起逾２巴仙，報３８﹒２５銀；新地（０００１６）升近４巴仙，報１１６﹒８銀；新世界（０００１７）踢高逾６巴仙，報１０﹒４２銀，重做埋最佳藍戰士；長實集團（０１１１３）撐高４巴仙，報５３﹒６銀。
　　發改委近期又出聲，話對房企發債收緊，係一種規範管理措施，要防範房地產企業發行外債可能存在的風險。內房佬籌錢難度又大增，真係慘慘豬，內房佬本身都跌幅顯著，但尾市反而有資金抄底，其中中海外（００６８８）轉升近半巴仙，報２４﹒８銀；融創（０１９１８）平收報３２﹒７５銀；龍頭碧桂園（０２００７）漲近半巴仙，報９﹒４５銀；萬科企業（０２２０２）微跌半巴仙，報２７﹒２５銀；中國恒大（０３３３３）跌逾１巴仙，報１７﹒６銀。

＊澳優彈力強蒙牛齊向上，黃金需求高紫金勢頭好＊

　　近排個孖屐都幾反覆，一啲內需股好似奶製品都有資金泊入去。今日走勢最突出嘅當然就係噚日被沽空機構殺人鯨資本狙擊嘅澳優（０１７１７），佢噚日急瀉逾兩成之後停牌，今朝反駁所有指控後復牌，全日反彈近一成四，報１１﹒０８銀；同業蒙牛（０２３１９）亦表現唔錯，漲近４巴仙，報３０﹒９銀；Ｈ＆Ｈ（０１１１２）走高近２巴仙，報３９﹒９銀；現代牧業（０１１１７）踢高近８巴仙，報１﹒１１銀。
　　花旗國日前兩年期同十年期債息曾經出現倒掛，缸友都擔心花旗國經濟唔多掂，刺激金價急升。隔晚（１５日）金價升至１５３１﹒２美金，繼續穩守喺１５００美金關口之上，黃金股自然水漲船高。山東黃金（０１７８７）早段曾抽高逾４巴仙，收升逾１巴仙，報１９﹒９４銀。招金礦業（０１８１８）無幾耐就回吐所有升幅，最終軟唔夠半巴仙，報１０﹒６８銀；中國白銀（００８１５）就仲有得升近２巴仙，報１﹒１８銀；紫金礦業（０２８９９）亦踢高近２巴仙，報３﹒０８銀。
　
＊孖屐暫回穩賭佬有覺瞓，等派成績單藥股向上翻＊

　　孖屐氣氛改善，馬交佬都飲得杯落。永利（０１１２８）上半年盈利達少賺７巴仙，股價仍走高逾４巴仙，報１６﹒３銀，收復１０天線（１５﹒７６４銀）；銀娛（０００２７）揚近３巴仙，報４６﹒８５銀；金沙（０１９２８）亦升近２巴仙，報３４﹒９５銀；新濠（００２００）漲逾２巴仙，報１６﹒５銀；澳博（００８８０）踢高逾２巴仙，報７﹒４２銀；美高梅（０２２８２）急升近３巴仙，報１１﹒７２銀。　
　　唔少藥股都喺下星期放榜，成個板塊都落獲熱炒，其中藍戰士石藥（０１０９３）下星期一（１９日）放榜，飆逾４巴仙，報１２﹒４４銀；同一日放榜嘅藥明康德（０２３５９）仲盤中高見７７﹒７５元，創上市新高，收市亦揚近半成，報７６銀；另一隻藍戰士中生製藥（０１１７７）都起哄近４巴仙，報９﹒４２銀；白雲山（００８７４）急漲近９巴仙，報３０﹒５銀；石四藥（０２００５）更飆近７巴仙，報６﹒２８銀。周末愉快！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。