每逢「雙十一」、「雙十二」，我隻手都會好誠實咁掃部手機，睇下有咩筍嘢可以入手，最緊要係：「親，香港包郵嗎？」

京東聽日上市，你又有無中獎呢？（Shutterstock圖片)

　　聽日6月18日，就係京東（09618）上市日子；恰巧地，阿里巴巴（09988）呢一期做緊「618節慶」。究竟618呢個神祕數字有乜乾坤？今日就同大家做一集「神秘數字大揭秘」！

京東618創立，阿里想分一杯羹

　　唔使搞到好似「怪談」咁嘅，其實6月18日係京東成立嘅大日子，搵返資料，京東向1998年6月18日創立，喺2004年推出「京東618」周年慶，由每年6月1日起至18日，係京東平台買嘢都有優惠。2019年嘅節慶入面，累積下單金額就高達2015億人民幣，真係誇張到爆！連京東上市號碼都係「9618」，就知道呢個日子幾重要！

淘寶都有618，有部份嘢真係幾抵買！（Shutterstock圖片)

　　隔籬阿里巴巴同天貓見到，又點會放過呢啲日子？近呢幾年照辦煮碗，照搞一個「淘寶618」，一樣派紅包派優惠券。雖然好似幫人地慶祝生日，怪怪地咁。不過唔理黑貓白貓，總之賺到錢就係好貓啦！

劉強東上市前辭任主席，唔通另有「任務」？

　　「618」上市大日子前夕，公司管理層就大變動，有內地媒體翻查資料，發現主席劉強東係本月１１日已經辭去「北京京東世紀貿易有限公司」等五間公司職務，惹來市場關注，公司亦似乎無任何表態。

劉強東突然退位，唔知有乜可解讀呢？（CNS圖片）

　　無獨有偶，騰訊（00700）主席馬化騰去年9月已經辭去「騰訊徵信公司」法定代表人及董事職位，上個禮拜仲賣出965萬股騰訊，套現43億；而阿里巴巴創辦人馬雲都同樣喺去年9月辭任公司董事局主席。

　　今次輪到劉強東，唔通另有「任務」留畀佢？真係耐人尋味啦。

奶茶妹成人生贏家，584億身價排入富豪榜

　　10年前互聯網流傳一張「奶茶妹」嘅少女圖，睇過嘅人都真係「時代的眼淚」。「奶茶妹」章澤天當年拎杯奶茶影咗張相就一炮而紅，原來佢中學畢業後入咗清華大學人文科學實驗班，2013年去美國做交流生，當年劉強東都同樣喺美國，佢地兩個就係咁邂逅啦！

原來當年「奶茶妹妹」已經變身，不過氣質依然。（上圖為其IG照片，下圖為網絡照片）

　　雖然佢地兩個年齡相差19歲，但愛情嘅好難講，二人喺2015年結婚，而章澤天亦都加入公司，負責時尚品牌拓展，平時仲會做下公益事務，真係人靚心更靚。據內地「2020新財富500富人榜」公布，劉強東同章澤天兩位合共身價584﹒2億元人民幣（約638﹒2億港元）排31位，亦令年僅27嘅奶茶妹成為本年度最年輕富豪！

撰文：李皆穎