• |
  • 極速報價
  • |
  • 會員
  • 產品服務 / 串流版
  • 設定

02/01/2020

【巿場策略】從一支唇膏、一部打印機的壽命,揭露生產商操控消費的背後設定!

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  當大家用完一支唇膏後,不妨試試將唇膏樽身打開,好有可能仲有好多未用嘅唇膏藏喺樽身內,見過某大牌子嘅潤唇膏,「用盡後」仍有大約20-30%嘅唇膏藏喺樽身,但因為樽身嘅設計關係,如果消費者以正常方法使用,係永遠唔可能用到餘下30%嘅唇膏。其實類似情況並非新事物,尤其係一啲消耗性產品,生產商用方法去「控制產品壽命」可謂十分常見嘅事。

 

  多年前曾經有個江湖傳聞,指某外國打印機公司出產嘅打印機同墨盒,加插咗特別嘅程式去控制墨盒同打印機嘅壽命,例如只要墨盒用上特定次數後,就算墨水未完全用盡,打印機都必定會出現換墨提示;又或者打印機用上特定次數後,程式就會顯示有零件損壞,需要更換。咁做除咗能夠間接令消費者加快購買新墨盒/新打印機之外,當生產商回收墨盒/「舊」零件時,亦能取回部分墨水同有用零件,可謂一舉兩得。坊間有程式設計師指,只要reset打印機至原廠設定時,損壞嘅零件係有復原嘅機會。當然打印機公司一直否認有關投訴,但至今仍然有人會因為相關事件而作出投訴。

 

  基於商品說明條例,生產商好難減少產品嘅成分/分量,一支寫明有3.5g嘅唇膏,就一定足3.5g。另一方面,生產商亦難以控制用家嘅使用次數/方法,所以如果要令消費者加速消費的話,一係就加快推出新型號產品,去取代舊有產品;一係就加快產品消耗嘅速度,所以就出現「控制壽命」類似嘅設計。有陰謀論指,其實政府係暗暗地允許大型企業有呢一個「控制壽命」嘅設計,因為加速消費者消費,能夠帶動經濟增長,對國家有正面嘅發展。當然,呢個設計對消費者就未必一定係好事。

 

  所以以後大家發現,如果當有新型號嘅產品推出時,自己手上舊型號產品就會經常失靈、無故hang機,你因為咁而有計劃換機的話,不妨停一停、諗一諗,可能失靈只係一場誤會。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生