• |
  • 極速報價
  • |
  • 會員
  • 產品服務 / 串流版
  • 設定

26/12/2019

【品牌價值】政府停止回收玻璃樽的啟示:沒有堅持做好品牌價值,怎能留住消費者!

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  早兩日返工前,順手攞起屋企三個已經清空嘅玻璃樽,諗住帶到屋苑嘅玻璃樽回收箱。點知發現原本放喺三色回收箱旁嘅玻璃回收箱不翼而飛。

 

  「呢排唔收玻璃樽㗎啦,你當垃圾掉咗佢啦。」

 

  坐喺更亭嘅管理員大叔見我兩頭望,大叫出嚟提醒我。

 

  由於趕住返工,無奈將三個玻璃樽掉入垃圾桶。

 

  翻查資料,原來環保署上個月已經喺網站宣布,從「11月16日開始,政府委聘的玻璃管理承辦商暫時停止廢玻璃容器回收服務,並收回設置在各回收點的玻璃樽回收桶。政府會因應社會情況的發展來為不同地點的廢玻璃容器回收服務作出合適安排。 」

 

  原來係環保署帶頭唔畀人做玻璃樽回收。

 

  每個品牌都有自身擁抱嘅價值,該品牌推出嘅產品,宣傳嘅語句,甚至面對客戶時嘅反應,就係正正體現該品牌價值嘅時候。消費者選擇一個品牌,除咗因為產品質素好,服務水平高,而家亦愈來愈多人會因為價值觀相近,而選擇喺某品牌消費。但如果一家公司一時一樣,價值觀隨風擺柳,試問又點可以說服消費者相信你嘅品牌?

 

  商業世界需要做品牌(branding),政府機構其實亦然。所以政府近年不斷投放資源搞「匿獅 Lion」、「大嘥鬼」等等嘅 campaign,希望令宣傳更貼地。根據環保署網站,佢哋嘅抱負係「鼓勵市民重視環保,為自己和下一代着想,貫徹可持續發展」,而使命係「致力提高社會對保護環境、能源、自然保育及可持續發展的意識,並推動公眾支持相關工作」。但諷刺地,佢哋喺上個月停止咗玻璃樽回收。環保署今次嘅做法亦即話畀大眾市民聽,環保只適用於太平盛世之時,以往十幾年來教育大家要「將環保變成習慣」亦已經不再適用。

 

  相同邏輯如果喺政府部門推而廣之,我相信喺不久將來,通訊事務管理局將會管制廿五歲以下人士使用手提電話,教育局更會停止中學嘅體育課(以免青少年嘅體格太過強壯)。當政府呢一個品牌唔再 care 環保、科技同市民健康等嘅民生議題,大家唔需要驚訝,因為我哋早已唔再係呢個政府嘅 target audience。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生