• |
  • 極速報價
  • |
  • 會員
  • 產品服務 / 串流版
  • 設定

04/10/2018

【員工又走佬】老細是罪魁禍首!返工一星期就發現「上咗賊船」

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    我做Marketing

    本欄每周四更新

  「返新工只係一個星期,已經日日朝九晚十二,上司又放緊產假,而家事無大小都係自己一腳踢。雖然話請咗個executive返嚟幫手,但其實分別不大,每日都係得自己一個人留守公司到最後一刻。咁辛苦都唔知為乜~」朋友返新工兩星期後,最終因為覺得公司「唔對路」而遞信辭職。

 

 

  早前有外國專家就「新員工離職原因」作調查,發現有70%受訪者,會因為「上司冇給予適當嘅教導或工作指引」而辭職。相信呢個現象係香港極為普遍,有部份原因係上司唔願意教下屬,就算肯教,一係就「hea教」,一係冇時間慢慢認真教,最後員工會因為學唔到野,或覺得唔受尊重而離開。有20%受訪者辭職係因為「人事問題」,同事間未能好好溝通,加上職場「小圈子」特別多,亦係新員工離開原因之一。另外有5%受訪者因為「工作環境不似預期」而走人。最後5%係因為其他不同原因等等。其實員工萌生離職嘅念頭,好多時都係基於三個原因,「工作內容」、「工作環境」、「工作機會」。

 

1. 工作內容

 

 

  如果新員工返工後第一個星期就辭職,好多時都係因為工作內容上出現問題。新員工返工幾日後開始發覺「貨不對辦」,同最初見工時協議嘅工作內容/工作量有異,加上人工唔能夠cover 多出嘅工作量,員工最終因為覺得自己「上咗賊船」而辭職。

 

  喺香港打工,工作量必定只會有增冇減,出現「貨不對辦」嘅情況在所難免。但作為上司,喺作出改變之前,最好定一個時間/終點,令佢哋知道自己嘅辛苦只係一時,而唔係永遠。就算呢個係一個長時間嘅改變,都要令員工知道該改變嘅遠景同價值,可能忙完後會加人工,可能得到嘅經驗對佢前途有幫助等等。當然,上司千萬唔好開空頭支票啦~

 

2. 工作環境

 

 

  新員工面對嘅第二個關口就係「試用期完結」,接受老細第一次正式嘅評價。可能係一致好評,亦可能過唔到probation,呢個評核就正正反映出員工同老細嘅理念係咪一致。另一方面,喺probation呢三個月裏,好多新員工都會問自己「究竟係自己『適應』咗個工作環境,定還是係被迫『接受』呢個環境?」,呢啲都係員工喺probation完結前/後會考慮辭職嘅原因之一。所以上司除咗要評價同事工作能力之外,亦要了解佢哋對工作環境及同事之間嘅情況,作適當嘅協調。

 

3. 工作前景 

 

 

  最後關口就係做滿一年嘅review。員工大致完全了解公司嘅運作同前景,開始諗如果繼續留喺呢間公司,對自己嘅前途有冇好處、晉升機會會唔會不似預期、有冇發揮空間等。公司未來嘅發展、該同事嘅定位、同事嘅career path,都係老細必需喺是次review中簡述嘅內容,令同事有值得留低嘅原因。

 

  外國有好多公司都會制定迎新指引,俾其他在職同事作參考,例如所有員工一定要記住新同事嘅名稱,同組嘅同事最少要同新同事食午餐一次等等。如果公司只係花少少時間同資源,就能夠留下一個好員工成為長期伙伴的話,絕對比花錢請過一個新同事更為值得。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

我要回應

你可能感興趣

放大顯示
風水蔣知識

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ