• |
  • 極速報價
  • |
  • 會員
  • 產品服務 / 串流版
  • 設定

26/07/2018

【獨吃的優雅】一個人食飯就是怪人?都是偏見惹的禍

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    我做Marketing

    本欄每周四更新

  近日,「lunch time自己一個人食飯就係怪人」再次成為熱門辯論題目。

 

  正方嘅朋友覺得,喺公司裏面唔合群、無朋友嘅同事先會自己一個人食lunch,仲話嗰啲人相當有嫌疑;反方嘅朋友就話小學雞先要人陪食lunch,間唔中「獨食」一下其實仲開心。

 

 

  自己一個食lunch呢個topic其實無必要討論,亦無得討論,因為呢個純粹係個人取向。有人覺得一大班人去飲茶吹水先叫relax,但有啲人就寧願自己一個人去食一蘭,對住三幅牆玩電話先叫真正休息,並無分對與錯。

 

  值得討論嘅,反而係一口咬定「一個食lunch就係怪人」嘅心態。

 

  「一定係佢個人古怪,畀人排斥,所以無人肯同佢食啦。」

 

  「我估佢喺度扮高竇,唔想同我哋埋堆。」

 

  「而家老細咁睇佢,上晒位啦,仲駛咩同我哋食茶記呀。」

 

  好多時我哋會單憑first impression,單憑別人口中嘅傳言對某人作出判斷。就算你未曾同嗰個人講過一句說話、未曾同佢合作過任何project,從佢嘅外表、從其他同事繪形繪聲嘅描述,我哋對某啲人已經心存偏見。之後佢哋再做咩行為,我哋都唔會再覺順眼。話人哋一個人食飯奇怪,有時只不過係喺佢哋身上多加一條「罪名」,合理化我哋對佢嘅偏見。

 

  自己一個人食lunch根本唔係問題,問題係你點睇呢個同事。

 

  你可以因為同事無上進心、做嘢無交帶、英文唔好、返工成日遲到而覺得佢有問題。但如果只因佢選擇自己一個人食lunch,而扣佢印象分,咁做未免顯得你質素太低。

 

  初入職場,好多人希望盡量埋堆,擴大自己network,喺同事口中獲得更多有用資訊。但工作耐咗,「堆」有時仍然需要埋,但真係要好啱傾,或好有必要先會花力氣去埋,因為埋堆有時仲攰過OT。工作再耐啲,你會更有勇氣去選擇唔埋堆,因為你知道你係靠實力、靠工作表現去證明自己,而唔係靠外表、靠識多幾多個同事、靠有幾多人同你食lunch而去彰顯你嘅價值。

 

  當你覺得自己一個人食lunch唔係問題,自然唔會覺得其他人一個人食飯係問題。呢個係你職場成長印記之一。當你繼續喺職場闖蕩,你會繼續明白更多,包括下一階段嘅領悟:接受到公司只有同事,並無朋友。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

我要回應

你可能感興趣

放大顯示
風水蔣知識

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ