• |
  • 極速報價
  • |
  • 會員
  • 產品服務 / 串流版
  • 設定

02/11/2017

【2017薪金回顧】今年有得加薪啦?

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    我做Marketing

    本欄每周四更新

  每年嘅呢個時候,我都會同大家回顧一下今年轉工/薪金走勢,等大家可以了解香港市道同薪金大方向,好讓打工仔們轉工前「停一停,諗一諗」!

 

  「經濟不景氣」呢句話都講咗好幾年,喺老細口中就好似年年都冇好轉過一樣,當然2017佢哋都依然覺得不好過啦。雖然今年都唔係話好好景,但對比起2015/2016年度,2016/2017年度不景氣情況嘅轉變冇咁大。 2015/2016 聽過有公司cut budget 嘅情況非常嚴重,最極端cut budget近70%,雖然今年都係要cut,但幅度相對地好少少。

 

轉唔轉工好?

 

  記得早幾年都有講過,喺某啲經濟環境下,轉工未必一定係好事,好似2014年嘅數字指出,唔轉工反而加薪幅度多過轉工,但今年又如何呢?研究咗好幾份報告,51%嘅公司估計本年度公司嘅employment活動相對會冇咁活躍。而打工仔方面亦少咗人轉工,好多人今年都求穩定,2015/2016年度有 27% 嘅人曾經轉工,但本年度得 23%曾經轉工,經濟尚未明朗,一動不如一靜。而最特別嘅係,因為「人工問題」而轉工嘅人數每年下降,由2014/2015年度有42%,2015/2016年度有36%,到2016/2017年度只得28%,呢個轉變反映出,打工仔對人工嘅期望開始愈來愈低,知道轉工都未必可以搵得更多,所以慢慢地接受呢個事實(其實都有少少可悲),齊齊進入「守業模式」。大家開始轉工唔望錢,只望有更多工作/發揮嘅機會,希望呢段時間用工作機會去裝備自己。換個角度睇其實都係一件好事,長線打好基礎更勝一時嘅加薪。

 

今年有冇人工加?

 

  打工仔最關心嘅加薪問題又如何呢,全港整體行業睇,本年度同上年度好接近,61%嘅受訪者都有得加人工,不過marketing呢個行業就跌咗少少,由59%跌至54%。整體行業嘅平均加薪幅度亦有所改善,2015年 4.7% > 2016年 3.6% > 2017年 3.9%。因為2016年市道明顯轉差令加薪升幅大減,但今年可能大部分公司都慢慢消化咗負面影響,所以加薪先有改善。由Marketing Assistant到Marketing Manager嘅平均人工分別係,MA $13,160,ME $16,933,SME $22,512,AM $25,848,MM $34,231。除咗ME之外,個個職位嘅平均人工都有上升,升幅最多係MA,而升幅最少係AM同MM。市道唔好,愈高層就愈唔想轉工,因為佢哋知道自己好難搵到更高薪嘅工作,所以老細加得少畀佢哋,佢哋都未必夠膽走人。另外仲有bonus 同double pay,同上年一樣,75%有得分,25%就食谷種。而最霸氣嘅係,有 21% 嘅人又有bonus又有double pay,估計都只會係GM、MD 或以上嘅高層先可以「分錢畀自己」。

 

 

一星期OT幾多?

 

  喺香港工作都好難有人唔需要OT,而最慘嘅係,有75%嘅人OT係冇錢claim(相信大家都習慣)。有25%嘅受訪者一星期需要OT 0至1個鐘,63%嘅人需要OT 1-6個鐘,12%嘅人需要OT 7個鐘或以上。對呢個數字有少少保留,相信一星期OT 7個鐘以上嘅人絕對唔只咁少。但另一重點係,有好多人會喺私人時間OT,46%嘅受訪者覺得私人時間OT係「工作嘅一部分」,28%因為唔想喺公司做,所以返屋企OT,19%嘅覺得閒時OT係「習慣」……最得意嘅係,有6%嘅人覺得「因為得閒所以OT」,原來香港有6%係工作狂!

 

  工作狂也好,奴性重也好,工作只係生活嘅一部分。努力工作、勤力OT除咗為份人工之外,亦要令工作有一份意義,如果唔係你人生一半嘅時間就唔知為咗乜要日日努力OT。勤力唔係唔好,但其實牛都好勤力,重點係要睇你為乜嘢而勤力。

 

  雖然有好多事情你未必能夠改變,但你可以改變自己,就好似揸帆船咁,你改變唔到風向,但你可以調節到帆布方向,從而帶你到達目的地。 

 

2016 薪金回顧

2015 薪金回顧

 

資料來源 : JobsDB)

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

我要回應

你可能感興趣

放大顯示
師傅靈靈法

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ