• |
  • 極速報價
  • |
  • 會員
  • 產品服務 / 串流版
  • 設定

15/06/2017

社交場合中的對話殺手

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  人在職場,無論你係唔係做marketing,時不時你都需要喺各類社交場合中同每日見面嘅上司、同事,或者唔太熟悉嘅人傾計。尤其是當面對唔熟識嘅人,你可以講嘅話題自然更少。為咗避免dead air,好多人都會不知不覺咁夾硬搵出一啲話題嚟講。正所謂情急智生,但有時有啲話題又的確唔太適合喺輕鬆嘅社交場合之下討論,例如: 

 

 

一 ) 是非

 

  好多人喺比較輕鬆嘅環境之下,就會好容易將佢哋喺辦公室嘅「所見所聞」同人分享。但往往呢啲衝口而出嘅話題看似輕鬆,但實際上可能好有殺傷力。「言者無心,聽者有意」,一啲只有你睇到嘅事實好有可能會影響到人,或者無意之中爆咗同事一啲鮮為人知嘅故事。除咗唔小心中傷人,你更有可能畀人一個八卦、鍾意講人是非嘅印象。 

 

二 ) 抱怨

 

  無論係唔係社交場合,有好多人都鍾意不斷抱怨工作上嘅種種不如意事:上司無理態度、工作設備配套不周、lunch time時間太短等等。總之一有機會,佢哋就會滔滔不絕。本身同身邊幾個熟悉嘅同事分享其實無傷大雅,但係當遇上一啲並非經常合作嘅同事,佢哋對你嘅第一印象自然會覺得呢個人怨氣非常大,之後敬而遠之。

 

三 ) 恭維

 

  「你就好啦,跟住呢個上司」、「你就好啦,上個月份bonus一定好大,記得請食飯呀」,呢一類型嘅客套說話往往只會令對方難以回應。佢哋多數會急急扯開話題,轉移視線。如果你係真心羨慕佢嘅部門或者佢嘅工作崗位,你可以嘗試講「我見你哋都好少OT,你條team同你老細係咪都夾得幾好」,從而打開較有建設性嘅話題。

 

四 ) 工作

 

  喺非辦公時間,最忌追問同事、下屬嘅工作進度。無論係lunch time、放工之後、或者喺公司嘅社交場合,只要你一提起關於工作上嘅話題,你嘅身邊人會漸漸減少出聲,如果行得開的話,佢哋都會靜雞雞咁樣離開你。所以識趣的話,請盡量將你對工作上嘅求知慾暫緩,等待office hour先盡情將佢哋釋放。

 

  社交場合傾計嘅話題千變萬化,面對上司、同事、下屬都有所不同。唔同性格嘅人對唔同話題嘅接受程度都唔一樣,但有一點一定要記住:喺公司嘅社交場合同人互動之後嘅後果,無論好定壞,都好有可能會帶返辦公室嘅office hour之內。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經 ‧ 生活App獨家「銀行匯率比較」功能 立即下載 iOS/Android

我要回應

你可能感興趣

  • 生活副刊
  • DIVA
  • 健康好人生