見工為咗咩？無錯，係辭工，辭咗宜家做緊既個份XX工（真話廢事講）。既然要有個新開始，所以當要奮身去準備見新既工，務必注意以下5件事︰

1. Recall下自己交過嘅CV

　　「你介紹下自己。」「你點解覺得自己適合呢份工？」見工少不免聽到呢兩條問題，可能你都會想問返轉頭，「你有無睇CV？」雖然呢個Moment你好想反眼，但問之前，你又有無問自己份CV寫過咩？見工前不妨翻睇再翻睇自己份CV，皆因大部分人搵工永遠都係幾百份CV幾百份CV咁寄出去，最多每份都執少少、再執少少，好大程度上真係會唔記得自己寫咗啲乜。

2. 起面試官底

　　大公司通常都會將啲管理層嘅背景資料擺上公司網站，上去睇下邊個有機會In你，然後再搵埋佢地既LinkedIn，了解下佢地既背景，再望下你哋之間有無共通點，例如專業方面，又或者興趣方面。所謂知己知彼，百戰百勝。

3. 起公司底

　　公司嘅規模、架構等等都可以係網上搵到。如果你無睇到，對方問到而你唔識嘅話，就扣晒誠意分喇。所以，見工前你可以上去公司網站又或是留意相關新聞，以了解公司嘅文化及架構。

4. 睇下份工嘅工作內容

　　見工最後都有個環節係輪到你問問題，如果你問：「其實份工做乜架？」必會大扣分，除非招聘廣告入面寫得好簡陋，你可以引用下佢寫嘅內容，再針對當中的職務問一相關問題。遇到寫到好詳細嘅Job Descriptions時，你就要將自己嘅經驗去說服僱主請你。

5. 行業基本認識

　　入邊行打邊份工都要視乎行情，要見嘅公司係大企定係中小企、係獨市還是多競爭對手，睇完要見嘅個間公司資料外，再睇埋競爭公司嘅資料，咁就萬無一失啦！

source:CTgoodjobs