立法會九龍西補選提名期喺下個月２號開始，民主派嘅劉小麗（小麗）今日率先正式宣布參選喇！佢要喺九龍西拎到足夠提名照計就無難度，但過唔過到選舉主任嗰關就真係天知喇！為將被二度DQ嘅可能性減到最低，小麗就一於將個人網頁上面嘅「自決」主張嚟個「大清洗」；再喺參選記者會強調，自己從不支持港獨，「自決」係指爭取「社會自強」。

「小麗民主教室」網頁圖片。

泛民齊人出席撐場

　　民主派由小麗「出戰」可以話一早已經無懸念，今日泛民都算齊人出席記者會幫佢撐場，當然馮檢基（基哥）係未有現身㗎！小麗今次以「守護幸福」、「問是非，分真假」作為競選口號，望爭取長者老有所依、基層人人上樓、醫療服務可以做到藥到病除等……Jenny望住佢嗰句「守護平凡的幸福」嚴重懷疑係出自「MK大文豪」鄺俊宇手筆！

「借殼上市」Work唔Work？

　　小麗話提名期一開始就報名，作最好、最充足的預備。咁都啱嘅，萬一選舉主任又做Deadline Fighter都仲有揸拿嘛！另外，小麗以乎已經Plan好「借殼上市」，佢話希望可以工黨名義參選，但一切要等工黨開完會員大會先有結果。不過，工黨嗰邊都事先做好準備喇，Jenny已經收到工黨職員通知，佢哋遲下會有一個劉小麗競選嘅傳媒聯絡谷。

　　Jenny覺得小麗呢招「借殼上市」係醒嘅！因為工黨本身理念同佢都相似，加上該黨有現任議員，大大減低咗選舉主任話佢唔真誠，而DQ佢嘅機會！如果佢唔再畀人DQ，咁Plan B 李卓人就唔使「出山」、基哥亦唔需要嬲嬲豬出動、民主派就終於唔再內訌喇（暫停一陣咁多啦）！