• |
  • 極速報價
  • |
  • 會員
  • 產品服務 / 串流版
  • 設定

15/01/2020

林鄭政府患「派錢成癮綜合症」

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

 

  擁有無比創新思維又勇於承擔嘅特區政府,再次推出關顧香港人嘅措施,大拿拿投放100億銀推出合共十項紓困新政,預料過百萬港人受惠。十項措施係乜報道都已經非常詳細,Tina唔再詳述,但我想講一講,政府一改以往審慎理財嘅原則,多次開倉大派特派,患上「派錢成癮綜合症」有乜後果?

 

  修例風波開始以來,政府面對洶湧民情,推出過多輪紓困措施,已經用咗好幾百億元。林鄭自己都多次講過,政府派錢並唔係因為修例風波所引起,而係「急市民所急」,但喺市民眼中,政府多次紓困措施,紓解民怨之心路人皆見,唔係修例風波,呢班高薪厚祿堅離地嘅官員,根本唔會理咁多。

 

  但坦白講句,同一樣嘅派錢方式同金額,由唔同官員、唔同時期推出,效果係好唔一樣。同樣係派咁多錢,如果市民預計唔到你會派的話,民意就會好受,政府嘅民望就會回升;但如果政府以致官員嘅民意已經低無可低,你派錢,市民亦只會覺得你係想收買人心,錢掟咗出街但絕不能紓解民怨。

 

  好似今次派錢,唔少市民就逐項同你挑剔,例如幫公公婆婆換電視,就畀人質疑政府派電視每部成5000幾蚊,但原來只係換部市價1500蚊嘅24吋電視,再度被質疑係「官商勾結」,派錢嘅效果又打咗一大折扣。

 

  都係民間智慧講得好,「錢解決到嘅問題就唔係問題」呢一句,真係夠寫一篇哲學博士論文。如果民間真係比林鄭更有智慧,咁依家政府患上「派錢成癮綜合症」,究竟係政府一路都用緊錯嘅辦法去解決香港面對嘅深層次問題吖,定係呢政府根本就唔係想解決問題呢?值得大家深思。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

我要回應

你可能感興趣

放大顯示
風水蔣知識

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ