• |
  • 極速報價
  • |
  • 會員
  • 產品服務 / 串流版
  • 設定

06/12/2019

要求力保林鄭,建制耍手擰頭?

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  立法會由復會至今等咗足足近兩個月,一直排喺議員議案首位嘅項目「調查行政長官瀆職」議案,喺區選過後,呢個星期終於都可以成功進入議程,兼且連票都投埋。投票結果相信讀者都唔會感到意外,就係建制派「幾乎」全體歸位,喺功能組別過唔到之下,議案被否決。

 

  之所以話係「幾乎」,因為睇投票紀錄就見到,有幾位建制派係無歸位投票;包括民選嘅梁美芬、謝偉俊、田北辰同何君堯,而呢四位建制出晒名口才了得嘅「猛將」,更加係一言不發,做咗罕見嘅沉默小數。

 

  Tina聽聞,議案開展之前,建制派已經陸陸續續收到指令,話議案不能通過。雖然西環都知道唔少建制派喺區選之後對林鄭嘅不滿感爆晒燈,但議案始終係有法律效力,放任建制派議員投票的話,話唔定真係會搞咗個委員會調查林鄭,咁就對特區管治帶來極大威脅;所以要求建制派力保林鄭過關之餘,亦希望建制派喺發言時都要正面啲,將負面嘅都歸晒去黑衣人身上。

 

  雖然開到聲要歸隊,但係建制派私底下「罵聲四起」。有民選建制派就話,整個區選就係因為市民將建制派同政府綑縛埋一齊,先搞到建制派輸得咁徹底,依家一選完大家都仲諗緊點樣同政府劃返開少少,以保障明年立法會選舉,竟然仲叫佢哋力保林鄭,豈不是要佢哋繼續擁抱計時炸彈?更有建制派已向西環明言,如果明年立法會選舉仲係林鄭坐喺禮賓府,好難想像最終選舉結果會係點。

 

     呢個對林鄭咁負面嘅想法,唔單止係民選建制,就連功能組別建制亦都有相同諗法。有幾位從無「異心」嘅功能組別議員聽到指令之後都覺得左右做人難,因為界別選民好多都對林鄭表達極度不滿,生怕發言同選民立場不一致,最終害苦嘅都係自己。所以都不難發現,有好多建制功能組別議員,投票就坐定定,但最終都係選擇一言不發,作出沉默嘅抗議!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生